އެމެރިކާގެ ރައީސް ޑޮނަލްޑް ޓްރަމްޕް 2018ވަނަ އަހަރު ކުރެއްވި ފުރަތަމަ ޓްވީޓްގައި ޕާކިސްތާނަށް ބަހުގެ ޙަމަލާތަކެއް ދެއްވައިފިއެވެ.

ޓްރަމްޕްގެ ޓްވީޓްގައި ވިދާޅުވީ އެމެރިކާއިން ކޮންމެ އަހަރަކު އެތައް ބިލިއަން ޑޮލަރެއްގެ އެހީ ޕާކިސްތާނަށް ދެމުންދާއިރު، ބަދަލުގައި ޕާކިސްތާނުން އެމެރިކާއަށް ދޮގު ހަދާ އޮޅުވާލި ކަމަށެވެ. އަދި އަފްޣާނިސްތާނުގައި އެމެރިކާ ސިފައިން ހޯދަން މަސައްކަތް ކުރާ ޓެރަރިސްޓުންނަށް ޕާކިސްތާނުން ބޯހިޔާވަހިކަން ފޯރުކޮށްދޭ ކަމަށް ޓްރަމްޕް ތުހުމަތުކުރެއްވިއެވެ. ޓްރަމްޕް މިފަދަ މޭރުމަކުން ޓްވީޓްކުރައްވާފައިވާއިރު، މިދިޔަ އޮގަސްޓްމަހު ޕާކިސްތާނަށް އެހީގެ ގޮތުގައި ދޭން ހަމަޖެހިފައިވާ 250 މިލިއަން ޑޮލަރު އަދިވެސް ވަނީ އެމެރިކާއިން ހިފަހައްޓާފައެވެ.

ޓްރަމްޕްކުރެއްވި ޓްވީޓުގައި ވަނީ "އެމެރިކާގެ މޮޔަކަމުން އެމެރިކާއިން ވަނީ ޕާކިސްތާނަށް ފާއިތުވި އަހަރުތަކުގެ ތެރޭގައި 33 ބިލިއަން ޑޮލަރު އެހީގެ ގޮތުގައި ޕާކިސްތާނަށް ދީފައި. އޭގެ ބަދަލުގައި އަހަރެމެންގެ ވެރިންނަކީ މޮޔައިންތަކެއް ކަމަށް ބަލައި، ޕާކިސްތާނުން ދިޔައީ ދޮގު ހަދައި، އޮޅުވާލަމުން،" ކަމަށެވެ.

ޓްރަމްޕްގެ ޓްވީޓްގެ މައްސަލަ ހޫނުވެފައިވާއިރު، ޕާކިސްތާނުން ބުނީ އެމެރިކާއިން ދީފައިވާ އެހީތަކުގެ ހުރިހާ ތަފްޞީލެއް އެބަހުރިކަމަށާއި، އެ މައުލޫމާތު އާއްމުކުރަން ޕާކިސްތާނުން ތައްޔާރަށް އޮތް ކަމަށެވެ.

ޓްރަމްޕްގެ ޓްވީޓަށް ރައްދު ދެއްވަމުން ޕާކިސްތާނުގެ ދިފާޢީ ވަޒީރު ޚުއްރާމް ދަސްޣިރް ޚާން ވިދާޅުވީ އެމެރިކާއަށް ފާއިތުވި އަހަރުތަކުގައި ޕާކިސްތާނުން އަސްކަރީ ގޮތުން އެހީތެރިކަން ފޯރުކޮށްދީފައިވާ ކަމަށާއި، އެހެން ނަމަވެސް އޭގެ ބަދަލުގައި އެމެރިކާއިން ޕާކިސްތާނަށް އިތުބާރު ކޮށްފައިނުވާ ކަމަށެވެ.

އެމެރިކާގެ ރައީސް ޓްވީޓާއި ގުޅިގެން ޕާކިސްތާނުގައި ހުންނަވާ އެމެރިކާގެ ސަފީރު ޑޭވިޑް ހޭލްވަނީ ޕާކިސްތާނުގެ ޚާރިޖީ ވުޒާރާއަށް ހާޒިރުކޮށް، މިމައްސަލައިގައި ޕާކިސްތާނުގެ ކަންބޮޑުވުންތައް ސަފީރާއި ހިއްސާކޮށްފައެވެ.