ޢަހަދު ތަމީމީ އަކީ ފަލަސްތީނުގެ ބިމަށް ވެރިވެގެން އުޅޭ ޔަހޫދީންނާއި ދެކޮޅަށް އެންމެ ތުއްތު އިރުއްސުރެ އަޑުއުފުލުމުގައި ފާހަގަކޮށްލެވޭ ކުއްޖެކެވެ. އުމުރުން އެންމެ 16 އަހަރުގެ މި އަންހެން ކުއްޖާ އިސްރާއީލުގެ ފުލުހުން އިހަކަށްދުވަހުގެރޭ ހައްޔަރު ކޮށްފައިވަނީ ޔަހޫދީ ފުލުހަކަށާއި ސިފައިންގެ މީހެއްގެ ގައިގައި ޖެހިކަމަށް ބުނެއެވެ.
މިމައްސަލައިގައި ޢަހަދުގެ އިތުރުން އޭނާގެ މަންމައާއި ދެބެންގެ ދެދަރި ކުއްޖަކުވެސް އިސްރާއީލް ފުލުހުން ވަނީ ހައްޔަރު ކޮށްފައެވެ. އަދި ޢަޙަދަކީ އިސްރާއީލުގެ ސިފައިންނަށް ހުރި ނުރައްކަލެއް ކަމަށް ކަނޑައަޅައި، އޭނާ ވަނީ ބަންދު ކޮށްފައެވެ.
ޢަހަދު ހައްޔަރު ކޮށްފައިވަނީ އޭނާގެ 14 އަހަރުގެ ދެބެންގެދެދަރި ކުއްޖެއްގެ ބޮލަށް އިސްރާއީލް ސިފައިން ބަޑި ޖަހައި، އެގެޔަށް ކަރުނަ ގޭސް ކެނިސްޓަރުތަކަކުން ޙަމަލާދީ، އެގޭގެ ކުޑަދޮރުތަކެއް ހަލާކުކޮށްލިތާ އެއް ދުވަސްފަހުންނެވެ.
ޢަހަދުގެ ދިފާޢުގައި މުސްލިމުންގެ ބައެއް ޖަމާޢަތްތަކުން ވާހަކަ ދެއްކިނަމަވެސް، އިންސާނީ ހައްޤުތަކާއި އަންހެނުންގެ ހައްޤުތަކަށް އަދި ކުޑަކުދިންގެ ހައްޤުތަކަށް މަސައްކަތްކުރާ ހުޅަނގުގެ ޖަމާޢަތްތަކުގެ މާބޮޑު ސަމާލުކަމަށް ހިތްވަރުގަދަ މި ކުޑަކުޑަ އަންހެން ކުއްޖާއަކަށް ނުލިބުނެވެ. ޠާލިބާނުންގެ ޙަމަލާތަކުގެ ޝިކާރަޔަކަށްވި ޕާކިސްތާނުގެ މަލާލާ ޔޫސުފަށް ލިބުނުފަދަ ބައިނަލްއަޤްވާމީ ސަމާލުކަމެއް ޢަހަދުއަށް ނުލިބުނެވެ.
ޕާކިސްތާނުގައި ޙަރަކާތްތެރިވާ ހަތިޔާރު އެޅި ޖަމާޢަތެއް ކަމަށްވާ ތެހެރީކޭ ޠާލިބާން ޖަމާޢަތުން ޢުމުރުން 15 އަހަރުގެ މަލާލާއަށް ބަޑީގެ ހަމަލާއެއް ދިނުމާއިއެކު ދުނިޔޭގެ ސަމާލު ކަމަށް އެކަން އައެވެ. ޙަމަލާއާއި ގުޅިގެން އިނގިރޭސިވިލާތުގެ ކުރީގެ ބޮޑުވަޒީރު ގޯޑަން ބްރައުން 'އައި އޭމް މަލާލާ'ގެ ނަމުގައި ޕެޓިޝަނެއް ފެއްޓެވިއެވެ. އަދި ޔުނެސްކޯއިން 'ސްޓޭންޑް އަޕް ފޯރ މަލާލާ'ގެ ނަމުގައި ޙަރަކާތްތަކެއް ފެށިއެވެ. އެމެރިކާގެ އޭރުގެ ރައީސް ބަރަކް އޮބާމާ އާއި، އދގެ އޭރުގެ ސެކްރެޓަރީ ޖެނެރަލް ބަން ކީ މޫން އާއި ބައްދަލުކުރުމަށް މަލާލާއަށް ދައުވަތު ލިބުނެވެ. އދގެ ޢާއްމު މަޖިލީހުގައި ތަޤްރީރުކުރުމަށް ދައުވަތު ލިބުނެވެ. ޓައިމް މެގަޒިންގެ ދުނިޔޭގެ އެންމެ ނުފޫޒު ގަދަ 100 މީހުންގެ ތެރޭގައި ހިމެނުނެވެ. ގްލެމަރ މެގަޒިންގެ އަހަރުގެ އަންހެން ޝަޚުސިއްތަކަށް ހޮވުނެވެ. 2013 ވަނަ އަހަރު ނޮބެލް ސުހްލައިގެ އިނާމަށް ނޮމިނޭޓްވެ، 2014ވަނަ އަހަރުގެ ނޮބެލް ސުލްހައިގެ އިނާމު ލިބުނެވެ. މަލާލާގެ ޝަރަފުގައި ބައިނަލްއަޤްވާމީ ގޮތުން 'މަލާލާ ދުވަސް'ވެސް ފާހަގަކުރެއެވެ. މިއިން އެއްވެސް ކަމަކީ މައްސަލައެއް ނޫނެވެ. އޭނާއަށް ހައްޤު ކަންތަކެވެ. އެހެން ނަމަވެސް ގިނަ ބައެއްގެ ފާޑުކިޔުންތައް މިހާރު މި ޖަމާޢަތްތަކަށާއި މުޅި ދުނިޔެއަށް އަމާޒުވެފައި މިވަނީ ޢަހަދުއަށް މިފަދަ އެއްވެސް ސަމާލުކަމެއް ނުލިބުމުންނެވެ.
ނުހައްޤުން ޢަހަދުއަށް އޭނާ ވިހެއީއްސުރެ ލިބެމުންދާ އަނިޔާތަކަށް އަޑު އުފުލާނެ ޖަމާޢަތެއް ނެތެވެ. އަދި އޭނާއަށް އިސްރާއީލުން ކުރާ އަނިޔާތަކާއި ދެކޮޅަށް ބަޔާނެއް ނެރޭނެ ބަޔަކުވެސް ނުވިއެވެ. އިސްރާއީލުން ދެމުންދާ އަނިޔާތަކާއިމެދު ވާހަކަ ދެއްކުމަށް ލިބުނު ފުރުސަތަކަށް އެމެރިކާއަށް ދިޔުމަށް ބޭނުންވާ ވިސާ އޭނާއަށް ދިނުމަށް އެމެރިކާ ސަރުކާރުންވެސް ވަނީ ދެކޮޅު ހަދާފައެވެ.
މަލާލާއެކޭ އެއްގޮތަށް ޢަހަދުގެ ވެސް ޢުމުރުގެ ބޮޑުބައި ހޭދަކުރީ އެތައް ހައްޤުތަކަކުން މަޙްރޫމްވެގެންނެވެ. އެހައްޤުތައް ހޯދުމަށް ހަނގުރާމަ ކުރަމުންނެވެ. ޢަހަދުގެ ދެބެންގެ ދެދަރި ކޮއްކޮއެއްގެ އިތުރުން ބޮޑުބޭބެއެއް އިސްރާއީލުގެ ޙަމަލާތަކުގައި ޝަހީދުވެފައިވެއެވެ. އޭނަގެ މައިންބަފައިންނާއި ބޭބެ އެތައް ފަހަރަކު އިސްރާއީލް ސިފައިން ހައްޔަރު ކޮށްފައިވެއެވެ. އޭނާގެ މަންމަގެ ފަޔަށް އިސްރާއީލުގެ ސިފައިން ބަޑި ޖަހާފައިވެއެވެ. އަދި މީގެ ދެއަހަރު ކުރިން އިސްރާއީލް ސިފައިން އޭނާގެ ކުޑަ ކޮއްކޮ ހައްޔަރުކުރަން އުޅުމުން، އެކަން ހުއްޓުވަން އޭނާ މަސައްކަތްކުރާ ވީޑިއޯއެއް ވެސް ވަނީ ޢާއްމުވެފައެވެ.
މިހުރިހާ ކަމަކާއިއެކު ވެސް ޢަހަދުއަށް ލިބެމުންދާ އަނިޔާތަކާއި ދެކޮޅަށް ބައިނަލްއަޤްވާމީ މުޖްތަމައުން އަޑު އުފުލަން ފެއިލްވީ ކީއްވެހެއްޔެވެ؟ އެއް ސަބަބަކީ ޔަހޫދީ ދައުލަތް، އިސްރާއީލުން ކުރާ ކުށްތައް ކުށްވެރިކުރަން ނުވަތަ ހުއްޓުވަން ބައިނަލްއަޤްވާމީ މުޖްތަމައު ނުކުޅެދިފައިވުމެވެ. އަދި ދައުލަތަކުން ކުރުމުން ކޮންމެ ކަމެއްވެސް ހުއްދަ ކަމަށް ބައެއް މީހުންނަށް ޤަބޫލުކުރެވުމެވެ. ހަނގުރާމަވެރި ޖަމާޢަތްތައް ކަމަށްވާ ޠާލިބާނުންނާއި އަލްޤައިދާ އަދި ބޯކޯޙަރާމް ފަދަ ޖަމާޢަތްތަކުން ކުރާ ކަންކަން ކުށްވެރިކޮށް، ހަމައެފަދަ ޖަރީމާތައް އިސްރާއީލުން ހިންގުމުން، ބައިނަލްއަޤްވާމީ މުޖްތަމައުން އެކަން ކުށްވެރި ނުކުރަނީ މިސަބަބާއި ހެދިއެވެ.
އިސްރާއީލުން އުމުރުން އެންމެ 16 އަހަރުގެ ކުޑަ އަންހެން ކުއްޖަކު އޭނާގެ އާއިލާއާއި ގެދޮރު ޙިމާޔަތްކުރަން އެކުރާ މަސައްކަތް އެސިފަކުރަނީ ޓެރަރިސްޓް ހަރަކާތެއްގެ ގޮތުގައެވެ. އިންސާނީ ހައްޤުތަކަށް މަސައްކަތްކުރާ ކަމަށް ބުނާ ޖަމާޢަތްތައް ކޮބައިހެއްޔެވެ؟ ކުޑަކުދިންގެ ހައްޤުގައި މަސައްކަތް ކުރާކަމަށް ބުނާ ޖަމާޢަތްތައް ކޮބައިހެއްޔެވެ؟ އަންހެނުންގެ ހައްޤުގައި މަސައްކަތްކުރާކަމަށް ބުނާ ޖަމާޢަތްތައް ކޮބައިހެއްޔެވެ؟
ޢަހަދުއަށް އަޅައިނުލައި ދޫކޮށްލުމުން އެނގި ސާފުވަނީ އަޅުގަނޑުމެންގެ ދެފުށް ދެ ގޮތްކަމެވެ. އިންސާނިއްޔަތުކަމަކީ ވަކި ބަޔަކަށް އެކަނި އޮންނަން ޖެހޭ ކަމެއް ނޫނެވެ.
