އިންޑިއާގެ މުމްބާއިގެ ޝޮޕިން ސެންޓަރެއް ކަމަށްވާ "ކަމާލަ މިލްސް"ގައި ހިނގި އަލިފާނުގެ ހާދިސާއެއްގައި 14 މީހަކު މަރުވެ 21 މީހުންނަށް އަނިޔާވެއްޖެއެވެ.

ހުކުރު ދުވަހުގެ ރޭގެ ވަގުތެއްގައި އެންމެ ފުރަތަމަ އަލިފާން ރޯވީ އެ ޝޮޕިން ސެންޓަރުގެ ފަސްވަނަ ފްލޯގައި ހުރި ރެސްޓޯރެންޓެއްގައި ކަމަށް މީޑިއާތަކުން ރިޕޯޓުކޮށްފައި ވެއެވެ. އަދި ގާތްގަނޑަކަށް 30 މިނެޓުގެ ތެރޭ މުޅި އިމާރާތަށް އަލިފާންގަނޑު ފެތުރުނު ކަމަށް ވެސް ރިޕޯޓުތައް ބުނެއެވެ. މި ޝޮޕިން ކޮމްޕްލެކްސްގައި ރޯވި އަލިފާންގަނޑު ނިއްވާލެވިފައި ވަނީ ހުކުރު ދުވަހުގެ ހެދުނުގެ ވަގުތެއްގައެވެ.

މި ހާދިސާގައި މީހުން މަރުވެފައި ވަނީ އިމާރާތުގެ ސީލިން ވެއްޓުމުގެ ސަބަބުން އިމާރާތުގެ ތެރޭގައި ތާށިވެގެންނެވެ. މި ހާދިސާގައި މަރުވި 14 މީހުންގެ ތެރެއިން 11 މީހުންނަކީ އަންހެނުންނަށްވާއިރު މި މީހުންނަކީ އެ ރެސްޓޯރެންޓްގައި އޮތް އުފަންދުވަހުގެ ޕާޓީއަކަށް ދިޔަ މީހުން ކަމަށް އިންޑިއާގެ މީޑިއާތަކުގައިވެއެވެ. މި ހާދިސާގައި އެކިވަރުގެ އަނިޔާ ލިބުނު 21 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.

މުމްބާއީގެ ފުލުހުންގެ ސްޕޯކްސްޕާސަން ދީޕަކް ދީރަޖް ވަނީ އެ ރެސްޓޯރަންޓުގެ ވެރިފަރާތާއި ޕާޓްނަރުންނާ ދެކޮޅަށް މައްސަލައެއް ހުށަހެޅިފައިވާކަން ކަށަވަރު ކޮށްދެއްވާފައެވެ.

އިންޑިއާގެ ބޮޑުވަޒީރު ނަރެންދްރާ މޯދީ ވަނީ މި ހާދިސާގައި މަރުވި މީހުންގެ އާއިލާތަކަށް ޓްވީޓެއް މެދުވެރިކުރައްވައި ތައުޒިޔާ ފޮނުއްވާފައެވެ.

ތޮއްޖެހިފައިވާ މުމްބާއީގައި މިފަދަ ހާދިސާތައް ހިނގުމަކީ އާންމު ކަމެކެވެ.