ޔަމަނުގެ ހޫސީ ހަނގުރާމަވެރިންނާ ދެކޮޅަށް ސައުދީ އަރަބިއްޔާއާއި ގުޅިފައިވާ އަސްކަރީ ފައުޖުން ދިން ހަމަލާތަކުގައި 48 ގަޑިއިރުގެ ތެރޭ ޔަމަނުގެ ޢާއްމުންގެ 71 މީހުން މަރާލާފައިވާކަމަށް އެ ގައުމުގެ މީޑިޔާތަކުން ބުނެފިއެވެ.

މަންޒަރު ދުށް މީހުން އަލްޖަޒީރާގައި ބުނެފައިވަނީ ވެރިރަށް ސަންއާއަށް ހޯމަ ދުވަހު ހެނދުނު ދިން ހަމަލާތަކުގައި ކުޑަ ތިން ކުދިންނާ ދެ އަންހެނުންނާއެކު ޖުމްލަ 11 މީހުން މަރުވެފައިވާކަމަށެވެ.

ހޫސީންގެ އެކްޓިވިސްޓެއްކަމަށްވާ އަބްދުލް މާލިކް އަލް ފަޒުލް ބުނީ ހޫސީންގެ ލީޑަރެއްކަމަށްވާ މުހައްމަދު އަލް ރައިމީ އަށް އަމާޒުކޮށް ދިން ހަމަލާތަކުގައި ދެ އިމާރާތެއް ބިމާ ހަމަވި ކަމަށެވެ.

މީގެ އިތުރުން ހަނގުރާމަމަތީ ބޯޓުތަކުން ރައިމީ ފިލަން އުޅުމުން ކާރަށްވެސް ހަމަލާދީފައިވާއިރު ހަމަލާގައި ޒަޚަމްވި މީހުންނަށް އެހީވުމަށް އުޅުނު ފަސްޓް ރެސްޕޮންޑަރސްއަށްވެސް ހަމަލާދީފައިވާކަމަށެވެ.

މި ހަމަލާތަކަށްފަހު ސައުދީއާއި ގުޅިފައިވާ ފައުޖުން އަދި މިހާތަނަށް އެއްޗެއް ބުނެފައެއް ނުވެއެވެ.

މެޑިކަލް ޖާނަލްއެއްކަމަށްވާ ލެންސެޓްއިން ބުނީ ހަނގުރާމައިގެ ސަބަބުން ޔަމަނުގެ އާއްމުންގެ އާބާދީތައް ސުންނާފަތިވަމުންދާކަމަށެވެ.

ޔަމަނުގެ ކުރީގެ ރައީސް އަލީ އަބްދުﷲ ސާލިހްގެ ސަރުކާރާ ދެކޮޅަށް 2011 ވަނަ އަހަރު ޔަމަނުގައި ފެށުނު މުޒާހަރާތަކުގައި ނުކުތް ހޫސީން، ސާލިހްގެ ޕާޓީއާއެކު ކޯލިޝަން ހަދައިގެން އެގައުމުގައި އޮތް ބައިނަލްއަގްވާމީ މުޖުތަމައު ގަބޫލުކުރާ ރައީސް އަބްދު ރައްބޫ މަންސޫރު ހާދީގެ ސަރުކާރާ ދެކޮޅަށް ނުކުމެފައިވަނީ 2014 ވަނަ އަހަރުއެވެ.

މި އަހަރުގެ ޑިސެމްބަރު މަހުގެ 4 ވަނަ ދުވަހު ސާލިހް އަވަހާރަކޮށްލާފައިވީ ނަމަވެސް ސަންއާގެ ކޮންޓްރޯލް އަދިވެސް އޮތީ ހޫސީންގެ އަތުގައެވެ.

ސައުދީއާއި ގުޅިގައިވާ ފައުޖުން ޔަމަނަށް ހަމަލާދޭން ފަށާފައިވަނީ 2015 ވަނަ އަހަރުގެ މާޗް މަހުގެ 26 ވަނަ ދުވަހުއެވެ.