އިރުމަތީ ޤުދުސްގައި އިސްރާއީލުން އަނެއްކާ ވެސް 3 ލައްކަ ހައުސިންގ ޔުނިޓް އެޅުމަށް ކުރަމުންދާ މަސައްކަތް ފަލަސްތީނުން ކުށްވެރި ކޮށްފިއެވެ.

ފަލަސްތީނުގެ ޚާރިޖީ ވުޒާރާއިން އެވުޒާރާގެ ފޭސްބުކް ޕޭޖްގައި އާއްމު ކޮށްފައިވާ ބަޔާނެއްގައި ބުނީ ހިފާފައިވާ އިރުމަތީ ޤުދުސްގައި ޔަހުދީ އާބާދީއެއް ބިނާކުރުމަށް ކުރަމުންދާ މަސައްކަތް ކުށްވެރި ކުރާ ކަމަށެވެ. އަދި އިސްރާއީލުގެ އިސްތިއުމާރީ ބޮޑާކަން ބޮޑުވެފައިވަނީ އިރުމަތީ ޤުދުސްއަކީ އިސްރާއީލުގެ ވެރިރަށް ކަމަށް އެމެރިކާއިން ބަލައިގަތުމާއި ގުޅިގެން ކަމަށް ބުނެ، ފަލަސްތީނުގެ ޚާރިޖިއްޔާއިން ކަންބޮޑުވުން ފާޅުކޮށްފައިވެއެވެ.

ފަލަސްތީނުން ބުނީ އިސްތިއުމާރީ ބާރު، އިސްރާއީލުން ހިންގަމުންދާ ޖަރީމާތަކުގެ ޒިންމާ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ނަގަން ޖެހޭ ކަމަށެވެ.

އިސްރާއީލުގެ މީޑިއާއިން ބުނާ ގޮތުގައި އެޤައުމުގެ ހައުސިންގ މިނިސްޓަރ ޔޮއާވް ގަލަންތު މަސައްކަތް ކުރައްވަނީ ހުޅަނގު އައްސޭރީގެ ހިފާފައިވާ ބިންތަކުގައި އިސްރާއީލުން ބިނާކޮށްފައިވާ އާބާދީތަކަކީ އިރުމަތީ ޤުދުސްގެ ބައެއްގެ ގޮތުގައި ހަމަޖެއްސުމަށެވެ. 'ގްރޭޓަރ ޖެރޫސަލަމް ބިލް'ގެ ނަމުގައި އިސްރާއީލުގެ ޤާނޫނު ހަދާ މަޖިލިސް، ނެސެޓަށް މިކަމާއި ބެހޭ ބިލެއް މިދިޔަ އޮކްޓޯބަރު މަހު ހުށަހެޅުމަށް ތައްޔާރުވި ނަމަވެސް، އަދި އެބިލް ނެސެޓަށް ހުށަހަޅާފައެއް ނުވެއެވެ.

މި ޤާނޫނު ފާސްވެއްޖެނަމަ އަނެއްކާ ވެސް ބައިނަލްއަޤްވާމީ ޤާނޫންތަކާއި ޚިލާފަށް އިސްރާއީލުން ފަލަސްތީނުގެ އިތުރު ސަރަހައްދަކަށް ވެރިވެގަތީއެވެ. މިސަރަހައްދުގައި މިހާރުވެސް 140،000 ޔަހޫދީން ދިރިއުޅެއެވެ.

އިސްރާއީލުން ޤުދުސްއަށް އަތްގަދަ ކުރުމަށް ކުރާ މަސައްކަތުގައި މިހާރު މަސައްކަތް ކުރަމުން ދަނީ 3 ދީނުގެ މީހުން ދިރިއުޅެމުންދާ އެރަށުގައި ޔަހޫދީންގެ އާބާދީ އިތުރު ކުރުމަށެވެ. ޔަހޫދީންގެ އާބާދީ ބޮޑުކުރުމަށް ކުރަމުންދާ މަސައްކަތުގައި އިރުމަތީ ޤުދުސްގައި ދިރިއުޅެމުންދާ މުސްލިމުން ވަރަށް ބޮޑަށް ދަނީ އެކަހެރި ކުރަމުންނެވެ.

1967ވަނަ އަހަރު އިސްރާއީލުން އިރުމަތީ ޤުދުސްއަށް ބައިނަލްއަޤްވާމީ ޤާނޫނުތަކައި ޚިލާފަށް ވެރިވެގަތްފަހުން މިހާރު އެރަށުގެ 86 އިންސައްތަ ކޮންޓްރޯލްކުރަނީ ޔަހޫދީންނެވެ.

ޤުދުސްއަކީ އިސްރާއީލުގެ ވެރިރަށުގެ ގޮތުގައި އެމެރިކާއިން ބަލައިގަތުމާއި ދެކޮޅަށް ދުނިޔޭގެ ޤައުމުތަކުން އަޑުއުފުލަމުންދާއިރު، އިސްރާއީލާއި ދެކޮޅަށް ފަލަސްތީނުގައިވެސް ބޮޑެތި މުޒާހަރާތައް ކުރަމުންދެއެވެ. އަދި މުޒާހަރާކުރާ މީހުންނާއި ޔަހޫދީ ސިފައިން ކުރަމަތިލަމުންދާއިރު، ޔަހޫދީ ސިފައިން ވަނީ ފަލަސްތީނުގެ 15 މީހަކު މިކުރިމަތިލުންތަކުގައި ޝަހީދު ކޮށްލާފައެވެ.