ޒިމްބާބްވޭގެ ވެރިކަން ކުރާ ޕާޓީގެ ނާއިބު ރައީސަކަށް އެގައުމުގެ ކުރީގެ ލީޑަރު ރޮބަޓް މުގާބޭގެ ވެރިކަން ވައްޓާލި ބަޣާވާތުގައި އިސްކޮށް ހަރަކާތްތެރިވި އަސްކަރިއްޔާގެ ލީޑަރު ކޮންސްޓެންޓިނޯ ޗިވެންގާ ހަމަޖައްސައިފި އެވެ.

ވެރިކަން ކުރާ ޒާނޫ-ޕީއެފް ޕާޓީގެ ދެ ނާއިބު ރައީސުންގެ ތެރެއިން އެއް ނާއިބު ރައީސްގެ މަގާމަށް ރިޓަޔަޑް ޖެނެރަލް ޗިވެންގާ ހަމަޖެއްސެވުމަށް ރައީސް އެމަސަން ނަންގަގްވާ ހަމަޖެއްސެވިކަން އިޢުލާން ކުރެއްވީ ރައީސްގެ ޕްރެސް ސެކްރެޓަރީ ޖޯޖް ޗަރަމްބާ ނެރުއްވި ބަޔާނެއްގައެވެ.

މީގެ އިތުރުން އެޕާޓީގެ ދެވަނަ ނާއިބު ރައީސްގެ މަގާމަށް ހަމަޖައްސަވާފައިވަނީ ގިނަ ދުވަސްތަކެއް ވަންދެން ސްޓޭޓް ސެކިއުރިޓީ މިނިސްޓަރުގެ މަގާމުގައި ހުންނެވި ކެމްބޯ މޮހާޑީ އެވެ.

ވެރިކަން ކުރާ ޒާނޫ-ޕީއެފްގެ ދެ ނާއިބު ރައީސުލް އައްޔަން ކުރުމަކީ، ޒިމްބާބްވޭގެ ނާއިބު ރައީސްގެ މަގާމަށް މީހަކު އައްޔަން ކުރުމުގެ ފުރަތަމަ މަރުހަލާއެވެ. ރިޕޯޓްތައް ބުނާ ގޮތުން، ޒިމްމާބްވޭގެ ނާއިބު ރައީސަކަށް ޗިވެންގާ ހަމަޖެއްސެވުމަށް ރައީސް ނަންގަގްވާ ވަނީ ނިންމަވާފައެވެ.

ޒިމްމާބްވޭގެ ވެރިކަމަށް ކުރީގެ ނާއިބު ރައީސް އެމަސަން ނަންގަގްވާ އައްޔަން ކޮށްފައިވަނީ، އެގައުމުގައި 37 އަހަރުގެ ދިގު ވެރިކަމެއް ކުރެއްވި ރޮބަޓް މުގާބޭ ވެރިކަން އަސްކަރިއްޔާގެ ބަޣާވާތަކުން ވައްޓާލުމަށް ފަހުގައެވެ.

މުގާބޭގެ ނާއިބު ރައީސްގެ ގޮތުގައި ހުންނެވި އެމަސަން ނަންގަގްވާ އެމަގާމުން ވަކި ކުރެއްވުމަށް ފަހު، ވެރިކަން ކުރާ ޕާޓީގެ ތެރޭގައި އުފެދުނު ޚިޔާލުތަފާތުވުންތަކާއި ގުޅިގެން އަސްކަރިއްޔާ އިން އެގައުމުގެ ވެރިކަމުގެ ބާރުތައް ނެގުމަށް ފަހު، މުގާބޭ ވެރިކަމުން އިސްތިއުފާ ދެއްވުމަށް ހުށަހެޅި އެވެ. އިސްތިއުފާ ދެއްވުމަށް މުގާބޭ ފުރަތަމަ ދެކޮޅު ހެއްދެވުމަށް ފަހު، އެންމެ ފަހުން ވެރިކަމުން އިސްތިއުފާ ދެއްވީ ގާނޫނު ހަދާ މަޖިލިސް މެދުވެރިކޮށް މުގާބޭ ވެރިކަމުން ދުރުކުރުމުގެ މަސައްކަތް ފެށުމާއި އެކުގައެވެ.

މުގާބޭ ވެރިކަމުން އިސްތިއުފާ ދެއްވުމަށް ފަހު ވެރިކަމުގެ ހުވާ ކުރެއްވި ނަންގަގްވާ ވަނީ، ކެބިނެޓާއި ސަރުކާރުގެ އިސް މަގާމުތަކަށް އަސްކަރިއްޔާގެ އިސް ފަރާތްތަކެއް އައްޔަން ކުރައްވާފައެވެ.

މިމަހުގެ ކުރީކޮޅު ނަންގަގްވާ ވަނީ، އަސްކަރިއްޔާގެ އިސް ދެ އޮފިޝަލަށް ވަޒީރުކަން ދެއްވާފައެވެ.

ނަންގަގްވާ އަށް އެހީތެރިންގެ ގޮތުގައި ވެރިކަން ކުރާ ޒާނޫ-ޕީއެފް ޕާޓީގެ ދެ ނާއިބު ރައީސުންނަށް އަސްކަރިއްޔާގެ އިސް އޮފިޝަލުން އައްޔަން ކުރެއްވިއިރު، އޭގެ ތެރެއިން އެއް ނާއިބު ރައީސް ކަމަށްވާ ޖެނެރަލް ޗިވެންގާ އަސްކަރިއްޔާ އިން ރިޓަޔަރ ކޮށްފައިވަނީ މި ހަފްތާގެ ތެރޭގައެވެ.

ޗިވެންގާ އަކީ ނޮވެމްބަރު މަހުގެ 15 ވަނަ ދުވަހު ޒިމްބާބްވޭގެ ރައީސް މުގާބޭގެ ވެރިކަމުގެ ބާރުތައް އަސްކަރިއްޔާ އިން ނެންގުވުމުގައި އެންމެ އިސްކޮށް ހަރަކާތްތެރިވި ފަރާތެވެ.

ޒިމްބާބްވޭގެ ރައީސް ކަމުގެ މަގާމުގެ ހުވާ ނަންގަގްވާ ކުރައްވާފައިވަނީ ނޮވެމްބަރު މަހުގެ 24 ވަނަ ދުވަހު އެވެ.