ކްރިކެޓް ކުޅުންތެރިޔާ ވިރާތު ކޯލީ އާއި ބޮލީވުޑްގެ ތަރި އަނުޝްކާ ޝަރުމާގެ ކައިވެނީގެ އުފަލުގައި ދިއްލީގައި ބޭއްވި ޕާޓީއަށް އިންޑިއާގެ ބޮޑުވަޒީރު ނަރެންދުރަ މޯދީ ވަނީ ވަޑައިގެންފައެވެ.
ބުރާސްފަތިދުވަހުގެ ރޭ އިންޑިއާގެ ދިއްލީގެ ތާޖް ޑިޕްލޮމެޓިކް އެންކްލޭވްގައި ހުންނަ ދުރްބާ ހޯލްގައި ބޭއްވި ކައިވެނީގެ ޕާޓީއަށް މޯދީ ވަޑައިގެންނެވި އިރު ހަދިޔާއަކަށް ވިރާތާއި އަނުޝްކާއަށް ދެއްވީ ރަތްކުލައިގެ ދެ ފިނިފެންމަލެވެ.
ޕާޓީއަށް ދައުވަތު އެރުވުމަށް ވިރާތާއި އަނުޝްކާ މޯދީ އަރިހަށް ދިޔައީ ބުދަދުވަހުގައެވެ. ކައިވެނީގެ ހަފްލާއަށް ވަޑައިގަތުމަށް ފަހު މޯދީ ވަނީ ވިރާތާއި އަނުޝްކާގެ އާއިލާއާ އެކު ފޮޓޯ ނަންގަވާފައެވެ.
ވިރާތާއި އަނުޝްކާ މި ޕާޓީގައި ވެސް ލާފައިވާ ހެދުމަކީ އިޓަލީގައި ބޭއްވި ކުޑަ ހަފްލާގައި ވެސް ހެދުން ޑިޒައިންކުރި އިންޑިއާގެ މަޝްހޫރު ޑިޒައިނަރ ސަބްޔަސާޗީ މުކްރަޖީ ޑިޒައިންކޮށް ފަހާފައިވާ ހެދުމެވެ.
އަނުޝްކާ ލާފައި ވަނީ ސަބްޔަސާޗީ ބެނަރާސީގެ ރަތްކުލައިގެ ސާޅިއެވެ. ވިރާތު ލާފައި ވަނީ ބަންދްގަލަ ސިލްކުގެ ކަޅު ކުރުތާއެކެވެ. ކުރުތާގެ މަތިން މުށި ކުލައިގެ ޕަޝްމީރާ ޝޯލްއެއް ވަނީ އަޅާފައެވެ.
ދިއްލީގެ ޕާޓީ ހާއްސަކޮށްފައި ވަނީ ދެ ފަރާތުގެ އާއިލާ ގާތް ބައެއް ރަހްމަތްތެރިންނާއިސިޔާސީ ފަރާތްތަކަށެވެ. ވިރާތާއި އަނުޝްކާގެ ކައިވެނީގެ އުފަލުގައި ބާއްވާ ދެވަނަ ޕާޓީ ބާއްވާނީ މިމަހުގެ 26 ވަނަ ދުވަހުއެވެ. އެ ޕާޓީ ބާއްވާނީ އިންޑިއާގެ މުމްބާއީގައެވެ. އެ ޕާޓީއަށް ދައުވަތު އަރުވާނީ ކްރިކެޓް ކުޅުންތެރިންނަށާއި ބޮލީވުޑްގެ ފަންނާނުންނަށް ކަމަށް ޚަބަރުތައް ބުނެއެވެ.
އެޕާޓީއަށް ދާނެ ކަމަށް ބެލެވޭ ބައެއް ފަރާތްތަކުގެ ތެރޭގައި ޝާހުރުކް ޚާން، ސަލްމާން ޚާން، އާމިރު ޚާން، ސަޗިން ޓެންޑުލްކާ، ޔޫވްރާޖް ސިންގް، ކަރަންޖޯހަރު، ކެޓްރީނާ ކައިފް އަދި ރާނީ މުކްރަޖީ ފާހަގަކޮށްލެވެއެވެ. މީގެ އިތުރުން ވެސް ބޮލީވުޑާއި ކްރިކެޓް ދުނިޔޭގެ އެހާރާއި މިހާރުގެ އެތައް ބަޔަކަށް ދައުވަތު ދީފައިވާ ކަމަށް ޚަބަރުތައް ބުނެއެވެ.
ވިރާތާއި އަނުޝްކާ ކައިވެނިކޮށްފައި ވަނީ މިމަހުގެ 11 ވަނަ ދުވަހުގައި އިޓަލީގައެވެ. އިޓަލީގައި ބޭއްވި ކައިވެނީގެ ހަފްލާއަށް ގޮސްފައިވަނީ ވިރާތާއި އަނުޝްކާގެ އާއިލާގެ މީހުންނާއި އެންމެ ގާތް ފަރާތްތަކެވެ.
