އަންނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވާނެކަން އިއުލާނުކުރެއްވުމުން މިސްރުގެ އަސްކަރިއްޔާގެ ކާނަލަކު ހަ އަހަރަށް ޖަލަށްލުމަށް ހުކުމްކޮށްފި ކަމަށް އޭނާގެ ވަކީލާ ހަވާލާދީ އެ ގައުމުގެ މީޑިޔާތަކުން ބުނެފިއެވެ.
އަހުމަދު ކޮންސޯވާ އަށް އަންގާރަ ދުވަހު ހަ އަހަރުގެ ޖަލުހު ކުމެއް އިއްވާފައިވަނީ "އަސްކަރިއްޔާގެ އަމުރާ ޚިލާފަށް ސިޔާސީ ޚިޔާލު ފާޅުކުރުމުން" ކަމަށް އޭނާގެ ވަކީލު އަސަދު ހައިކަލްއާ ހަވާލާދީ އޭއެފްޕީއިން ބުނެފައިވެއެވެ.
އަހުމަދު ކޮންސޯވާ މިދިޔަމަހުގެ ފަހުކޮޅު އާއްމުކޮށްފައިވާ 22 މިނެޓްގެ ވީޑިއޯއެއްގައި ވަނީ ރައީސް އަބްދުލް ފައްތާހު އަލް ސީސީއާ ވާދަކުރެއްވުމަށް ނިންމަވާފައިވާކަމަށެވެ.
މި ވީޑިއޯއާއެކު އޭނާ ވަނީ ތަހުގީގަށް ބަންދުކޮށް ފަނަރަ ދުވަހު ބަންދުގައި ބަހައްޓާފައެވެ.
ކޮންސޯވާގެ ބަންދާ ގުޅިގެން އޭނާގެ ވަކީލު ހައިކަލް, މިސްރުގެ މީޑިޔާތަކުގައި ބުނެފައިވަނީ ކޮންސޯވާގެ މައްޗަށް ކޮށްފައިވާ ދައުވާތަކުގެ ތެރޭގައި އަސްކަރިއްޔާގެ އުސޫލާ ޚިލާފްވުމާއި ސިޔާސީ ޚިޔާލު ފާޅުކޮށް ވީޑިއޯ ނެރުން ހިމެނެއެވެ.
އަސްކަރިއްޔާގެ މުވައްޒަފެއްގެ ގޮތުގައި ހުރެ މިދިޔަ މަހު އާއްމުކުރި ވީޑިއޯގައި ކޮސޯވާ ބުނެފައިވަނީ" ފަޚުރުވެރިކަމާއެކު" އޭނާގެ ކެނޑިޑެސީ އިއުލާނުކުރާކަމަށެވެ.
"އަޅުގަނޑު ގަސްތުކޮށްފިން މިހާރު އެޅިފައިމިވާ ސިޔާސީ މަރުތަޅު ނައްޓާލަން," އޭނާ ވިދާޅުވެއެވެ.
މީގެ އިތުރުން އެ ވީޑިއޯގައި އޭނާ ވަނީ 2014 ވަނަ އަހަރުގެ މާޗް މަހުން ފެށިގެން އަސްކަރިއްޔާއިން އިސްތިއުފާދިނުމަށް ހުށަހަޅާފައިވާ ކަމަށާއި ނަމަވެސް އޭނާގެ އިސްތިއުފާ ގަބޫލުނުކުރިކަމަށް ބުނެފައެވެ.
މިސްރުގައި އަންނަ އަހަރުގެ މާޗް ނުވަތަ އޭޕްރީލްގައި ރިޔާސީ އިންތިޚާބު ބާއްވާންޖެހޭނެއެވެ.
