ގުދުސްއަކީ އިސްރާއީލުގެ ވެރިރަށް ކަމަށް ރަސްމީ ގޮތުން ބަލައިގަތުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމެވުމާ އދ. އިން ދެކޮޅުކަން ކަނޑައެޅުމަށް، މިސްރުން ސަލާމަތީ މަޖިލީހަށް ހުށަހެޅި ގަރާރު އެމެރިކާއިން ވީޓޯކުރުމުން ތުރުކީން ކަންބޮޑުވުން ފާޅުކޮށްފިއެވެ.

ތުރުކީގެ ފޮރިން މިނިސްޓްރީން ނެރުނު ބަޔާނެއްގައި ބުނީ އެމެރިކާ ފިޔަވައި ސަލާމަތީ މަޖިލީހުގައި ހިމެނޭ އަނެއް ހަތަރު ގައުމު ކަމަށްވާ އިނގިރޭސި ވިލާތް، ޗައިނާ، ފަރަންސޭސިވިލާތް އަދި ރަޝިއާއިން ވަނީ ގަރާރު ފާސްކުރަން ވޯޓު ދީފައިކަމަށެވެ. އެމެރިކާ އިން ގާރާރު ވީޓޯކުރުމުން ދޭހަވަނީ އެ ގައުމުން ގުދުސް އަކީ އިސްރާއީލުގެ ވެރިރަށް ކަމަށް ރަސްމީކޮށް ބަލައިގަތުމަށް ނިންމި ނިންމުމަކީ ބާތިލް ނިންމެވުމެއް ކަމަށްވެސް އެ ބަޔާނުގައި ވަނީ ބުނެފައެވެ.

ސަލާމަތީ މަޖިލީހުގެ ދާއިމީ ނޫން އަނެއް 10 ގައުމުންވެސް ވަނީ ގަރާރާ އެއްކޮޅަށް ވޯޓް ދީފައެވެ. އޭގެ ތެރޭގައި އެމެރިކާގެ ގާތް އެކުވެރިން ކަމުގައި ބެލެވޭ އިޓަލީއާއި، ޖަޕާނާއި، ޔޫކްރޭންވެސް ހިމެނެއެވެ.

ގަރާރު ވީޓޯ ކުރުމަށްފަހު ސަލާމަތީ މަޖިލީހުގައި ވާހަކަފުޅު ދައްކަވަމުން އެމެރިކާއިން އދ.އަށް ކަނޑައަޅާފައި ހުންނަވާ އެމްބަސެޑަރު ނިކީ ހޭލޭ ވިދާޅުވީ، އެމެރިކާގެ އެމްބަސީތައް ގާއިމްކުރާންވީ ތަންތަން އެއްވެސް ގައުމަކުން އެމެރިކާއަށް ކިޔައިދޭކަށް ނުޖެހޭނޭ ކަމަށާއި، ގުދުސްގެ މައްސަލާގައި ސަލާމަތީ މަޖިލީހަށް ހުށަހެޅި ގަރާރަކީ އެމެރިކާއަށް ކުރި ފުރައްސާރައެއް ކަމަށެވެ.

އެމެރިކާގެ ޒަމާންވީ ސިޔާސަތު ދޫކޮށްލައްވައި އަދި ބައިނަލްއަޤްވާމީ މުޖުތަމައުން އަބަދުވެސް ގަބޫލުކުރަމުން އަންނަ ހަމަތަކާ ޚިލާފަށް ގުދުސްއަކީ އިސްރާއީލްގެ ވެރިރަށް ކަމަށް ބަލައިގަތުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމަވާފައި ވަނީ ޑިސެމްބަރުމަހުގެ 6 ވަނަ ދުވަހުއެވެ.