މިހާރު އެޗްބީއޯއިން ދައްކަމުންދާ ކުއެންޓިކޯގެ ތިންވަނަ ސީޒަން މެދުކަނޑާލުމަށް ފަހު ޕްރިޔަންކާ ވަރަށް އަވަހަށް އިންޑިއާއަށް އަންނާނެއެވެ. އޭނާގެ އިންސްޓްގްރާމްގައި ވަނީ އެކަން އިއުލާންކޮށްފައެވެ.
އިންޑިއާގެ ނޫސްތަކުގައި ބުނެފައިވަނީ ޕްރިޔަންކާ ޗޮޕްރާގެ ފަސް މިނެޓްގެ ޑާންސަކަށް ފަސް ކުރޯޑް ރުޕީސް ހުށައަޅާފައިވާ ކަމަށެވެ.
މިމަހުގެ 19 ވަނަ ދުވަހު ބާއްވަން ހަމަޖެހިފައިވާ ޒީ ސިނަމާ އެވޯޑް ޝޯ ގެ ޑާންސް އަކަށް ޕްރިޔަންކާ 5 ކުރޯޑް އިންޑިއަން ރުޕީސް ހުށައެޅިއިރު އެކަން ވަނީ އެވޯޑް އިންތިޒާމް ކުރާފަރާތްތަކުން ގަބޫލުކޮށްފައިކަމަށް އިންޑިއާގެ ނޫސްތަކުގައި ވަނީ ބުނެފައެވެ.
ހޮލީވުޑަށް ފިލްމު ކުޅެދޭން ފެށިފަހުން ޕްރިޔަންކާގެ މަގްބޫލުކަން ވަނީ އިތުރުވެފައެވެ. އޭނާ އަކީ މިހާރު ބޮލީވުޑްގެ އެންމެ އަގުބޮޑު ތަރިންގެ ތެރޭގައި ހިމެނޭ އެކެކެވެ. ރިޕޯޓުތައް ބުނާގޮތުގައި މިދިޔަ އަހަރު ނިއުޔޯކުގައި އޮތް އައިފާ އެވޯޑަށްވެސް ޕްރިޔަންކާ ވަނީ ބޮޑު އަގެއް ނަގާފައެވެ. ޕްރިޔަންކާގެ އިތުރުން ޒީ ސިނަމާ އެވޯޑް ޝޯގައި ޕާފޯމް ކުރާނީ ރަންވީރު ސިންހް، ޝާހިދު ކަޕޫރު، ކެޓްރީނާ ކައިފް، ސިދާތު މަލޯތުރާ، ޖެކުއިލިން ފެނާންޑޭޒް، ބޫމީ ޕެޑްނެކާ ކަމަށްވެސް ޚަބަރުތައް ބުނެއެވެ.
ހިންދީ ފިލްމު އިންޑަސްޓްރީއަށް ޚާއްސަ ކޮށްގެން 1998 ވަނަ އަހަރުން ފެށިގެން ދެމުން އަންނަ ޒީ ސިނަމާ އެވޯޑް މިފަހަރު އޮންނާނީ އިންޑިއާގެ މުމްބާއީގައެވެ.
މީގެ ކުރިން ޒީ ސިނަމާ އެވޯޑް ޝޯ ވަނީ ދުބާއި، ލަންޑަން މެލޭޝިއާ ، ސިންގަޕޫރު އަދި މަކާއޯގައި ބާއްވާފައެވެ.
