ތަފާތު ރަހަތަކެއް ހިމަނައިގެން، ގިނަ ލަވަތަކަކާއިއެކު، ހިޕްހޮޕް، ރެޕް ލަވަކިޔުންތެރިޔާ އެމިނެމްގެ އެންމެ ފަހުގެ އަލްބަމް "ރިވައިވަލް" ރިލީޒް ކޮށްފިއެވެ. 4 އަހަރަށްފަހު އެމިނެމް ނެރުނު މި އެލްޕީ ނެފައިވަނީ ޑިސެމްބަރ 15 ވަނަ ދުވަހުއެވެ. 

ޖުމްލަ 19 ޓްރެކް ހިމެނޭ، 77 މިނިޓް 39 ސިކުންތުގެ ދިގުމިނުގެ މި އެލްޕީގައި އެމިނެމް އާއި އެކު، އެޑް ޝީރާން، ބިޔޯންސޭ، ޕިންކް، އެލީޝިއާ ކީޒް، ޕްރެޝަރ، އަދި ސްކައިލަރ ގްރޭ ކިޔާފައިވާ ލަވަތައް ހިމަނާފައިވެއެވެ. މީގެ އިތުރުން ރޮކް ބޭންޑް، އެކްސް އެމްބެސެޑަރސް އާއި އެކު އެމިނެމް ކިޔާފައިވާ ލަވައެއްވެސް މި އަލްބަމްގައި ހިމެނެއެވެ.

ފަހަކަށް އައިސް އެމިނެމް ހިޕްހޮޕް އަދި ރެޕް ނޫން ޖޮންރާތަކުގެ ލަވަތައްވެސް ނެތެމުންދާއިރު، މި އެލްޕީގައިވެސް، ހިޕްހޮޕް އަދި ރެޕްގެ އިތުރުން، ރޮކް، ގޮސްޕެލް އަދި ޕޮޕް ޖޮންރާގެ ލަވަތައް ހިމެނެއެވެ.

އެމިނެމް މީގެ ކުރިން ބުނެފައިވަނީ "ރިވައިވަލް"ގެ މަސައްކަތް ފަށާފައިވަނީ މީގެ 18 މަސް ދުވަސް ކުރިން ކަމަށެވެ. އެމިނެމް ބުނެފައިވަނީ މި އެލްޕީގައި މަޝްހޫރު އެތައް ފަންނާނުންގެ އެހީތެރިކަމެއް އޭނާއަށް ލިބުނު ކަމަށެވެ. އެގޮތުން އިނގިރޭސި ވިލާތުގެ މަޝްހޫރު ލަވަކިޔުންތެރިޔާ އެޑް ޝީރާންގެ ވަރަށް ބޮޑު އެހީތެރިކަމެއް ލިބުނު ކަމަށް އެމިނެމް ވަނީ ބުނެފައެވެ.

މި އަލްބަމްގެ މަސައްކަތުގައި އެމިނެމްއަށް އުމުރުން 26 އަހަރުގެ މިއުޒީޝަން އެޑް ޝީރަންގެ އެހީތެރިކަން ލިބިފައިވާކަމަށް އެމިނެމް ބުނެފައިވާއިރު، މީގެ ކުރިން އެޑް ޝީރާން ބުނެފައި ވަނީ އޭނާ ލަވަ ކިޔަން ފެށީ އެމިނެމްގެ ސަބަބުން ކަމަށެވެ.

ރިވައިވަލް އަކީ އެމިނެމްގެ ނުވަވަނަ ސޯލޯ އަލްބަމެވެ. އެމިނެމްގެ އަލްބަމެއް އެންމެ ފަހުން ނެރެފައިވަނީ 2013 ވަނަ އަހަރުގައެވެ. އެއީ "ދަ މާޝަލް މެތަރޒް އެލްޕީ 2" އެވެ.

އެމިނެމްގެ އެންމެ ފުރަތަމަ އަލްބަމަކީ 1996 ވަނަ އަހަރު އޭނާ ނެރުނު "އިންފިނިޓް" އެވެ.