އިންޑިއަން ސިނަމާގައި އެންމެ ކާމިޔާބު އެކްޓަރުގެ ޓައިޓަލް މިއަހަރުވެސް ޝާހްރުކްޚާން އަށް ލިބިއްޖެ އެވެ.
އިންޓަރނެޓް މޫވީ ޑޭޓާ ބޭސް (އައިއެމްޑީބީ) އިން ހާމަކޮށްފައިވާގޮތުގައި އިންޑިޔާގެ ސިނަމާތަކުގައި އެންމެ މަޝްހޫރު ތަރި އަކީ އަދިވެސް ކިންގް ޚާންގެ ގޮތުގައި މަޝްހޫރު ޝާހް ރުކް ޚާން އެވެ. މިއަހަރުގެ ތެރޭގައި ޝާހްރުކްޚާންގެ ދެ ފިލްމެއް ވަނީ ނިކުމެފަ އެވެ. އެގޮތުން ފިލްމު "ރައީސް" އާއި "ޖަބް ހެރީ މެޓް ސޭޖަލް" ފިލްމާއި އެކު އައިއެމްޑީބީގެ ވިއުސް ލިސްޓުން އެތައް ދުވަހެއް ވަންދެން ޝާހްރުކްޚާން ޖާގަ ހޯދާފައިވެ އެވެ.
އައިއެމްޑީބީ އިން ވަނީ ބޮލީވުޑްގެ ފިލްމުތަކުގެ ސަޕޯޓަރުން އެންމެ ފާހަގަކޮށްފައިވާ 10 ސްޓާރުންގެ ނަން ހާމަކޮށްފަ އެވެ. އެގޮތުން ދެވަނައިގައި ހިމެނެނީ އާމިރު ޚާން އެވެ. ތިންވަނަ އަށް ސަލްމާން ޚާން ހިމެނޭ އިރު ސަލްމާން ޚާންގެ ޓިއުބްލައިޓަށް އާންމުންގެ މާބޮޑު ތަރުހީބެއް ލިބިފައެއް ނުވެ އެވެ. އެހެން ނަމަވެސް " ޓައިގާ ޒިންދާހޭ"ގެ ޓްރެއިލާ އާއި ލަވަތަކާއި އެކު އަނެއްކާވެސް އާންމުންގެ ބޮޑު ތަރުހީބެއް ސަލްމާން ޚާން އަށް އަންނަނީ އިތުުރުވަމުންނެވެ.
މި ލިސްޓުގެ ހަތަރު ވަނައިގައި ހިމެނެނީ އިންޑިޔާގެ ޓެމިލް އަދި ޓެލުގޫ ފިލްމުތަކުން މަޝްހޫރުކަން ހޯދާފައިވާ ތަމަންނާ ބާޓްޔާ އެވެ. މި ލިސްޓުގެ ފަސް ވަނައިގައި އިރްފާން ޚާން ހިނޭ އިރު ލިސްޓުގެ ހަ ވަނައިގައި ހިމެނެނީ ޕްރަބާސް އެވެ. ޕްރަބާސް އަކީ ޓެލުގޫ ފިލްމުތަކުން މަޝްހޫރުކަން ހޯދާފައިވާ ތަރި އެކެވެ. މި ލިސްޓުގެ ހަތް ވަނައިގައި ހިމެނެނީ އަނުކްޝާ ޝަރުމާ އެވެ. ރިތިކް ރޯޝަން އާއި ކެޓްރީނާ ކައިފް ވެސް އިންޑިޔާގެ އެންމެ މަޝްހޫރު 10 ސްޓާރުންގެ ލިސްޓުގައި ހިމެނެ އެވެ.
.
