ފަލަސްތީނަކީ މިނިވަން ދައުލަތެއްކަމަށް ބަލައިގަނެ، އިރުމަތީ ގުދުސްއަކީ ފަލަސްތީނުގެ ވެރިރަށުގެ ގޮތުގައި ބަލައިގަތުމަށް ބައިނަލްއަގްވާމީ މުޖުތަމައުއަށް އޯގަނައިޒޭޝަން އޮފް އިސްލާމިކް ކޯޕަރޭޝަނުން ގޮވާލައިފިއެވެ

އެ ޖަމާއަތުން މިހެން ގޮވާލާފައިވަނީ ގުދުސްއަކީ އިޒްރާއިލްގެ ވެރިރަށުގެ ގޮތުގައި ބަލައިގަންނަން އެމެރިކާގެ ރައީސް ޑޮނަލްޑް ޓްރަމްޕް ނިންމެވުމާއި ގުޅިގެން، ތުރުކީގައި މިހާރު ބާއްވަމުންދާ (އޯއައިސީ)ގެ ހާއްސަ އާންމު ބައްދަލުވުމުގައެވެ.

އިސްތަންބޫލްގައި ހުންނަ ލުތްފީ ކިރްދާރް ކޮންގްރެސް ސެންޓަރުގައި ކުރިޔަށްދާ މިބައްދަލުވުމަކީ ތުރުކީގެ ރައީސް ރަޖަބް ތައްޔިބް އޮރުދުޣާންގެ ގޮވާލެއްވުމަކަށް ބޭއްވޭ ބައްދަލުވުމެކެވެ.

މުސްލިމް ގައުމުތަކުގެ މައްޗަށްއެކުލެވޭ މި ޖަމާއަތުންވަނީ "ފަލަސްތީނަކީ ދައުލަތެއްކަމަށް ބަލައިގަނެ، އިރުމަތީ ގުދުސްއަކީ އެ ދައުލަތުގެ ވެރިރަށް ކަމަށް" ކަނޑައަޅާފައެވެ.

ޖުމްލަ 57 ގައުމުގެ މައްޗަށް އެކުލެވޭ މި ޖަމާއަތުންވަނީ ސުލްހައަށްޓަކައި ދެ ދައުލަތް އުފެއްދުމަށް ތާއީދުކުރާކަންވެސް ހާމަކޮށްފައެވެ.

މީގެ އިތުރުން އެ ޖަމާއަތުންވަނީ އިސްރާއީލުން ފަލަސްތީނު ހިސާރުކޮށްފައި އޮންނަ އޮތުން ނައްތާލަ ދިނުމަށްވެސް ގޮވާލާފައެވެ.

ގުދުސްއަކީ އިސްރާއިލުގެ ވެރިރަށްކަމަށް އެމެރިކާއިން ބަލައިގަތުމާއެކު މެދުއިރުމަތީގައިވަނީ ހަމަނުޖެހުން ފެށިފައެވެ. ފަލަސްތީނުގެ ރައްޔިތުން ގެންދަނީ އެ ނިންމުމާއި ދެކޮޅަށް މުޒާހަރާ ކުރަމުންނެވެ. އަދި ފަލަސްތީނުގެ ހަމާސް ޖަމާއަތުންވަނީ ތިންވަނަ އިންތިފާޟާއަކަށް ގޮވާލާފައެވެ. ފަތަހަ ޖަމާޢަތުންވެސް ވަނީ އިންތިފާޟާއަކަށް ތެދުވުމަށް ގޮވާލާފައެވެ. އިސްރާއީލުން ފަލަސްތީނުގެ ބިންތަކަށް ވެރިވެގަތުމާ ދެކޮޅަށް ފުރަތަމަ އިންތިފާޟާއަށް ފަލަސްތީނުން ނިކުތީ 1987 ވަނަ އަހަރުން 1993 ވަނަ އަހަރާ ދެމެދުއެވެ. އަދި ދެވަނަ އިންތިފާޟާއަށް ނިކުތީ 2000 ވަނަ އަހަރާއި 2005 ވަނަ އަހަރާ ދެމެދުގައެވެ.