ފަލަސްތީނަކީ މުސްލިމުންގެ ފުރަތަމަ ޤިބުލަ އަދި މުސްލިމުންގެ ތިންވަނަޔަށް އެންމެ މުޤައްދަސް ތަންކަމަށްވާ އަލްއަޤްޞާ ހުންނަ ބިމެވެ. އިސްލާމުންގެ ވެރިކަމެއް ފަލަސްތީނުގައި އޮތް ނަމަވެސް، ފާއިތުވި ޒަމާންތަކުގައި އެތައް ރަސްކަލުންނަކާއި އެތައް ހަޟާރާތްތަކަކުން ފަލަސްތީނުގެ މައްޗަށް ވެރިވެ، އެތަނުގައި ވެރިކަން ކުރިއެވެ. އެހެން ނަމަވެސް، ޒަޔަނިސްޓުން ދައުވާކުރާ ގޮތަށް ފަލަސްތީނަކީ ތިމަންނަމެންގެ ބިމެކޭ އެއްވެސް ބަޔަކު ނުބުނެއެވެ.
ފަލަސްތީނަކީ ޔަހޫދީންގެ ބިމެކޭ ބުނާ ބުނުމަކީ ސީދާ ޔަހޫދީންގެ ބަހެއް ނޫނެވެ. އެއީ ޒަޔަނިސްޓުންގެ ޕްރޮޕެގެންޑާއެކެވެ. ޔަހުދީންނަށް ފަލަސްތީނު ލިބެންވީ އެއްވެސް ސަބަބެއް ނެތެވެ. އެތަނަކީ މުސްލިމުންނާއި ނަޞާރާއިން ވެސް މުޤައްދަސްތަނެއްގެ ގޮތުގައި ބަލާ ބިމެކެވެ. އެހެން ނަމަވެސް އެބިމަށް ވެރިވެގަނެ، އެބިމުގައި މުސްލިމުންނާއި ނަޞާރާއިންގެ ބާރު ކަނޑުވާލައި، ޔަހޫދީންގެ ބާރު ފެތުރުމަށް މަސައްކަތްކުރަނީ ޔަޒަނިސްޓިނުންނެވެ. ޒަޔަނިސްޓުންނަކީ ހަމައެކަނި ޔަހޫދީންނެއް ނޫނެވެ. ނަޞާރާ އަދި އިސްލާމީ ޒަޔަނިސްޓުންވެސް އުޅެެއެވެ. އިސްރާއީލަށް މިހާރު ވާގިވެރިއެވަނީ ޒަޔަނިސްޓު މުސްލިމުންނައި ޒަޔަނިސްޓް ނަޞާރާއިންނެވެ.
ފަލަސްތީނުގެ މައްޗަށް ރޯމަން ދައުލަތާއި ފާރިސީން ވެސް ވެރިކަންކުރިއެވެ. އެހެންކަމުން މިއަދު އިޓަލީގެ ކުރީގެ ބޮޑުވަަޒީރު ސިލްވިއޯ ބަރުލުސްކޯނީ އާއި އީރާނުގެ ކުރީގެ ރައީސް މަހުމޫދު އަހްމަދީނަޖާދުވެސް ފަލަސްތީނުގެ މިލްކުވެރިކަމުގެ މައްޗަށް ދައުވާ ކުރަައްވަންވީއެވެ. ބަރުލުސްކޯނީ ރޯމަން ދައުލަތުގެ ނަމުގައެވެ. އަހުމަދީނަޖާދު ފާރިސީ ދައުލަތުގެ ނަމުގައެވެ. މިއީ އެމެރިކާގެ ކޮލަމްބިއާ ޔުނިވަރސިޓީގެ ޕްރޮފެސަރެއް ކަމަށްވާ ޙާމިދު ދަބާޝީ މިކަމުގައި ހުރި ޖޯކުކަން ކިޔައިދެއްވި ގޮތެވެ.
ބާބިލުގެ ރަސްކަލުންނާއި، ފާރިސީންނާއި، ރޯމަނުންނާއި، ޞަލީބީ ހަނގުރާމައިގެ ތެރޭގައި ނަޞާރާ ރަސްކަލުންނާއި، އުސްމާނީ ޚިލާފަތުގެ ރަސްކަލުންނާއި އަދި ފަހުން އިނގިރޭސި ދައުލަތުން ވެސް ފަލަސްތީނުގެ މައްޗަށް ވެރިކަންކުރިއެވެ. ފަލަސްތީނުގެ ބިމަކީ ޔަހޫދީންގެ ބިމެއް ކަމަށް ޒަޔަނިސްޓުން ބުނާ ބުނުމާއި އެއްގޮތަށް މިޤައުމުތަކަށް ވެސް ފަލަސްތީނުގެ މިލްކުވެރިކަމަށް ދައުވާކުރުމުގެ ފުރުސަތު އެބައޮތެވެ. އެހެން ނަަމަވެސް އެޤައުމުތަކުން ފަލަސްތީނުގެ މިނިވަން ކަމަށް ދައުވާ ނުކުރަނީ އެބިމަކީ އެ ޤައުމުތަކުގެ ބިމަކަށް ނުވާތީއެވެ.
ފަލަސްތީނުގެ ބިމަށް ޒަޔަނިސްޓުން ވެރިވެގަތީ އެމީހުންނަށް އދ އިން ކަނޑައަޅައިދިން އިން ފަހަނައަޅައި، ފަލަސްތީނުގެ ބިންތައް ހިފަމުން އެދާ އުޞޫލުންނެވެ. އެއީ އެމީހުންގެ ބިމެއް ނޫނެވެ. ހަމަ ވެރިވެގަނެ، އެމީހުންގެ ބިމެއް ކަމަށް ދައުވާކުރަނީއެވެ.
ދަބާޝީ އިސްރާއީލުގެ ކުރިމަގު ސިފަކުރައްވަނީ މިހެންނެވެ. "ޔަހޫދީންނަކަށް އިސްރާއީލަކަށް ވެރިވެއެއް ނުގަނެވޭނެއެވެ. އެމީހުންނަށް ވެސް ޖެހޭނީ ފަލަސްތީނުގެ މައްޗަށް ވެރިކަން ކުރި އެހެން މީހުންނަށް ޖެހުނު ހާލެވެ. އެމީހުން ނިމިދާނީ ތާރީޚުގެ ޑަސްބިނުގައެވެ."
ޤުދުސް އޮންނާނީ ފަލަސްތީނުގެ ވެރިރަށުގެ ގޮތުގައެވެ. އެކަން އަބަދުވެސް އޮތީ އެހެންނެވެ. ފަލަސްތީނުގެ ބިމުގައި މުސްލިމުންނާއި، ނަޞާރާއިންނާއި ޔަހޫދީން ދިރިއުޅޭނެއެވެ. ޒަޔަނިސްޓުންނަށް ފަލަސްތީނުގެ މައްޗަށް ވެރިވެގެން ތިބެވޭނީ ވަގުތީ ގޮތުންނެވެ.
