އެންޖެލީނާ ޖޯލީއަށް ވުމަށް އީރާނުގެ އަންހެނަކު 50 އޮޕަރޭޝަން ހެދި ވާހަކައަކީ މިހާރު ވަރަށް މަޝްހޫރު ވާހަކައެކެވެ.

އީރާނުގެ އަންހެނެއް ކަމަށްވާ ސަހަރު ތަބަރު ވަނީ އެންޖެލީނާއަށް ވުމަށްޓަކައި 50 އޮޕަރޭޝަންކުރި ކަމަށް މިދިޔަ ހަފްތާގެ ތެރޭގައި ބުނެފައެވެ. އެހެން ނަމަވެސް އެއީ ފޭކެއް ކަމަށާއި އެންޖެލީނާއަށް ވުމަށް އޭނާ އެއްވެސް އޮޕަރޭޝަނެއް ކޮށްފައި ނުވާ ކަމަށް މިހާރު ވަނީ ބުނެފައެވެ.

ސަހަރު ބުނީ އޭނާގެ ފޮޓޯތަކަކީ ފޮޓޯޝޮޕް ކޮށްފައިވާ ފޮޓޯތަކެއް ކަމަށެވެ. އޭގައި އެއްވެސް އަސްލެއް ނެތް ކަމަށް ސަހަރު  ވަނީ ބުނެފައެވެ. އޭނާ ވަނީ ވަނީ އެންޖެލީނާ ޖޯލީއަށް ވުމަށްޓަކައި 50 އޮޕަރޭޝަން ކޮށްފައިވާ ކަމަށް ބުނެ އިންސްޓަގްރާމަށް ވެސް ފޮޓޯތަކެއް ލާފައެވެ. އެފޮޓޯތަކަށް ލިބުނު ކޮމެންޓްތަކުގެ ތެރޭގައި އޭނާ ފެންނަނީ "ޒޮމްބީ" އެއްގޮތަށް ކަމަށް ބުނެ އެކި ފަރާތްތަކުން ވަނީ މަލާމާތްކޮށް ޖޯކު ޖަހާފައެވެ.

އޭރު ސަހަރު ބުނެފައި ވަނީ އޭނާއަކީ އެންޖެލީނާ ޖޯލީގެ އެންމެ ބޮޑު އެއް ފޭން ކަމަށާއި އެންޖެލީނާއާ އެއްވައްތަރުވުމަށް ކޮންމެ ފަދަ ކަމެއް ވެސް ކުރުމަށް އޭނާ ހުރީ ތައްޔާރަށް ކަމަށެވެ.

ސަހަރު ރަޝިއާގެ ނޫހަކަށް ދިން އިންޓަވިއުއެއްގައި ބުނީ އެފޮޓޯތައް ފޮޓޯޝޮޕް ކުރުމުން އޭނާ އާއި އެންޖެލީނާ ޖޯލީއާ ދެމީހުންގެ ކޮންމެވެސް ވަރެއްގެ އެއްވައްތަރުކަމެއް ހުންނަ ކަމަށް އޭނާއަށް ގަބޫލުކުރެވޭ ކަމަށެވެ. އެހެން ނަމަވެސް އެންޖެލީނާ ޖޯލީއާ ވައްތަރު ކަމެއް ހުންނަ ކަމަށް ގަބޫލުކުރެވުމުން އަމިއްލަ ނަފްސަށް ހިނި އަންނަ ކަމަށް ސަހަރު ބުންޏެވެ.