އެންޖެލީނާ ޖޯލީއަށް ވުމަށް އީރާނުގެ އަންހެނަކު 50 އޮޕަރޭޝަން ކޮށްފިއެވެ.
އީރާނުގެ ރައްޔިތެއް ކަމަށްވާ އުމުރުން 22 އަހަރުގެ ސަހަރު ތަބަރު ވަނީ އޭނާގެ އޮޕަރޭޝަންތަކަށް ފަހު ސްނެޕްޗެޓާއި އިންސްޓާގްރާމަށް ފޮޓޯތައް ލާފައެވެ.
ބެލްޖިއަމްގެ މިޑިއާތަކުން ރިޕޯޓް ކޮށްފައިވާ ގޮތުގައި ސަހަރު ތަބަރު ވަނީ އެންޖެލީނާ ޖޯލީއާއި އެއްގޮތަށް ހުރުމަށް ތަފާތު އެކި އޮޕަރޭޝަން ކޮށްފައެވެ. އެންޖެލީނާގެ އޭނާގެ މޫނު ވައްތަރު ކުރުމަށް 50 އޮޕަރޭޝަން ކޮށްފައިވާ ކަމަށް އެ މީޑިއާއިން ވަނީ ރިޕޯޓު ކޮށްފައެވެ.
ސަހަރުގެ ފޮޓޯތަކަށް ކޮމެންޓް ކޮށްފައިވާ ބައެއް ފަރާތްތަކުން ބުނެފައި ވަނީ އޭނާ ހީވަނީ"ޒޮންބީ"އެއް ހެން ކަމަށެވެ. އޮޕަރޭޝަނަށް ފަހު އޭނާ ފެންނަ ގޮތް އެހާވެސް ބިރުވެރިކަމަށް އެފަރާތްތަކުގެ ކޮމެންޓުގައި ވަނީ ބުނެފައެވެ. އަދި ބައެއް ކޮމެންޓްތަކުގައި އެންޖެލީނާ އާއި ކޮންމެވެސް ވަރަކަށް ވައްތަރު ކަމަށް ވަނީ ބުނެފައެވެ.
ސަހަރު ބުނެފައިވަނީ އޭނާއަކީ އެންޖެލީނާ ޖޯލީގެ އެންމެ ބޮޑު އެއް ފޭންކަމަށާއި އެންޖެލީނާއާއި އެއްވައްތަރުވުމަށް ކޮންމެ ފަދަ ކަމެއްވެސް ކުރުމަށް އޭނާ ހުރީ ތައްޔާރަށް ކަމަށެވެ.
ސަހަރުގެ މޫނަށް އައިސްފައިވާ ބަދަލަށް މީހުން އެއްޗެހި ކިޔަސް އޭނާގެ މާބޮޑު ފަރުވާލެއް ނެތެވެ. އޭނާ ދަނީ ކޮންމެ ދުވަހަކުހެން އިންސްޓަގްރާމަށާއި ސްނެޕްޗެޓަށް އޭނާގެ ފޮޓޯއާއި ސެލްފީ ނެގުމަށްފަހު ލަމުންނެވެ.
