އިންޑިއާގައި މައްސަލަ ބޮޑުވެފައިވާ ފިލްމު، ޕަދްމަވަތީގެ އާއި ގުޅިގެން އެ ފިލްމުގެ ޑައިރެކްޓަރ ސަންޖޭ ލީލާ ބަންސާލީ، އެ ޤައުމުގެ ޤާނޫނުހަދާ މަޖިލީހަށް ހާޒިރުކޮށްފިއެވެ.
ސަންޖޭ ލީލާ ބަންސާލީ ހާޒިރުކޮށްފައިވަނީ އިންޑިއާގެ ޤާނޫނުހަދާ މަޖިލީހުގެ އިންފޯމޭޝަން ޓެކްނޮލޮޖީ އާއި ބެހޭ ކޮމިޓީއަށެވެ. ބަންސާލީގެ އިތުރުން އިންޑިއާގެ ސެންސަރު ބޯޑުގެ އިސްވެރިޔާ، ޕްރަސޫން ޖޯޝީވެސް އެ ކޮމިޓީއަށް ހާޒިރު ކުރުމަށް ވަނީ ނިންމާފައެވެ.
މި މައްސަލައިގައި މަޖިލީހުގެ އިތުރު ކޮމިޓީއަކަށް ޕްރަސޫން ޖޯޝީ މިހާރުވެސް ހާޒިރުކޮށްފައިވާއިރު، އެ ކޮމިޓީގައި ޖޯޝީ ވިދާޅުވެފައިވަނީ ޕަދްމަވަތީ ރިލީޒްކުރުމުގެ ހުއްދަދޭނީ ކަމާއިބެހޭ ތަޖުރިބާކާރުންނަށް ފިލްމު ދެއްކުމަށްފަހު ކަމަށެވެ.
ޤާނޫނުހަދާ މަޖިލީހުގައި މި މައްސަލަ ބަލަމުންދާ އިންފޯމޭޝަން ޓެކްނޮލޮޖީ އާއި ބެހޭ ކޮމިޓީއަކީ އިންޑިއާގައި މަޢުލޫމާތު ފެތުރުމާއި، ބްރޯޑްކާސްޓް ކުރުމާއި ގުޅޭ ކަންކަން ބެލުމުގެ މެންޑޭޓް ހަވާލުކޮށްފައިވާ ކޮމިޓީއެވެ. މި ކޮމިޓީގައި ތިއްބަވަނީ ބީޖޭޕީއަށް ނިސްބަތްވެވަޑައިގަންނަވާ އަނުރާގް ޓާކުރާއި، ބީޖޭޕީއަށް ނިސްބަތްވެވަޑައިގަންނަވާ އެލްކޭ އަދްވާނީގެ އިތުރުން ކޮންގްރެސް ޕާޓީއަށް ނިސްބަތްވެވަޑައިގަންނަވާ އެކްޓަރު ރާޖް ބައްބަރެވެ.
"ޕަދްމަވަތީ" އާއި ދެކޮޅަށް ހަރަކާތްތައް ހިންގަމުންދާ ފަރާތްތަކުން ބުނަމުންދަނީ ފިލްމުގައި ޕަދްމާވަތީ އާއި އަލާއުއްދީން ޚިލްޖީގެ އިޝްޤީ މަންޒަރެއް ހިމެނޭ ކަމަށާއި އެ ދެ މީހުން ބައްދަލުވާތަން ފިލްމުން ފެނުމަކީ ބަލައިގަނެވޭނެ ކަމެއް ނޫން ކަމަށެވެ. އެހެން ނަމަވެސް ޑައިރެކްޓަރ ބަންސާލީ ބުނެފައިވަނީ އެއީ ދޮގެއް ކަމަށާއި ފިލްމު ބެލުމުން އެކަން އެނގޭނެ ކަމަށެވެ.
މީގެ ކުރިން އިންޑިއާގެ ނޫހަކަށް ދީފައިވާ އިންޓަވިއުއެއްގައި ދީޕިކާ ބުނެފައިވަނީ އޭނާ އަންހެނެއްގެ ހައިސިއްޔަތުންނާއި އިންޑިއާގެ ރައްޔިތެއްގެ ހައިސިއްޔަތުން ވަރަށް ދެރަވެ ރުޅިއައިސްފައިވާ ކަމަށެވެ. އަދި އެފިލްމާއި ބެހޭގޮތުން އެކިވާހަކަތައް ދައްކަމުން ދަނީ އެ ފިލްމުގައި ވާގޮތް ނޭނގިތިބެ ކަމަށް ދީޕިކާ ވަނީ ބުނެފައެވެ. "ޕަދްމަވަތީ" އަކީ މުޅި އިންޑިއާ ފަޚުރުވެރިވާނެ ފިލްމެއް ކަމަށާއި މުޅި ދުނިޔެއަށް ޕަދްމަވަތީގެ ވާހަކަ އެނގެންޖެހޭނެ ކަމަށް ދީޕިކާ ވަނީ ބުނެފައެވެ.
ބަންސާލީގެ ޕަދްމަވަތީއަކީ، ރާނީ ޕަދްމަވަތީގެ އަބުރަށް ހުތުރުވާގޮތަށް، ތާރީޚު އޮޅުވާލައި ހަދާފައިވާ ފިލްމެއްކަމަށްބުނެ އިންޑިއާގައި ބޮޑެތި މައްސަލަތަކެއް އުފެދިފައިވާއިރު، ރާނީ ޕަދްމިނީ އަކީ ހަޤީޤަތުގައި އުޅުއްވި ރާނީއެއްކަމާއިމެދުވެސް ތާރީޚު ދިރާސާކުރާ ފަރާތްތަކުން ދެބަސްވެއެވެ.
