ނޮވެމްބަރު މަހު ނެރުނު ފީފާ ރޭންކިންގައި ރާއްޖެ އެއް ދަރަޖަ ވެއްޓުނު އިރު އެއްވެސް ގައުމަކަށް ޖަރުމަނު ވައްޓައެއް ނުލެވުނުއެވެ.

ދުނިޔޭގެ ފުޓުބޯޅައިގެ މައި އިދާރާއިން ކޮންމެ މަހަކު އެއްފަހަރު ނެރޭ ރޭންކިންގައި ރާއްޖެއަށް މިފަހަރު ލިބިފައިވަނީ އެއް ދަރަޖައިގެ ވެއްޓުމަކާއެކު 157 ވަނައެވެ. މި ސަރަހައްދުގެ އެއްވަނަ މިފަހަރު ވެސް އަވަށްޓެރި އިންޑިއާއިން ހޯދިއިރު ސާކްގެ ގައުމުތަކުގެ ތެރެއިން އެންމެ ދަށުން ރޭންކް ކުރެވިފައިވަނީ ޕާކިސްތާނެވެ. އެގޮތުން 105 ވަނައިގައި އިންޑިއާ ރޭންކް ކުރެވުނުއިރު ޕާކިސްތާން ރޭންކް ކުރެވިފައި ވަނީ 201 ވަނައިގައެވެ. އަފްޢާނިސްތާނަށް 147 ވަނަ ލިބޭއިރު 170 އަދި 185 ގައި ރޭންކް ކުރެވިފައި ވަނީ ނޭޕާލް އާއި ބޫޓާންއެވެ. 192 ވަނައިގައި ބަންގްލަދޭޝް އޮތްއިރު 200 ވަނައިގައި އޮތީ ސްރީލަންކާއެވެ.

ފީފާ ރޭންކިންގެ އެއްވަނަ ޖަރުމަނުން ދިފާއުކުރި އިރު އެ ޓީމަށް ލިބިފައި ވަނީ 1602 ޕޮއިންޓެވެ. ރޭންކިންގެ ދެ ވަނައިން ފެށިގެން ފަސް ވަނަ އާއި ހަމަޔަށް އެއްވެސް ބަދަލެއް އައިސްފައި ނުވާއިރު ސްޕެއިންވަނީ ދެ ދަރަޖައިގެ ކުރިއެރުމަކާއެކު ހަ ވަނައަށް ޖެހިލާފައެވެ. ތިން ދަރަޖައިގެ ކުރިއެރުމަކާއެކު ސްވިޓްޒަލޭންޑުން ގަދަ 10 އެއްގެ ޖާގައެއް ހޯދިއިރު ފްރާންސް ވަނީ ދެ ދަރަޖައިގެ ވެއްޓުމަކާއެކު ނުވަ ވަނައަށް ވެއްޓިފައެވެ.

ރޭންކިންގެ ގަދަ 10 އެއްގައި ދެން ހިމެނޭ ޓީމުތަކަކީ ބްރެޒިލް، ޕޯޗުގަލް، އާޖެންޓީނާ، ބެލްޖިއަމް، ޕޮލެންޑް އަދި ޗިލީއެވެ.

އެފްރިކާ ބައްރުގެ ގައުމުތަކުގެ ތެރެއިން އެންމެ މަތީގައި ރޭންކް ކުރެވިފައިވަނީ 23 ވަނަ ލިބުނު ސެނެގޯލްއެވެ. އުތުރު އެމެރިކާގެ ގައުމުތަކުގެ ތެރެއިން އެންމެ މަތީގައި ރޭންކުރެވިފައި ވަނީ 16 ވަނައިގަ އޮތް މެކްސިކޯއެވެ. ހަމައެހެންމެ ދެކުނު އެމެރިކާގެ އެންމެ މަތީ ރޭންކިން ބްރެޒިލްއަށް ލިބޭއިރު އޭޝިއާގެ އެންމެ މަތީގައި ރޭންކް ކުރެވިފައި ވަނީ 32 ވަނައިގައި ރޭންކް ކުރެވިފައިވާ އީރާންއެވެ. އޯޝޭނިއާގެ ގައުމުތަކުގެ ތެރެއިން އެންމެ މަތީގައި ރޭންކް ކުރެވިފައިވަނީ 122 ވަނައިގައި ރޭންކް ކުރެވިފައި އޮތް ނިއުޒިލޭންޑެވެ.

މިފަހަރުގެ ރޭންކިންގައި އެންމެ ބޮޑު ކުރިއެރުމެއް ހޯދީ އުތުރު ކޮރެއާ އިންނެވެ. އެ ގައުމުން ވަނީ މިފަހަރުގެ ރޭންކިންގައި 18 ދަރަޖައިގެ ކުރިއެރުމެއް ހޯދާފައެވެ. 22 ދަރަޖައިގެ ވެއްޓުމަކާއެކު އެންމެ ބޮޑު ވެއްޓުމެއް މިފަހަރު ލިބުނީ ލާއޯސްއަށެވެ.