ޒިމްބާބްވޭގެ ގާނޫނު ހަދާ މަޖިލީހުން އެގައުމުގެ ރައީސް ރޮބާޓް މުގާބޭ ދުރުކުރުމުގެ މަސައްކަތް ފަށައި އަންގާރަ ދުވަހު އެކަމާ ގުޅޭ ސެޝަންތައް ފަށައިފިއެވެ.
އޭއެފްޕީން ރިޕޯޓުކުރާ ގޮތުން ގާނޫނު ހަދާ މަޖިލީހުގެ ރައީސް ޖޭކޮބް މުބެންޑާ ވަނީ ގާނޫނު ހަދާ މަޖިލީހުގެ މަތިގެ އާއި ތިރިގޭގައި ޖޮއިންޓް ސެޝަނެއް ބާއްވަން ހުއްދަދީ އެ ސެޝަނުގައި ރައީސް މުގާބޭ ވެރިކަމުން ދުރުކުރުމާ ގުޅޭ ގޮތުން ބަހުސް ކުރަން ފުރުސަދު ދެއްވާފައެވެ.
ޒިމްބާބުވޭގެ ގާނޫނު ހަދާ މަޖިލީހުގެ އެކި ފިކުރުތަކަށް ނިސްބަތްވާ ފަރާތްތަކުން ދަނީ ރައީސް މުގާބޭ އިސްތިއުފާ އަށް ގޮވާލަމުންނެވެ.
ޒިމްބާބްވޭގެ ގާނޫނު ހަދާ މަޖިލީހުގެ ބޭރުގައި އަންގާރަ ދުވަހު މަޖިލިސް ކުރިއަށް ދިޔައިރު ރައީސް މުގާބޭގެ އިސްތިއުފާ އަށް ބަޔަކު ދިޔައީ ގޮވަމުންނެވެ.
ރައީސްކަމުގެ މަގާމުން މުގާބޭ އިސްތިއުފާ ދެއްވުމަށް އެގައުމުގެ ޒާނޫ-ޕީއެފް ޕާޓީން ދިން މުހުލަތު ހަމަވިއިރު ވެސް މުގާބޭ އިސްތިއުފާ ދެއްވާފައި ނުވާތީ، މުގާބޭ ރައީސްކަމުން ދުރުކުރުމުގެ މަޝްވަރާތައް ފެށުމަށް އެ ޕާޓީއިން ދަނީ ވަރަށް މަސައްކަތް ކުރަމުންނެވެ. ޒާނޫ-ޕީއެފް ޕާޓީ އިން ރައީސް މުގާބޭ، ގައުމުގެ ރައީސްކަމުގެ މަގާމުން އިސްތިއުފާ ދެއްވުމަށް ހޯމަ ދުވަހު މެންދުރު 12 (ރާއްޖޭ ގަޑިން މެދުރު ފަހު 3:00) ޖެހުމާ ހަމައަށް މުހުލަތު ދިނެވެ. އެހެންނަމަވެސް ރައީސް މުގާބޭ އިސްތިއުފާ ނުދެއްވިއެވެ.
ޒިމްބާބްވޭގެ އަސްކަރިއްޔާގެ އަތްދަށަށް އެގައުމުގެ ކޮންޓްރޯލް ގެންގޮސްފައިވާއިރު އަސްކަރިއްޔާ އިން ބުނެފައި ވަނީރައީސް މުގާބޭއާ ދެކޮޅު ހަރަކާތެއް ނުހިންގާ ކަމަށާއި އަސްކަރިއްޔާއިން މަސައްކަތްކުރަނީ މުގާބޭގެ އަރިހުގައި ތިބި މުޖުރިމުން ހައްޔަރުކުރުމަށް ކަމަށެވެ. ހަމައެހެންމެ، އަސްކަރިއްޔާ އިން ބުނަމުން ދަނީ މުގާބޭގެ އަރިހުގައި ގައުމު ހިންގަން ތިބި މީހުން ގައުމު ހިންގާ ގޮތާ ދޭތެރޭގައާއި އަދި ރައްޔިތުންނާއި ދޭތެރޭ ކަންކަން ކުރަމުން ގެންދާ ގޮތާ ދޭތެރޭގައި ހިތްހަމަ ނުޖެހޭ ކަމަށެވެ.
