އިންޑިއާގެ ވެރިކަން ކުރާ ޕާޓީއަށް ނިސްބަތްވެ ވަޑައިގަންނަވާ ވަޒީރަކު އާއްމުތަނަކަށް ކުޑަކަމު ދިއުމުން ފާޑުކިޔުންތައް އަމާޒުވެއްޖެއެވެ.
ވަޒީރަކު މަގުމައްޗަށް ކުޑަކަމު ދިއުމުގެ މައްސަލައެއް ފެންމަތިވެފައިވާއިރު މަގުތަކަށް ފާޚާނާ ކުރުން ހުއްޓުވައި އާއްމު ފާޚާނާ ބޭނުންކުރުމަށް ބާރުއެޅުމުގެ މަސައްކަތް އިންޑިއާ ސަރުކާރުން އަންނަނީ ކުރަމުންނެވެ.
މަހަރާޝްތްރާގެ މަގުމައްޗަށް ރާމް ޝިންދޭ ކުޑަކަމުދާ ވީޑިއޯއެއް ދުނިޔޭގައި ވައިރަލްވެފައި ވަނީ ދުނިޔޭގައި ފާހަގަކުރާ ޓޮއިލެޓްޑޭ ނުވަތަ ފާޚާނާގެ ދުވަހުއެވެ.
އިދިކޮޅުފަރާތްތަކުން ބުނެފައި ވަނީ އެކަމުން ދައްކުވައި ދެނީ ބޮޑުވަޒީރު ނަރެންދުރަ މޯދީގެ ސާފުތާހިރުކަމުގެ ކެމްޕެއިން ފެއިލްވެފައިވާކަން ކަމަށެވެ.
ނަމަވެސް ކުޑަކަމުދިޔަ މިނިސްޓަރ ވިދާޅުވެފައިވަނީ އޭނާ އެގޮތަށް ކަންތައް ކުރެއްވީ ކުޑަކަމުދާންޖެހި ސިއްހީގޮތުން އުނދަގޫތަކާ ކުރިމަތިވެ ވަޑައިގެންނެވިއިރު ކައިރި ހިސާބަކުން ފާޚާނާއެއް ފެނިވަޑައިނުގަތުމުން ކަމަށެވެ.
ޝިންދޭ އަދާކުރައްވަމުން ގެންދަވަނީ އެގައުމުގެ މިނިސްޓަރ ފޮރ ވޯޓަރ އެންޑް ކޮންޒަރވޭޝަން މަގާމެވެ.
ބޮޑުވަޒީރު މޯދީވަނީ އިންޑިއާގައި ސާފުތާހިރުކަން އިތުރުކުރުމަށް 2014 ވަނަ އަހަރު ޚާއްސަ ކެމްޕެއިނެއް ފައްޓަވާފައެވެ. މީގެ އިތުރުން މޯދީ ވަނީ ދުނިޔޭގެ ދެވަނައަށް އެންމެ ބޮޑު އާބާދީ އޮންނަ އިންޑިއާގެ އެކިކަންކޮޅުތަކުގައި އެތައް މިލިއަން ފާޚާނާއެއް ގާއިމްކުރައްވާނެ ކަމަށް ވައުދުވެ ވަޑައިގެންފައެވެ.
