އުރީދޫ ދިވެހި ޕްރިމިއާ ލީގުގައި ކުޑަހުވަދޫ އާއި ދެކޮޅަށް ކުޅުނު މެޗު ކާމިޔާބުކޮށް މިލަންދޫއިން ދެވަނަ ބުރުގެ ފުރަތަމަ މޮޅު ހޯދައިފިއެވެ.

ހޯމަ ދުވަހުގެ ރޭ ކުޑަހުވަދޫއާއި ދެކޮޅަށް ގަލޮޅު ދަނޑުގައި ކުޅުނު މެޗުން މިލަންދޫ މޮޅުވެފައިވަނީ 3-0 ގެ ނަތީޖާއަކުންނެވެ. މި މެޗުގައި މިލަންދޫއިން ވަނީ ރަނގަޅު ކުޅުމެއް ދައްކައި ގިނަ ވަގުތު ބޯޅަ ހިފަހައްޓައިގެން ކުޅެފައެވެ. އެ ޓީމުން ވަނީ މި މެޗުގައި ލަނޑު ޖެހުމަށް ވެސް ގިނަ ފުރުސަތުތަކެއް ތަނަވަސް ކޮށްފައެވެ.

މިލަންދޫގެ ފުރަތަމަ ލަނޑު މެޗުގެ ހަވަނަ މިނެޓުގައި އެ ޓީމަށް ޖަހައިދިނީ އެ ޓީމުގެ ކެޕްޓަން އިސްމާއިލް ފަތުހީއެވެ. މި ލަނޑަށް ފަހު ވެސް އެ ޓީމުން ރަނގަޅު ކުޅުމެއް ދެއްކިއިރު ފުރަތަމަ ހާފު ނިމުމުގެ ކުރިން އެ ޓީމުން ވަނީ ލީޑު އިތުރަށް ފުޅާ ކޮށްފައެވެ. އެގޮތުން ފުރަތަމަ ހާފުގެ އެންމެ ފަހު މިނެޓުގައި އެ ޓީމަށް މި ލަނޑު ޖަހައިދިނީ އާދަމް އިމްރާންއެވެ.

ދެ ލަނޑުގެ ލީޑެއްގައި އޮވެ މިލަންދޫއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް މެޗުގެ ކޮންޓްރޯލް ދަމަހައްޓާފައެވެ. ނަތީޖާއެއްގެ މެޗުގެ 60 ވަނަ މިނެޓުގައި އިބްރާހިމް ސައީދު ވަނީ ލަނޑެއް ޖަހައިދީ މިލަންދޫގެ ލީޑު އިތުރަށް ފުޅާކޮށްދީފައެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ވަނީ ވެސް ސައީދެވެ.

މި މެޗުގައި ކުޑަހުވަދޫއަށް ވެސް ލަނޑު ޖެހުމަށް ރަނގަޅު ފުރުސަތުތަކެއް ލިބުނުއިރު އެ ޓީމަށް މި ފުރުސަތުތަކުގެ ބޭނުން ހިފިފައެއް ނުވެއެވެ.

މިއީ މިލަންދޫއިން ލީގުގެ ދެވަނަ ބުރުގައި ހޯދި ފުރަތަމަ މޮޅަށްވާއިރު އެ ޓީމު މި މެޗުގެ ކުރިން ކުޅުނު ފަސް މެޗުގެ ތެރެއިން ތިން މެޗު އެއްވަރުވިއިރު، ބާކީ ދެ މެޗުން ވަނީ ބަލިވެފައެވެ.

މި މޮޅާއެކު މިލަންދޫއިން ވަނީ ކުޅުނު ހަ މެޗުން 11 ޕޮއިންޓް އެއްކޮށް ލީގުގެ ހަވަނައިގައި ހަމަޖެހިލާފައެވެ. ކުޑަހުވަދޫ އޮތީ ކުޅުނު ހަ މެޗުން ލިބުނު ދެ ޕޮއިންޓާއެކު ތާވަލުގެ ފުލުގައެވެ. ލީގުގެ މިހާތަނަށް ކުޅުނު އެއްވެސް މެޗަކުން ކުޑަހުވަދޫ މޮޅުވެފައެއް ނުވެއެވެ.