ޒިމްބާބުވޭގެ ރައީސްކަމުގެ މަގާމުން ރޮބަރޓް މުގާބޭ އިސްތިއުފާ ދެއްވުމަށް ގޮވާލަމުންދާ ފަރާތްތަކުގެ ތެރެއަށް ވެރިކަން ކުރާ ޒަނޫ-ޕީއެފް ޕާޓީގެ ސަރަހައްދީ ގޮފިތައް އިތުރުވެއްޖެއެވެ.
މި ގޮވާލުންތައް އައިސްފައި މިވަނީ މުގާބޭގެ އިސްތިއުފާއަށް ގޮވާލައި ވެރިރަށް ހަރާރޭގައި ހޮނިހިރު ދުވަހު މުޒާހަރާ ކުރުމަށް ނިންމާފައި ވަނިކޮށެވެ.
މި މުޒާހަރާއަށް، އަސްކަރިއްޔާއިން ވެސް ފުރިހަމައަށް ތާއީދުކުރެއެވެ.
ރައީސް މުގާބޭ މިދިޔަ ބުދަ ދުވަހުން ފެށިގެން ހުންނަވަނީ އަސްކަރިއްޔާގެ ބެލުމުގެދަށުން ގޭ ބަންދުގައެވެ.
މުގާބޭއާއެކު ހަނގުރާމައިގައި ބައިވެރިވެފައިވާ، އަދި ދާދި ފަހަކާ ޖެހެންދެން މުގާބޭއަށް ވަފާތެރި ކުރީގެ ސިފައިންނާއި މިނިވަން ފިކުރުގެ ގްރޫޕްތަކުން ވެސް ގެންދަނީ މުގާބޭގެ އިސްތިއުފާއަށް ގޮވާލަމުންނެވެ.
ގައުމުގެ ކޮންޓްރޯލް އަސްކަރިއްޔާގެ އަތްދަށަށް ގެންދިޔަފަހުން މުގާބޭ ފުރަތަމަ ފަހަރަށް ފެނިގެން ގޮސްފައިވަނީ އަސްކަރިއްޔާގެ ވެރިޔާއާއެކު މުގާބޭގެ އަމިއްލަފުޅު ގެކޮޅުންނެވެ.
ގޭ ބަންދުގައި ހުންނެވި މުގާބޭވަނީ ހުކުރު ދުވަހު ދަސްވެނިމުމުގެ ހަފްލާއަކަށް ވަޑައިގެން ޑިގްރީ ސެޓްފިކެޓް ހަވާލު ކޮށްދެއްވާފައެވެ.
އަސްކަރިއްޔާއިން ވަނީ މުގާބޭއާއެކު މަޝްވަރާ ކުރަމުންދާ ކަމަށާއި އެކަމުން ނުކުންނަ ނަތީޖާއެއް" ވީއެންމެ އަވަހަކަށް" ރައްޔިތުންނާ ހިއްސާކުރާނެ ކަމަށް ބުނެފައެވެ.
ޒިމްބާބްވޭގެ އަސްކަރިއްޔާއިން އެ ޤައުމުގެ ރައީސް ރޮބަރޓް މުގާބޭ އާއި ދެކޮޅަށް ތެދުވެފައިވަނީ، މުގާބޭގެ އަނބިކަނބަލުން ގްރޭސް މުގާބޭ ރައީސްކަމުގެ މަގާމަށް ވަޑައިގަތުމަށް މަގުފަހިކުރެއްވުމަށް މުގާބޭ މަސައްކަތް ކުރައްވަން ފައްޓަވައި ނައިބް ރައީސްކަމުގެ މަގާމުގައި ހުންނެވި އެމަސަން ނަންގަގްވާ މަގާމުން ވަކިކުރެއްވުމާއެކުއެވެ.
އުމުރުފުޅުން 75 އަހަރުގެ ނަންގަގުވާ ވަކިކުރެއްވިތާ ހަފްތާއެއްވެސް ނުވަނީސް އަސްކަރިއްޔާއިންވަނީ މުގާބޭގެ ޕާޓީއަށް އިންޒާރުދީ ސިޔާސީ ކަންކަމުގެ ތެރެއަށް ވަންނަން ޖެހިދާނެ ކަމަށް އިންޒާރުދީފައެވެ.
އެ އިންޒާރަށް ފަހު އަސްކަރިއްޔާއިން ވަނީ ގައުމުގެ ކޮންޓްރޯލްނަގައި ދައުލަތުގެ ޓީވީވެސް އަސްކަރިއްޔާގެ ބެލުމުގެދަށަށް ގެންގޮސްފައެވެ.
