މުދަލާއި ޚިދުމަތުގެ އަގުން ނަގާ ޓެކްސް ނުދައްކާ ފަރާތްތަކުގެ ނަން ހާމަކުރުމުގެ އުޞޫލުގެ ދަށުން 2017ވަނަ އަހަރުގެ ދެވަނަ ކުއާޓަރގައި ޖީއެސްޓީ ބަޔާން ހުށަނާޅާ އަދި ޓެކްސް ނުދައްކާ ފަރާތްތަކުގެ ނަންތައް މީރާއިން ހާމަކޮށްފިއެވެ.
މޯލްޑިވްސް އިންލެންޑް ރެވެނިއު އޮތޯރިޓީއިން ކޮށްފައިވާ އިއުލާނުގައި ގިނަ އަދަދެއްގެ ވިޔަފާރިތައް ލިސްޓްކޮށްފައިވާއިރު، މީގެ ތެރެއިން ބައެއް ފަރާތްތަކަށް ގުޅަން އުޅެ ނުގުޅޭކަމަށް މީރާއިން ބުނެއެވެ. އަދި މީގެ ތެރޭގައި ފާހަގަކޮށްލެވޭ ނަން މަޝްހޫރު ބައެއް ވިޔަފާރިތައްވެސް ހިމެނެއެވެ. މީރާއިން އަމަލުކުރަމުން އަންނަ 'ނޭމް އެންޑް ޝޭމް' އުޞޫލުގެ ދަށުން ޖީއެސްޓީ ބަޔާން ހުށަނާޅާ އަދި ޓެކްސް ނުދައްކާ ފަރާތްތަކުގެ ނަންތައް އަބަދުވެސް އަންނަނީ އިއުލާންކުރަމުންނެވެ. އަދި ޓެކްސް ދެއްކުމުން އެލިސްޓުން ނަންތައް އަންނަނީ އުނިކުރަމުންނެވެ.
ޖީއެސްޓީ ބަޔާން ހުށަނާޅާ އަދި ޓެކްސް ނުދައްކާ ފަރާތްތަކުގެ ނަންތައް މީރާއިން އިއުލާންކުރި އިރު، އަންނަ ހަފްތާއަކީ މީރާއަށް ދައްކަން ޖެހޭ ބައެއް ޓެކްސްތައް ދެއްކުމުގެ މުއްދަތު ހަމަވާ ހަފްތާއެވެ. އެގޮތުން ނޮވެމްބަރު 12ވަނަ ދުވަހަކީ އޮކްޓޯބަރު މަހުގެ ޑިއުޓީ ފްރީ ރޯޔަލްޓީ އާއި ނޮވެމްބަރު މަހުގެ ޓްރޭޑް ފީ ދައްކަން ޖެހޭ ސުންގަޑިއެވެ. އަދި ނޮވެމްބަރު 15 އަކީ ރެމިޓެންސް ޓެކްސް ބަޔާން ހުށަހެޅުމާއި، ޓެކްސް ދެއްކުމުގެ އިތުރުން އޮކްޓޯބަރު މަހުގެ ވިތުހޯލްޑިންގ ޓެކްސް ދެއްކުމުގެ ސުންގަޑިއެވެ.
