މަގާމުން ދުރުކޮށްފައިވާ ކެޓަލޯނިއާގެ ކުރީގެ ރައީސް ކާލްސް ޕުއިޖެމޮންޓް ހައްޔަރު ކުރުމަށް، ޔޫރަޕިއަން އެރެސްޓް ވޮރަންޓް (އީއޭޑަބްލިއު) ނެރެފި އެވެ.
މިހާރު ބެލްޖިއަމްގެ ބްރަސަލްސްގައި ހުންނެވި ޕުއިޖެމޮންޓް ހައްޔަރު ކުރުމުގެ އަމުރު ނެރެފައި ވަނީ، ޕުއިޖެމޮންޓް ހިމެނޭ ގޮތަށް ކެޓަލޯނިއާގެ ކުރީގެ ސަރުކާރުގެ އިސް 14 މީހަކު ކޯޓަށް ހާޒިރު ކުރުމަށް ނެރުނު އަމުރަށް ތަބާވެފައިނުވާތީ އެވެ.
ކޯޓަށް ހާޒިރުވުމަށް އަމުރު ނެރުނު ކެޓަލޯނިއާ ސަރުކާރުގެ ކުރީގެ އިސް ފަރާތްތަކުގެ ތެރެއިން ހާޒިރުވީ 9 ބޭފުޅެކެވެ. ކޯޓަށް ހާޒިރުވި ވަޒީރުންގެ ތަހުގީގު ނިމެންދެން ބަންދުގައި ބޭތިއްބުމަށް ކޯޓުން ވަނީ ނިންމާފައެވެ. އެހެން ނަމަވެސް، 58 ހާސް ޑޮލަރުގެ ކަފާލާތުގެ ފީއެއް ދައްކައިގެން، އެއް ބޭފުޅަކު ވަނީ މިނިވަން ކޮށްފައެވެ.
ކޯޓަށް ހާޒިރުވުމުގެ އަމުރު ނެރުނުއިރު ވެސް ޕުއިޖެމޮންޓާއި އޭނާގެ އަރިސް ބައެއް ވަޒީރުން ތިއްބެވީ ބެލްޖިއަމްގައެވެ.
ޕުއިޖެމޮންޓްގެ އިތުރުން ކޯޓަށް ހާޒިރުނުވި ކެޓަލޯނިއާގެ ކުރީގެ ސަރުކާރުގެ އިސް 4 ބޭފުޅަކު ހައްޔަރު ކުރުމަށް ޔޫރަޕިއަން އެރެސްޓް ވޮރަންޓް ނެރެފައިވެއެވެ.
ޕުއިޖެމޮންޓާއި އޭނާގެ ސަރުކާރުގެ އިސް ވަޒީރުންގެ މައްޗަށް ސްޕެއިންގެ ޕްރޮސެކިއުޓަރުން ވަނީ، ސަރުކާރާއި ދެކޮޅު އަމަލު ހިންގުމާއި، ބަޣާވާތަށް ހިތްވަރު ދިނުމާއި، ދަޢުލަތުގެ ފައިސާ ނާޖާއިޒު ގޮތެއްގައި ބޭނުން ކުރުމުގެ ތުހުމަތު ކޮށްފައެވެ.
ޕުއިޖެމޮންޓް ވަނީ އޭނާ އަށް މިނިވަން ޝަރީޢަތެއްގެ ޔަގީންކަން ނުލިބެނީސް، އެނބުރި ސްޕެއިން އަށް ވަޑައިނުގަންނަވާނެ ކަމަށް ވިދާޅުވެފައެވެ.
ޕުއިޖެމޮންޓާއި ބްރަސަލްސްގައި ތިއްބެވި ކެޓަލޯނިއާގެ ސަރަޙައްދީ ސަރުކާރުގެ އިސް ބޭފުޅުން ބެލްޖިއަމް އިން ސިޔާސީ ހިމާޔަތް ހޯދުމަށް އެދިފައިވާކަން ކަށަވަރުވެފައެއްނުވެއެވެ.
އޭއެފްޕީ އާއި ވާހަކަ ދައްކަމުން ބެލްޖިއަމްގެ ސްޓޭޓް ޕްރޮސެކިއުޓަރުގެ ތަރުޖަމާނު ވަނީ، ޕުއިޖެމޮންޓްގެ އިތުރުން ބެލްޖިއަމްގައި ތިއްބެވި ބޭފުޅުންނާއި ދެކޮޅަށް ނެރެފައިވާ ޔޫރަޕިއަން އެރެސްޓް ވޮރަންޓް އިތުރަށް ދިރާސާ ކުރާނެ ކަމަށް ބުނެފައެވެ.
ކެޓަލޯނިއާގެ ސަރުކާރުގެ އިސް ބޭފުޅުންނާއި ދެކޮޅަށް ޝަރީއަތް ހިންގަން ފަށާފައިވަނީ ސްޕެއިންގެ މައި ސަރުކާރުގެ ކިބައިން މިނިވަންވެ، ކެޓަލޯނިއާގެ ވަކި ދަޢުލަތެއް އުފެއްދުމަށް ކުރި މަސައްކަތްތަކާއި ގުޅިގެންނެވެ.
ކެޓަލޯނިއާގެ ވަކި ދަޢުލަތެއް އުފެއްދުމަށް މިދިޔަ އޮކްޓޯބަރު މަހު ނެގި ފެންނަ ނުފެންނަ ވޯޓުގައި ކެޓަލޯނިއާގެ ރައްޔިތުންގެ އަޣުލަބިއްޔަތު ވަނީ، ކެޓަލޯނިއާގެ ވަކި ދައުލަތެއް އުފެއްދުމަށް ފެންނަ ކަމަށް ވޯޓު ދީފައެވެ.
އެ ވޯޓާއި ގުޅިގެން ކެޓަލޯނިއާގެ ސަރަޙައްދީ ސަރުކާރާއި، ސަރަޙައްދީ ޤާނޫނު ހަދާ މަޖިލީހުގެ ނިންމުންތަކާއި ދެކޮޅަށް ސްޕެއިންގެ މައި ސަރުކާރުން ތަފާތު އިންޒާރުތައް ދެމުންދަނިކޮށް، މިދިޔަ ހަފްތާގައި ސަރަހައްދީ ޤާނޫނު ހަދާ މަޖިލީހުން ވަނީ ކެޓަލޯނިއާގެ ވަކި ދަޢުލަތެއް އިޢުލާން ކޮށްފައެވެ. އެހެން ނަމަވެސް ކެޓަލޯނިއާ ވަކި ދައުލަތެއްގެ ގޮތުގައި އެއްވެސް އެހެން ފަރާތަކުން ޤަބޫލުކޮށްފައެއްނުވެއެވެ.
މިނިންމުމާއި ގުޅިގެން ކެޓަލޯނިއާގެ ސަރަޙައްދީ ސަރުކާރަށް ދީފައިވާ ބާރުތައް ނެގުމަށް ފަހު، ސްޕެއިންގެ މައި ސަރުކާރުން ވަނީ ސްޕެއިންގެ ޤާނޫނު އަސާސީގެ ދަށުން ލިބިދޭ ކުއްލި ޙާލަތުގެ ބާރުތަކުގެ ބޭނުންކޮށް، ކެޓަލޯނިއާގެ ސަރަޙައްދީ ސަރުކާރާއި ޤާނޫނު ހަދާ މަޖިލިސް އުވާލުމަށް ފަހު، އައު އިންތިޚާބެއް ބޭއްވުމަށް ނިންމިކަން އިޢުލާންކޮށްފައެވެ.
