ގަލްފް ކޯޕަރޭޝަންގެ ގައުމުތަކުގެ މެދުގައި އުފެދިފައިވާ ދެބަސްވުންތައް ހައްލު ކުރުމަށް މަޝްވަރާ ކުރުމަށް ތައްޔާރަށް އޮތް ކަމަށް އެގައުމުން ބުނާ ބުނުން ތަކުރާރު ކޮށްފިއެވެ.

މީގެ އިތުރުން އެ ގައުމުން ވަނީ "ގަލްފުގެ ރަމްޒަށް" ހަމަލާ ދިނުމުން ދުރުވުމަށް އެގައުމުގެ ރައްޔިތުންނާއި މީޑިއާތަކަށް ގޮވާލާފައެވެ.

ޤަތަރުގެ ފޮރިން މިނިސްޓްރީން އަންގާރަ ދުވަހު ނެރެފައިވާ މި ބަޔާނަކީ މައްސަލަ އިތުރަށް ހޫނު ނުކުރުމަށް މައްސަލައިގައި ޝާމިލްވާ ހުރިހާ ގައުމަކަށް ކުވެއިތުގެ އަމީރު ޝެއިޚް ސަބާހް އަލް-އަހްމަދު އަލް-ސަބާހް ގޮވާލެއްވި ގޮވާލެއްވުމާ ގުޅިގެން ނެރުއްވާފައިވާ ބަޔާނެކެވެ.

ބަޔާނުގައި ބުނެފައި ވަނީ ކުވެއިތުގެ ލީޑަރުގެ ގޮވާލެއްވުމަށް މަރުހަބާ ކިޔާ ކަމަށާއި މައްސަލަ އިތުރަށް ހޫނު ކުރަން އެ ގައުމުން ބޭނުން ނުވާ ކަމަށެވެ.

ކުވެއިތުގެ އަމީރު އަންގާރަ ދުވަހު ވަނީ ޤަތަރާމެދު އުފެދިފައިވާ މައްސަ ހައްލުނުވެ ގަލްފް ކޯޕަރޭޝަން ކައުންސިލް ރޫޅިދާންވީތޯ އައްސަވައި އިންޒާރު ދެއްވަފައެވެ.

ގަލްފް ކޯޕަރޭޝަން ކައުންސިލް، ޖީސީސީ އަކީ ސިޔާސީ އަދި އިޖްތިމާއީ ކަންކަމަށް އެއްބާރުލުން ދިނުމަށް އަރަބިއަން ޕެނިންސިއުލާގައި އުފައްދާފައިވާ ޖަމްއިއްޔާއެކެވެ.

މި ޖަމާއަތުގައި ބަހްރެއިން،ކުވެއިތު،އޮމާން، ޤަތަރު ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް ހިމެނެއެވެ.

ޖޫން މަހުގެ ހަވަނަ ދުވަހު ސައުދީ އަރަބިއްޔާއާއި، މިސްރާއި ޔޫއޭއީއާއި ބަހްރެއިނުން ވަނީ ގަތަރާއެކު އޮންނަ ޑިޕްލޮމެޓިކް އަދި ދަތުރުފަތުރުގެ ގުޅުން ކަނޑާލާފައެވެ.

ގަތަރުން ޓެރެރިޒަމަށް ފައިސާ ޚަރަދުކޮށް ވާގިވެރިވެދީ ސަރަހައްދުގެ ހަމަޖެހުމަށް ބުރޫއަރުވަމުން ގެންދާކަމަށް ތުހުމަތުކޮށް އެ ގައުމުތަކުން ގުޅުންކަނޑާލިއިރު ގަތަރުން އެކަން ދޮގުކުރެއެވެ.

މައްސަލަ ހައްލުކުރުމަށްކަމަށް ބުނެ އެ ހަތަރު ގައުމުން ފަހުން ވަނީ ގަތަރަށް ޑިމާންޑްތަކެއް ހުށަހަޅާފައެވެ.

އެ ޑިމާންޑްތަކުގެ ތެރޭގައި އީރާނާއެކު އޮންނަ ގުޅުން ކަނޑާލުމާއި،ޓެރެރިޒމަށް ވާގިވެރިވުން ހުއްޓާލުމާއި އަލްޖަޒީރާ ބަންދުކުރުން ހިމެނޭއިރު ގަތަރުންވަނީ އެ ޑިމާންޑްތަކަށް ދެކޮޅު ހަދާފައެވެ.