އުފާވެރި ދިރިއުޅުމަކަށް ބޭނުންވާނެ ކަންކަމާ ބެހޭ ގޮތުން އަލްބަރޓް އައިންސްޓައިންގެ ތިއަރީގައި ބަޔާން ކޮށްފައި އޮތް ނަސޭހަތެއް ލިޔެފައިވާ ދެ ނޯޓެއް ގުދުސްގެ ނީލަމެއްގައި 1.56 މިލިއަން ޑޮލަރަށް ވިއްކާލައިފިއެވެ.
ނޮބެލް އިނާމް ލިބިވަޑައިގެންފައިވާ ޖަރުމަނަށް އުފަން ފިޒިސިސްޓް އަލްބަރޓް އައިންސްޓައިންގެ މި ނޯޓަކީ 1922 ވަނަ އަހަރު ޓޯކިޔޯގެ ސިޓީ ބަހާ މީހަކަށް ޓިޕްސްގެ ބަދަލުގައި ދީފައިވާ އެއްޗެކެވެ.
އެ ނޯޓް ދެއްވުމަށް ފަހު އަލްބަރޓް ވިދާޅުވެފައި ވަނީ އޭނާގެ ނަސީބު ހުރިއްޔާ އެ ނޯޓަކީ އަގު ހުރި އެއްޗަކަށް ވެގެންދާނެ ކަމަށެވެ.
އުމުރު ދުވަސް އެކުގައި ސައިންސްގެ މަސައްކަތުގައި އުޅުއްވި އަލްބަރޓް އެ ނޯޓްގައި ވިދާޅުވެފައި ވަނީ ޒަމާންތަކެއް ވަންދެން ދުށް ހުވަފެނެއް ކާމިޔާބު ކުރެވުމަކީ އަދި ކޮންމެހެން އުފާވެރިކަން ކަށަވަރުކޮށްދޭ ކަމެއް ނޫން ކަމަށެވެ.
ސިޓީ ބަހާ މީހާ އަލްބަރޓްގެ ރޫމަށް އައިއިރު އޭނާއަށް ދޭނެ އެއްވެސް ފައިސާއެއް އަލަބަރޓް އަތުގައި ނެތް ކަމަށް ވެއެވެ.
އެ ނޯޓް ދެއްވި އިރު އަލްބަރޓް ހުންނެވީ ލެކްޗަރ ޓުއަރއެއްގައި ޖަޕާނުގައެވެ. ފިޒިކްސްގެ ރޮނގުން ނޮބެލް އިނާމް ލިބިވަޑައިގެންނެވި ޚަބަރު ލިބިވަޑައިގެންވީ އެ ދަތުރުގައި އުޅުއްވަނިކޮށެވެ.
ދެ ނޯޓްގެ އަގުވެސް ނީލަމުގައި ވިކިފައި އެވަނީ ކުރިން އަންދާޒާ ކުރި މިންވަރަށް ވުރެ ވެސް ބޮޑުކޮށެވެ. އެއް ނޯޓް ވިކިފައިވަނީ 240،000 އެމެރިކާ ޑޮލަރަށް ކަމަށްވާއިރު އެއް ނޯޓް ގަނެފައިވަނީ ނަން ހާމަކުރަން ނޭދޭ ޔޫރަޕްގެ ރައްޔިތެކެވެ. މި ނޯޓްތައް ވިއްކާފައި ވަނީ ނޯޓް ލިބުނު ސިޓީބަހާ މީހާގެ އެއްބަނޑު އެއްބަފާ މީހެއްގެ ދަރިއެކެވެ.
