އުތުރު ކޮރެއާ ވަނީ އެމެރިކާ އަށް ނިއުކްލިއާ މިސައިލަކުން ހަމަލާ ދެވޭނެ ފަދަ "ހާލަތެއްގައި" ކަމަށް އެމެރިކާގެ ސެންޓްރަލް އިިންޓެލިޖެންސް އެޖެންސީ (ސީއައިއޭ) ގެ ޑައިރެކްޓާ މައިކް ޕޮމްޕެއޯ ވިދާޅުވެއްޖެއެވެ.
ބުރާސްފަތި ދުވަހު ވޮޝިންޓަންގެ ތިންކް ޓޭންކްއެއް ކަމަށްވާ ފައުންޑޭޝަން ފޯ ޑިފެންސް އޮފް ޑިމޮކްރަސީސްގައި ވާހަކަ ދައްކަވަމުން ޕޮމްޕެއޯ ވިދާޅުވީ އެމެރިކާ އަށް ނިއުކްލިއާ މިސައިލަކުން ހަމަލާ ދެވޭނެ ގާބިލުކަން އުތުރު ކޮރެއާ އަށް ގާތްގަނޑަކަށް ލިބިފައިވާ ކަމަށާއި، އެމެރިކާގެ ޕޮލިސީގެ ނަޒަރިއްޔާތުން ވާހަކަދައްކާއިރު އުތުރު ކޮރެއާ ވަނީ އެމެރިކާ އަށް ހަމަލާ ދެވޭ ފަދަ "ހާލަތެއްގައި" ކަމަށް ބަލަން ޖެހޭ ކަމަށެވެ.
ޕޮމްޕެއޯ ވިދާޅުވީ އުތުުރު ކޮރެއާގެ މިސައިލް ކެޕޭސިޓީ ވަރަށް ބާރަށް ކުރިއަރަމުންދާ ކަމަށާއި އެމެރިކާގެ އިންޓެލިޖެންސް އަށް ވެސް ކަންކަން އެނގުން ދަތިވާ ކަމަށެވެ.
މީގެ އިތުރަށް ޕޮމްޕެއޯ ވިދާޅުވީ އުތުުރު ކޮރެއާ މައްސާލާގައި އަދިވެސް ބޭނުންވަނީ މަޝްވަރާކޮށްގެން ކަންކަން ހައްލު ކުރަން ކަމަށާއި އެހެންނަމަވެސް އަސްކަރީ އޮޕްޝަނަކީ ވެސް އޮތް އޮޕްޝަނެއް ކަމަށެވެ.
ބައިނަލްއަގްވާމީ ދުނިޔެއިން ތަކުރާރުކޮށް އުުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ.
