ފިލާވަލު ނުހަދައިގެން ކަމަށް ބުނެ، މިސްރު މީހަކު އޭނާގެ އަންހެން ދަރިފުޅަށް އަނިޔާކޮށް އެ ކުއްޖާ މަރާލައިފިއެވެ.
ރިޕޯޓްތައް ބުނާ ގޮތުގައި މިސްރުގެ ޣީޒާ ސިޓީގައި މަރާލާފައިވާ މި ކުއްޖާއަކީ ނާސަރީގައި ކިޔަވަމުންދާ އުމުރުން 5 އަހަރުގެ ކުއްޖެކެވެ. މި ކުއްޖާ މަރާލި މައްސަލަ ފުލުހުންނަށް ހުށަހަޅާފައިވަނީ ބޫލާދް އާދް ދާކްރޫރް ހޮސްޕިޓަލްގެ ފަރާތުންނެވެ. އެ ހޮސްޕިޓަލުން ހާމަކޮށްވާ ގޮތުގައި އެ ކުއްޖާ ހޮސްޕިޓަލަށް ގެންދިޔައިރު ވެސް އެ ކުއްޖާ އޮތީ މަރުވެފައެވެ. ހޮސްޕިޓަލުން މި މައްސަލަ ފުލުހުންނަށް ހުށަހެޅި ކުއްޖާގެ ހަށިގަނޑުގައި ބޮޑެތި ޒަޚަމްތަކެއް ހުރުމުންނެވެ.
މި މައްސަލަ ތަޙުޤީޤުކުރުމަށް ފަހު، ފުލުހުން ވަނީ މި ކުއްޖާގެ ބައްޕަ ކުއްޖާއަށް ހަމަލާދީފައި ވަނީ ޕްލަސްޓިކް ހޮޅިބުރިއަކުން ކަމަށާއި، އެ ކުއްޖާއަށް އަނިޔާކުރީ އެކުއްޖާ ފިލާވަލު ނުހަދައިގެން ކަމަށް ބުނެކަން ހާމަކޮށްފައެވެ.
ފުލުހުން އިތުރަށް ބުނި ގޮތުގައި ކުޑަކުއްޖާ ހޮސްޕިޓަލަށް ގެންގޮސްފައިވަނީ އެ ކުއްޖާގެ އަވަށްޓެރިންނެވެ. އެ ކުއްޖާއަށް އަނިޔާކުރަމުން ދިޔައިރު، އެ ކުއްޖާ ސަލާމަތް ކުރުމަށް އަވަށްޓެރިން މަސައްކަތް ކުރި ނަމަވެސް، އެމީހުންނަށް އެ ކުއްޖާއާ ހަމައަށް ދެވުނުއިރު އެ ކުއްޖާ މަރުވެފައިވާ ކަމަށް ވެސް ފުލުހުން ބުނެއެވެ.
މަރުވެފައިވާ ކުޑަކުއްޖާގެ ބައްޕަ މިހާރު ހައްޔަރުކޮށްފައިވާއިރު، އޭނާ ވަނީ އޭނާގެ ކުށަށް އިޢުތިރާފު ވެސް ވެފައެވެ.
