މިޔަންމާގެ އުތުރުގެ ރަކައިން ސްޓޭޓްގައި ރޮހިންޖާ މުސްލިމުންނާއި ދެކޮޅަށް އެޤައުމުގެ އަސްކަރިއްޔާ އިން އިންސާނިއްޔަތާއި ޚިލާފް ޖަރީމާތައް ހިންގާފައިވާ ކަމުގެ ސާފު ހެކި ލިބިފައިވާ ކަމަށް އެމްނެސްޓީ އިންޓަރނޭޝަނަލް އިން ބުނެފި އެވެ.

އެމްނެސްޓީ އިންޓަރނޭޝަނަލް އިން ބުދަ ދުވަހު ނެރުނު ރިޕޯޓުގައި ބުނެފައި ވަނީ، މިޔަންމާގެ ރޮންހިންޖާ ދަރިކޮޅުގެ މުސްލިމުންނާއި ދެކޮޅަށް އެޤައުމުގެ އަސްކަރިއްޔާ އިން ހިންގާ އިންސާނިއްޔަތާއި ޚިލާފް ޖަރީމާތަކުގެ ތެރޭގައި ހިމެނޭ ގަތުލުއާއްމާއި، އިތްފަތްތެރިކަން ފޭރިގަތުން އަދި އަނިޔާ ކުރުމާއި، އެމީހުންގެ އަވަށްތަކުގައި ހުޅުޖެހުމާއި، ގަދަކަމުން ވަޒަނުން ބޭރުކުރުމުގެ އަމަލަތަކުގެ ތަފްސީލްތައް ހިމަނާފައެވެ.

އެމްނެސްޓީން ވަނީ މިޔަންމާ އަށް ހަތިޔާރު ވިއްކުން މަނާ ކުރުމާއި، މިޔަންމާ ސަރުކާރުގެ އިސް އޮފިޝަލުންނާއި ދެކޮޅަށް ދަތިކުރުމުގެ ފިޔަވަޅު އެޅުމަށް އދ.ގެ ސަލާމަތީ މަޖިލީހަށް ގޮވާލާފައެވެ.

އެމްނެސްޓީގެ ރިޕޯޓުގައި ވަނީ، ރޭވިގެން ފުޅާކޮށް ހިންގާ މި ޖަރީމާތަކުގެ ޝިކާރައަކަށް ރޮންހިންޖާ ދަރިކޮޅުގެ ފިރިހެނުންނާއި، އަންހެނުން އަދި ކުޑަކުދިން ވެފައިވާ ކަމަށާއި، މިޔަންމާގެ އަސްކަރީ ފައުޖުތަކުގެ ހަމަލާތައް ރޮހިންޖާ ދަރިކޮޅުގެ މުޅި އާބާދީ އަށް އަމާޒުކޮށްފައިވާ ކަމަށެވެ.

އަދި މިޖަރީމާތަކުގެ ފަހަތުގައިވާ އެޤައުމުގެ އަސްކަރިއްޔާގެ ހުޅަނގު ކޮމާންޑުން، މިޔަންމާގައި ހިންގާ އެންމެ ބޮޑެތި ޖަރީމާތަކަށް ޒިންމާވާން ޖެހޭނެ ކަމަށް އެރިޕޯޓުގައި ވެއެވެ.

150 އެއްހާ މީހުންގެ ހެކިބަހާއި، ސެޓަލައިޓް މަޢުލޫމާތާއި، ފޮޓޯ އަދި ވީޑިއޯ ހެއްކަށް ބިނާކޮށް ތައްޔާރުކޮށްފައިވާ މި ރިޕޯޓަކީ، މިޔަންމާގައި ކުރިމަތި ކުރުވަމުންދާ އިންސާނިއްޔަތާއި ޚިލާފް ޖަރީމާތަކުގެ ސަބަބުން މިޔަންމާ ދޫކޮށް އަވަށްޓެރި ބަންގްލަދޭޝްގެ ރެފިއުޖީ ކޭމްޕުތަކުން ހިމާޔަށް ހޯދުމަށް މިދިޔަ އޯގަސްޓް މަހުގެ ފަހުކޮޅުން ފެށިގެން ރޮހިންޖާ ދަރިކޮޅުގެ މީހުން ހިޖުރަކުރަން ފެށިފަހުން ތައްޔާރު ކުރި މިފަދަ އެންމެ ތަފްސީލީ އަދި ފުރިހަމަ ދިރާސާ ރިޕޯޓެވެ.

މިރިޕޯޓަށް މިޔަންމާ ސަރުކާރުގެ ބަސް ހޯދުމަށް ކުރި މަސައްކަތް ނާކާމިޔާބު ވެފައިވާ ކަމަށް ރިޕޯޓުގައިވެއެވެ.

މިޔަންމާ ސަރުކާރުގެ އޮފިޝަލުން ވަނީ، ޤާނޫނާއި ޚިލާފަށް ބަންގްލަދޭޝް އިން މިޔަންމާ އަށް އެތެރެވެފައިވާ ކަމަށް އެމީހުން ބުނާ ރޮހިންޖާ ދަރިކޮޅުގެ މީހުންނާއި ދެކޮޅަށް ހިންގާ ޖަރީމާތަކާއި ގުޅިގެން އެޤައުމުގެ ސަރުކާރާއި ދެކޮޅަށް ކުރާ ތުހުމަތުތައް ދޮގު ކޮށްފައެވެ.

އެހެންނަމަވެސް މިޔަންމާގެ ކަންކަން ދިރާސާ ކުރާ އެމްނެސްޓީގެ އޮފިޝަލް ލައުރާ ހައިގް ވަނީ، އެމީހުންނަށް ހެކި ލިބިފައިވާ ކުށްތަކަކީ، މިޔަންމާގެ ކަޗިން، ޝާން އަދި ޕަލައުންގގައި ދިރިއުޅޭ ބައިމަދު ދަރިކޮޅުތަކުގެ އާއްމުންނާއި ދެކޮޅަށް އެގައުމުގެ އަސްކަރިއްޔާ އިން ހިންގާފައިވާ ކުށްތަކާއި ދާދި އެއް ގޮތް ކުށްތަކެއް ކަމަށް ބުނެފައެވެ.