ރަސްމީ ސިފައިގައި ސައުދީ އަރަބިއްޔާ އިން ދިވެހި ރާއްޖެއަށް 630 މިލިއަން ޑޮލަރުގެ އެހީ ދީފައިވާ ކަމަށް ހާމަވެއްޖެ އެވެ.
އަރަބް ނިއުސް އިން އާންމުކޮށްފައިވާ ގޮތުގައި ސައުދީ ސަރުކާރުން 2010 ވަނަ އަހަރާ ހަމައަށް ގާތްގަނޑަކަށް 80 މިލިއަން ޑޮލަރުގެ މާލީ އެހީ ހޯދާފައިވާއިރު އޭގެ ފަހުން ގާތްގަނޑަކަށް 193 ޑޮލަރުގެ އެހީގެ ގޮތުގައި ވަނީ ލިބިފަ އެވެ.
ސައުދީ ސަރުކާރުން އެންމެ ބޮޑު އެހީއެއް ދީފައިވަނީ ވެލާނާ އިންޓަނޭޝަނަލް އެ އެއާޕޯޓަށް ކަމަށާއި އެއާޕޯޓް މަޝްރޫއަށް 357 މިލިއަން ޑޮލަރުގެ ލޯން އެހީވެސް ދިނުމަށް އެއްބަސްވެފައިވާ ކަމަށް އަރަބް ނިއުސްގައި ބުނެފައިވެ އެވެ. އެއާޕޯޓް ތަރައްގީކުރުމުގެ މަސައްކަތް ހަވާލުކޮށްފައިވަނީ ސައުދީ އަރަބިއްޔާގެ އެންމެ ބޮޑު ކޮންސްޓްރަކްޝަން ކުންފުނި، ބިންލާދިން ގްރޫޕާ އެވެ.
އެއާޕޯޓްގެ މަޝްރޫއާއެކު، ސައުދީން ރާއްޖެއަށް ދިން އެހީ 630 މިލިއަން ޑޮލަރަށް އަރައެވެ.
އަރަބް ނިއުސް އަށް މައުލޫމާތު ދެއްވަމުން ފިޝަރީޒް މިނިސްޓަރ ޑރ.މުހައްމަދު ޝައިނީ ވިދާޅުވީ،2013 ވަނަ އަހަރު ކްރައުން ޕްރިންސްގެ ގޮތުގައި ސަލްމާން ބިން އަބްދުލް އަޒީޒު އަލް ސައުދު ހުންނެވި އިރު ރާއްޖެ ވަޑައިގެންފައިވާ ކަމަށެވެ. އެ ދަތުރަށް ފަހު ރަސްގެފާނު ސަލްމާނާއި ދިވެހިރާއްޖެއާ ގާތްގުޅުމެއް އޮންނަ ކަމަށް ޝައިނީ ވިދާޅުވި އެވެ.
ސައުދީއާ ދިވެހިރާއްޖެއާ އެއްގޮތް ކަންތައްތަކެއް ހުރިކަން ފާހަގަކުރައްވާ ޝައިނީ އަރަބް ނިއުސް އަށް ވިދާޅުވީ، ނިސްބަތުން ގައުމުގެ ރައްޔިތުންނަށް ބަލާ އިރު އެންމެ މުސްލިމުންގެ މެޖޯރިޓީ އެންމެ މަތީގައި އުޅޭ ދެ ގައުމަކީ ދިވެހިރާއްޖެއާ ސައުދީ ކަމަށެވެ.
ޝައިނީ ވަނީ ސައުދީން ރާއްޖޭގެ ހޫނު މޫސުމާއި ރާއްޖޭގެ ރަށްތަކުގެ ގޮނޑުދޮށްތަކަށް ވަރަށް ބޮޑު ޝައުގުވެރިކަމެއް ހުރިކަމަށާއި އިގްތިސާދީ ގޮތުން އެ މަސައްކަތްތައް ކުރުމަށް ދެގައުމުގެ ގުޅުން ވަރަށް ބޮޑަށް ބަދަހިވެފައިވާ ކަމަށް ހާމަކޮށްފަ އެވެ. ސައުދީ އަކީ ވަރުގަދަ އިންވެސްޓަރެއްގެ އިތުރުން ރާއްޖޭގެ އިގްތިސާދު ތަރައްގީ ކުރުމުގައި ޑިވެލޮޕަރެއްގެ ގޮތުގައި ޝައިނީ ސިފަކުރެއްވި އެވެ.
ޝައިނީ ވަނީ ސައުދީން ވެދޭ އެހީތެރިކަން ވަރަށް ބޮޑަށް ފާހަގަކޮށްފަ އެވެ. އެގޮތުން 1970 ގައި އެއަރޕޯޓް ތަރައްގީ ކުރުމަށާއި ނަރުދަމާގެ މަސައްކަތްތަކާއި ފެނުގެ ހިދުމަތުގެ އިތުރަށް 2004 ވަނަ އަަހަރުގެ ސުނާމީ އަށްފަހު ރަށްތަކަށް ލިބުނު ގެއްލުންތަކުން އަރައިގަތުމަށް ސައުދީ ސަރުކާރުން ދީލަތި އެހީތެރިކަން ފޯރުކޮށްދީފައިވާ ކަން ޝައިނީ ފާހަގަކުރެއްވި އެވެ.
ޗައިނާގެ އިންވެސްޓަރުންވެސް ރާއްޖޭގައި ވަރަށް އެކްޓިވްކޮށް މަސައްކަތް ކުރަމުންދާކަން އަރަބް ނިއުސްގައި ވަނީ ފާހަގަކޮށްފަ އެވެ. އެގޮތުން ސައުދީ އާއި ޗައިނާ އިން ރާއްޖޭގައި ތަފާތު މަޝްރޫއުތައް ހިންގުމުގައި ރޭސް ޖަހަމުންދާ ކަމަށް ސައުދީގެ ނޫސްތަކުން ސިފަ ކުރެ އެވެ.
ސައުދީން 630 މިލިއަން ޑޮލަރުގެ އެހީ ދިވެހި ސަރުކާރަށް ދީފައިވާ އިރު އިތުރު މަޝްރޫއުތަކަށް ވެސް ސަރުކާރުން ދަނީ ސައުދީ ސަރުކާރުގެ މާލީ އެހީތެރިކަން ހޯދަމުންނެވެ.