ހާލުގައި ޖެހިފައިވާ ރޮހިންޖާ މުސްލިމުންނަށް އެހީވުމަށް ރާއްޖެޓީވީން ކުރިއަށް ގެންދިޔަ ޓެލެތޯންއަށް ރ. އުނގޫފާރު ރައްޔިތުންގެ ފަރާތުން ދެ ލައްކައަށްވުރެ ގިނަ ރުފިޔާ ހަދިޔާކޮށްފިއެެވެ.
ރާއްޖެޓީވީއަށް މައުލޫމާތު ދެއްވަމުން އުނގޫފާރު ކައުންސިލްގެ މެންބަރު ހުސެއިން އާސިފް ވިދާޅުވީ، ރާއްޖެޓީވީން އިސްނަގައިގެން ހިންގި ޓެލެތޯނަށް އެހީވުމަށް އެރަށުގެ ރައްޔިތުންގެ ފަރާތުން ވަރަށްބޮޑު އެއްބާރުލުމެއް ލިބިގެން ދިޔަ ކަމަށެވެ. އެގޮތުން އެރަށު ރައްޔިތުންގެ ނަމުގައި، ޖުމްލަ 206،106.27 ރުފިޔާ ޓެލެތޯނަށް ހަދިޔާކޮށްފައިވާނޭ ކަމަށް ވިދާޅުވިއެވެ.
އޭނާ ވިދާޅުވީ، އޭގެ ތެރެއިން އެއްލައްކަ ފަސްދޮޅަސް އަށްހާސް ދުއިސައްތަ ރުފިޔާއަކީ ކައުންސިލްގައި ހުރި ރައްޔިތުންގެ ބަޖެޓުން ހަދިޔާކުރި ފައިސާ ކަމަށެވެ. އަދި އެ ފައިސާ އެ ފަންޑަށް ހަދިޔާ ކުރީ ރައްޔިތުންނާއި މަޝްވަރާކުރުމަށް ފަހު، ކަމާގުޅޭ ސަރުކާރުގެ ހުރިހާ މުއައްސަސާތަކުގެ ވެސް އެއްބާރުލުން ލިބިގެންކަމަށެވެ. އަދި އަނެއް 37،906.27 ރުފިޔާއަކީ ހުކުރު ދުވަހުއްސުރެ ހޯމަ ދުވަހުގެ ނިޔަލަށް އެރަށުގައި ބެހެއްޓުނު ފަންޑް ފޮއްޓަށް ސީދާ ރައްޔިތުން ހަދިޔާކުރި ފައިސާ ކަމަށެވެ.
އާސިފް ވިދާޅުވީ، ރާއްޖެޓީވީން މިފަދަ ކަމަކަށް އިސްނެގީތީ އުފާކުރާކަމަށާއި، މި ފަންޑަށް އުނގޫފާރުގެ ރައޔިތުން ދިން އެއްބާރުލުމާއި ތަރުހީބަށް ވަރަށްބޮޑަށް ޝުކުރު އަދާކުރާކަމަށެވެ.