ދޫނިދޫ ޖަލުގައި 15 ދުވަހަށް ބަންދުކޮށްފައިވާ، އޮކްޓޯބަރު 3 ވަނަ ދުވަހު ކުރި މުޒާހަރާގެ ބައިވެރިންގެ ބަންދުގެ މުއްދަތު ދަމަހައްޓަން ކްރިމިނަލް ކޯޓުން ނިންމައިފިއެވެ.

މިކަމާ ގުޅިގެން ރާއްޖެޓިވީ އަށް މައުލޫމާތު ދެއްވަމުން އެމްޑީޕީގެ ލީގަލް ޑިރެކްޓަރ އަހްމަދު މައުރޫފް ވިދާޅުވީ ކްރިމިނަލް ކޯޓުގައި ބޭއްވުނު އަޑުއެހުމުގައި، މިހާރު އެމީހުން ބަންދުގަ އިތުރަށް ބަހައްޓަންޖެހޭފަދަ ހާލަތެއް ނެތްކަމަށާއި އެހެންކަމުން ކުރީގަ 15 ދުވަސް ބަންދުކުރަން ކޯޓުން ނިންމި ނިންމުން މުރާޖާކޮށް އެނިންމުން ބަދަލުކޮށް އެމީހުން ދޫކޮށްލުމަށް އެދިފައި ވާނޭކަމަށެވެ. ނަމަވެސް ކޯޓުން ނިންމެވީ ކުރީގެ އަމުރުތައް ބަދަލު ކުރަންޖެހޭ ކަމަށް ނުވަތަ މުރާޖާކުރަން ޖެހޭފަދަ ސަބަބެއް ނެތްކަމަށެވެ. އަދި ކޯޓުން މި ނިންމުން ނިންމާފައިވަނީ އާމުކޮށް ކަންކުރާ ގޮތައް ނޫންކަމަށް ވެސް މައުރޫފް ފާހަގަކުރެއްވިއެވެ.

މީގެ އިތުރުން ދޫނިދޫގައި ބަންދުކޮށްފައިވާ ފަރާތްތަކަށް އަސާސީ ހިތުމަތްތައް ފޯރުކޮށްދިނުމުގައި ފުލުހުން އިހުމާލުވެފައިވާ ކަމަށް މައުރޫފް ފާހަގަކުރެއްވިއެެވެ. އެގޮތުން ފުލުހުން ހައްޔަރުކުރުމުގެ ތެރެއިން ކ. މާފުށި ކައުންސިލްގެ ރައީސް ހަސަން ސޮލާހުގެ އިނގިލި ބިންދާލާފައިވާ ކަމަށާއި އަދި ސޮލާހު އަށް ސިއްހީ ފަރުވާ ދިނުން ފުލުުން ގަސްދުގައި ލަސް ކޮށްފައިވާ ކަމަަށް ވެސް މައުރޫފް ވިދާޅުވިއެވެ. ބިންދާލާފައިވާ އިނގިލީގެ އެކްސްރޭ ނަގަން ޑޮކްޓަރު ބުނުމުން އެކްސްރޭ ކޮންމެހެން އަވަހަށް ނަގަން ނުޖެހޭ ކަމަށް ބުނެ ފުލުހުން އެކަމުގައި ވެސް ޖެއްސުންކޮށް އެކްސްރޭ ނެގުންވެސް ލަސްކޮށްފަވާކަމަށް މައުރޫފް ފާހަގަކުރެއްވިއެވެ.

މުޒާހަރާގައި ހައްޔަރުކުރެވުނު ފަރާތްތަކުގެ ތެރެއިން ދޫނިދޫ ޖަލުގައި ބަންދުކޮށްފައިވާ މީހުންނަކީ ކުރީގެ މަޖްލިސް މެމްބަރުން ކަމަށްވާ ޔައުގޫބް އަބްދުﷲ، ޔާސިރު އަބްދުއްލަތީފް، މާފުށި ކައުންސިލްގެ ރައީސް ހަސަން ސޮލާހް، އަލީ ޖުމާން، އަޒީމް އަލީ އަދި ހަސަން ޝާކިރު އެވެ. މުޒާހާރާގެ ހައްޔަރީން ދޫކޮށްލުމަށް ގޮވާލާ މާލޭގެ އިތުރުން، ހައްޔަރުކުރެވުނު ފަރާތްތައް ނިސްބަތްވާ ރަށްރަށުގައި ވެސް އެމްޑިޕީ އިން އިސްނަގައިގެން ތަފާތު ހަރަކާތްތައް ހިންގަމުންދެއެވެ.