ރައީސް ޑރ.މުހައްމަދު މުއިއްޒުގެ ސަރުކާރުގައި ނުހައްގުން މުއްސަންދިކަން ހޯދުމުގެ ސަގާފަތެއް ގާއިމްކޮށްފައިވާ ކަމަށް ގަލޮޅު ދެކުނު ދާއިރާގެ މެމްބަރު މީކާއީލް އަހްމަދު ނަސީމް ވިދާޅުވެއްޖެއެވެ.

ބުދަ ދުވަހުގެ ރޭ ކުރިއަށް ގެންދިޔަ ފަލަސުރުހީ ޕްރޮގްރާމްގައި މެންބަރު މީކާއީލް ވިދާޅުވީ ރައީސް މުއިއްޒުގެ މިސަރުކާރުގައި ޕީއެންސީގެ ރައްޔިތުން މަޖިލީހުގެ މެމްބަރުން އެމަނިކުފާނުގެ މަޅީގައި ޖެހިވަޑައިގެންފައިވާ ކަމަށާއި،އިތުރު އެއްވެސް އޮޕްޝަނެއް އެ މެންބަރުންނަށް މިއަދު ނެތް ކަމަށެވެ. އެބޭފުޅުންނަށް އޮތް އޮޕްޝަންއަކީ ރައީސް މުއިއްޒު ވިދާޅުވިއްޔާ ވިދާޅުވި ގޮތް ހައްދަވައިގެން މިފަސް އަހަރު ކެތްކުރެއްވުން ކަމަށާއި، އިތުރު ގޮތެއް ހަދާފިނަމަ ގޮނޑި ގެއްލި، ދައްކަންޖެހޭ ބޮޑެތި ލޯނުތައް ދެއްކުމަށް ފައިސާ ނުލިބޭނެ ކަމަށް މެންބަރު މީކާއީލް ވިދާޅުވިއެވެ. އަދި ވިދާޅުވީ މުލިޔާގެއިން ދޭ ޚާއްސަ އިނާއަތަށް ޝަރުތު ހަމަނުވާނެ ކަަމަށެވެ.

މެމްބަރު މީކާއީލް ވިދާޅުވީ ރައްޔިތުންގެ މަޖިލީހުގައި ވެލިދޫ ދާއިރާ މެމްބަރު އެދާއިރާގެ ކަންބޮޑުވުންތައް މަޖިލީހުގައި ބަންޑުން ކޮށްލުމުގެ ނަތީޖާ ވަރަށް ހިތި ކަމަށެވެ. ފެނިގެންދިޔައީ ދާއިރާގެ ހުރިހާ ރަށެއްގެ މަޝްރޫއުތައް ހުއްޓިގެން ދިޔަ މަންޒަރު ކަމަށާއި، ރައްޔިތުންނަށް ދަތި ކުރުމުގެ މަންޒަރު ކަމަށް މެމްބަރު މީކާއީލް ވިދާޅުވިއެވެ.

މިހާރު ފާސްކުރުމަށް މަސައްކަތް މީޑިއާ ކޮންޓްރޯލް ބިލަށް އިޝާރާތް ކުރައްވައި މެމްބަރު މީކާއީލް ވިދާޅުވީ މި ބިލަށް ވެސް ޕީއެންސީގެ މަޖިލިސް މެމްބަރުން ދެކޮޅަށް ވާހަކަ ދައްކަވާ ކަމަށާއި، ނަމަވެސް ސާރުކާރާ ދެކޮޅަށް ފާޅުގައި އެއްޗެއް ވިދާޅުވާން ކެރިވަޑައިނުގަންނަވާ ކަމަށެވެ. މިއީ ރަނގަޅު ބިލެއް ނޫން ކަމަށާއި، އަނެއްކާ ވެސް ސަރުކާރުން ޖަހާ ދަންތުރައެއްކަން އެ މެންބަރުން ވެސް ގަބޫލުކުރައްވާ ކަމަށް މެމްބަރު މީކާއީލް ވިދާޅުވިއެވެ.

މީގެ އިތުރުން މެމްބަރު މީކާއީލް ވިދާޅުވީ މިސަރުކާރާއެކު ގައުމުގައި ނޭދެވޭ ގޮތްގޮތަށް މުއްސަންދިކަން ހޯދުމުގެ ސަގާފަތެއް ގާއިމްވެފައިވާ ކަމަށާއި، އެކަން ޕީއެންސީގެ މަޖިލިސް ގިނަ މެމްބަރުގެ މާލީ ބަޔާންތަކުން ހާމަވާ ކަމަށެވެ. އަދި ވިދާޅުވީ ލިބޭ އާމްދަނީއަށްވުރެ ބޮޑު އެއްޗެއް ލޯނުތަކަށް ދައްކާ ކަމަށާއި، މި ދެކޮޅު ނުޖެހޭ ކަމަށެވެ.

މެމްބަރު މީކާއީލް ވިދާޅުވީ މިސަރުކާރަށް ބިނާކުރަނިވި ގޮތެއްގައި ބަހެއް ބުނާ މީހުންނަށް ޕީނަލައިޒް ކުރަން ކޮންމެވެސް ކަމެއް ކުރާ ކަމަށެވެ.

އެގޮތުން ސިޔާސީ ދައުވާ ކުރުމާއި، ކޯޓަށް ގެންދިއުމާއި، ސިޔާސީ ގޮތުން ވަޒީފާގެ ފުރުސަތުތައް ލިބޭ ކަމަށް މެމްބަރު މީކާއީލް ވިދާޅުވިއެވެ.