ގްރީން ސްޓްރީޓްގެ ކެޕްޓަން ފަރުހާދު އިސްމާއިލް (ފަރޭ) ދެ މެޗަށް ސަސްޕެންޑުކޮށް 3،000 ރުފިޔާއިން ޖޫރިމަނާ ކޮށްފި އެވެ.

ފަރޭ ސަސްޕެންޑުކޮށްފައި ވަނީ އުރީދޫ ދިވެހި ޕްރިމިއާ ލީގުގައި ނިއުރޭޑިންޓް އަދި ގްރީން ސްޓްރީޓް ބައްދަލު ކުރި މެޗުގައި ހިނގައިދިޔަ ކުޅިވަރުގެ ރޫހާ ހިލާފް ކަންތައްތަކުންނެވެ.

އެފްއޭއެމް އިން ނެރުނު ނޫސްބަޔާނެއްގައި ބުނީ ނިއު އަތުން 0-1 ގެ ނަތީޖާއަކުން ގްރީން ބަލިވި  މެޗުގައި ގޮނޑިބަރީގައި ހުރެ މެޗުގެ ރެފްރީއާ މުހާތަބުކޮށް ފަރޭ ދެއްކި ވާހަކަތަކުގެ ސަބަބުން ޖޫރިމަނާ ކޮށްފައިވާ  ކަމަށެވެ.

މެޗުގެ ކުރީކޮޅު ބަދަލު ކުރި ފަރޭ އިނީ މެޗު ނިމެންދެން ގޮނޑި ބަރީގައެވެ. އެގޮތުން އެފްއޭއެމް އިން ބުނީ ގޮނޑިބަރީގައި ހުރެ ރެފްރީ އަށް މުހާތަބްކޮށް ފަރޭ ދެއްކި ވާހަކަ ތަކަކީ ކުލަބެއްގެ ކެޕްޓަނެއްގެ ފަރާތުން ފެނިގެންނުވާނެ ފަދަ ޒިންމާދާރުކަން ކުޑަ އަމަލެއް ކަމަށާއި، އޭނާގެ ވާހަކަތަކީ މެޗު އިތުރަށް ހޫނެވެ، މަސްރަހު ގޯސްވާނެ ފަދަ އަމަލެއް ކަމަށެވެ.

ފަރޭގެ އިތުރުން ގްރީންގެ އޮފިޝަލް އާދިފް ރަޝީދު ވެސް ވަނީ ޖޫރިމަނާ ކޮށްފައެވެ. އޭނާ ޖޫރިމަނާ ކުރީ 6،000 ރުފިޔާއިންނެވެ.. އެފްއޭއެމް އިން ބުނީ އޭނާ ޖޫރިމަނާ ކުރަން ނިންމީ ރެފްރީ އަށް ނިސްބަތްކޮށް ހަޅޭއްލަވާ، ބެންޗުން ފޮނުވާލުމުން ނިއުރޭޑިއަންޓްގެ ކޯޗަށް ހަމަލާދޭން މަސައްކަތް ކޮށްފައި ވާތީ ކަމަށެވެ.