ރައީސް ޑރ. މުހައަމްދު މުއިއްޒުގެ މި ސަރުކާރުގެ ކޮންމެ ދިމާއަކަށް ބަލާލި ނަމަވެސް ފެންނަމުން ދަނީ ވައްކަމާއި އޮޅުވާލުން ކަމަށް ވައިކަރަދޫ ދާއިރާގެ މަޖިލިސް މެމްބަރު ހުސެއިން ޒިޔާދު ވިދާޅުވެއްޖެއެވެ.
ހުކުރު ދުވަހުގެ ރޭ އެމްޑީޕީން އިންތިޒާމްކޮށްގެން ބޭއްވި "ފުދިއްޖެ، ފުނޑިއްޖެ" މުޒާހަރާގައި ވާހަކަ ދައްކަވަމުން ޒިޔާދު ވިދާޅުވީ މި ސަރުކާރުން ކުރަމުން އަންނަ އެންމެ ބޮޑު ވައްކަމަކީ ޑީއެންއާރުން ރައްޔިތުންގެ ޒާތީ މައުލޫމާތު ވަގަށް ނަގައިގެން އަމިއްލަ ޕާޓީ މެމްބަރުން އިތުރުކުރުން ކަމަށާއި ކޮންމެ ދިމާއަކަށް ބަލާލިޔަސް ފެނިގެން ދަނީ މުއިއްޒުގެ މި ސަރުކާރުގެ މިފަދަ ބޮޑެތި ވައްކަމާއި އޮޅުވާލުން ކަމަށެވެ.
ޒިޔާދު ވިދާޅުވީ މި ސަރުކާރުގެ ވަޒީރެއް ވެސް އެމްޑީއެއްވެސް ބޭރުކުރާއިރު އޭގެ ފަހަތުގައި ބައިވަރު ކަންކަން އެބަ ހިނގާކަމަށާއި ކޮންމެ ދިމާއެއްގައި ވެސް އޮތީ ވައްކަންކަމަށެވެ. އަދި ރައީސް މުއިއްޒު އެ ހިންގަވަނީ ރަނގަޅު މަގަކުން ނޫންކަން މިއަދު ވަރަށް ރަނގަޅަށް ސާފުވެ ހާމަވެގެން ހިންގަށްޖެކަމަށެވެ.
އޭނާ ވިދާޅުވީ ބަހެއް ނުބުނެ އެއް އަހަރު މަޑުކޮށްލައިގެން ތިބެވިއްޖެ ކަމަށާއި އެކަމަކު ދެން ސަރުކާރުން ހަދާނެހާއެއްޗެއް ހަދަން ފުރުސަތު ދީގެން ބަލަން ނުތިބޭނެކަމަށެވެ. އަދި ރައްޔިތުންގެ ހައްޤުގައި އަބަދަުވެސް އެމްޑީޕީ އޮންނާނެ ކަމަށް އޭނާ ވިދާޅުވިއެވެ.
ޒިޔާދު ވިދާޅުވީ އެމްޑީޕީ އަކީ ރައްޔިތުންގެ ހައްޤުގައި ވަކާލާތު ކުރާ އަދި އެ ރައްޔިތުންގެ ހައްޤުގައި ވާންޖެހުނު ކޮންމެ ގުރުބާނީއެެއްވެސް ވާން ތައްޔާރަށް އޮތް ޕާޓީއެއް ކަމަށާއި މީގެ ކުރީގައި ވެސް އެމްޑީޕީން އޮންނާނީ ރައްޔިތުންގެ ހަޤުގައި ނުކުމެފައިކަމަށެވެ.
ޒިޔާދު ވިދާޅުވީ ރައްޔިތުންގެ މަޖިލީހުގެ މެމްބަރުން ތަޅު އެޅުވިގެން ދިއައިރުވެސް ތި ހަދަނީ ގޯހެކޭ ބުނެ އަޑު އުފުލި ކަމަށާއި އަދި ތި ދޫކޮށްލަނީ އަމިއްލަ އަތުގައި އޮތް ބާރެއްކަމަށް ވެސް ބުނެދިނިންކަމަށެވެ. އެހެންނަމަވެސް ރައީސް މުއިއްޒަށް އޮތް އިތުބާރުގެ ބޮޑުކަމުން ދަހިވެތިވެގެން ތިބެ އެ ގޯސް ހެދީކަމަށް އޭނާ ވިދާޅުވިއެވެ.
އަދި އޭރު ކުރި އާދޭސް އަޑު ނޭހުމުގެ ނަތީޖާ މިހާރު ފެންނަމުން ދާކަމަށާއި މައި މުގުލުގައި ބައްދައިގެން މިއަދު މަޖިލިސް މެމްބަރުން އެ ތިބެނީ ތުރުތުރުއަޅައަޅާކަމަށް ވެސް އޭނާ ވިދާޅުވިއެވެ. އަދި މި ސަރުކާރުގެ ވަޒީރުންވެސް އެތިބީ ބިރުން ތުރުތުރުއަޅައި ހަދާނެގޮތް ހުސްވެ، ކުރާނެ ކަމެއް ނޭގިފައި ކަމަށް ވެސް އޭނާ ވިދާޅުވިއެވެ.
ޒިޔާދު ވިދާޅުވީ މިއަދު އެ ބޭފުޅުން މަސައްކަތް މިކުރައްވަނީ އަލުން އިހު އޮތް ގޮތަށް ގާނޫނު އަސާސީ ރުޖޫޢަ ކުރަންކަމަށާއި މި މަސައްކަތް ކާމިޔާބު ކޮށްފައި ނޫނީ މަސައްކަތް ހުއްޓާ ނުލާނެކަމަށެވެ. އަދި ފޮތުގައި އޮތްގޮތަށް އެއް އަހަރު ދީފަ، ކުޑަ ޖަލްސާއަކުން ބޮޑު ޖަލްސާއަކުން މިއީ ހިނގާލުމެއްކަމަށާއި އަދި މިނޫން ސްޓޭޖްތައް ވެސް އެބަހުރިކަމަށް ޒިޔާދު ވިދާޅުވިއެވެ.
ސަރުކާރުގެ ވަޒީރެއް ވެސް އެމްޑީއެއްވެސް ބޭރުކުރާއިރު އޭގެ ފަހަތުގައި ބައިވަރު ކަންކަން އެބަ ހިނގާ. ކޮންމެ ދިމާއެއްގައި ވެސް އޮތީ ވައްކަން، މިއަދު ފެންނާނެ ރައީސުލްޖުމްހޫރިއްޔާއަށް ވެސް އަދި ތި ހިންގަވަނީ ރަނގަޅު މަގުން ނޫންކަން. ބަހެއް ނުބުނެ އެއް އަހަރު އަޅުގަނޑުމެން މަޑުކޮށްލައިގެން ތިބީ. އެކަމަކު ދެނެއް ނުތިބޭނެ. ރައްޔިތުންގެ ހައްގުގައި އެމްޑީޕީ އަބަދުވެސް ނުކުންނާނެ. މީގެ ކުރީގައި ވެސް ނުކުމެފަ އޮތީ. ދެންވެސް ނުކުންނާނެ. މެމްބަރުން ތަޅު އެޅުވިގެން ދިއައިރުވެސް އަޅުގަނޑުމެން ދެއްކި ވާހަކަ. ތި ހަދަނީ ގޯހެކޭ. އަމިއްލަ އަތުގައި އޮތް ބާރެކޭ ތި ދޫކޮށްލަނީ. އެހެންނަމަވެސް އިތުބާރު އޮތްލެއް ބޮޑުކަމުން. މިއަދު އެ ފެންނަނީ ފުރަތަމައިނުންވެސް އެ ބެއްދީ މައި މުލުގަ. މިއަދު މަޖިލިސް އެ ތިބެނީ ތުރުތުރުއަޅައަޅާ. ވަޒީރުން އެ ތިބެނީ ހަދާނެ ގޮތް ހުސްވެފައި.ވައިކަރަދޫ ދާއިރާގެ މަޖިލިސް މެމްބަރު ހުސެއިން ޒިޔާދު
ޒިޔާދު އިތުރަށް ވިދާޅުވީ މި ސަރުކާރަށް މިއަދު އަޑު ނީވިއްޖެއްޔާ ދެން އަޑު އިވޭނެ އެހެން ގޮތްގޮތްވެސް އެބަހުރިކަމަށާއި ދިވެހި ރައްޔިތުން މިތިބީ މިކަން ކުރަން ފިސާރި ކެރިގެން ކަމަށެވެ. އަދި މިކަމުން ފަހަތައް ނުޖެހޭނެކަމަށް ވެސް އޭނާ ވިދާޅުވިއެވެ.
ޒިޔާދު ވިދާޅުވީ މި ސަރުކާރުން މުޅި ގާނޫނު އަސާސީ ފުނޑާލާފައި ރައްޔިތުންގެ އަސާސީ ޚިދުމަތަށް ހުރި ފައިސާއިން ވައްކަން ކުރަމުން ދާކަމަށާއި އަދި ވައްކަން ކުރަނީ ރައްޔިތުންގެ އެއްމެ ޒާތީ މައުލޫމާތުން ކަމަށެވެ.
އޭނާ ވިދާޅުވީ ސަރުކާރުން ކުރާނެހާ ވައްކަމެއް ކޮށް، ކަންކަން އެ ހިސާބަށް ދަންދެން މަޑު ނުކުރާނެކަމަށާއި މި ނުކުތީ، މި ނުކުތުން ނިންމާނީ މިއަޑު ރައީސުލްޖުމްހޫރިއްޔާ އަށް އަޑު އިވޭ ހިސާބަށް ގެންގޮސްފައިކަމަށެވެ.
