އެތައް ބައެއްގެ ގުރުބާނީގެ ސަބަބުން, ބާރުތައް އެއްކޮށްގެން ކުރި ދިގު ވެރިކަމެއް ނިންމައި، ޒަމާނީ ޑިމޮކްރަސީ ރާއްޖެއަށް ގެނެވުނުތާ 16 އަހަރުވެގެން ދިއައީއެވެ. މި ކުރު މުއްދަތުގެ ތެރޭގައި ދިވެހީން އެތައް ވެރިކަމެއް ދެކި, ލައްކަ ތަޖުރިބާ ކޮށްފިއެވެ. ނަމަވެސް މިއަދު މި އޮތް ރައީސް ޑރ. މުޙައްމަދު މުއިއްޒުގެ ވެރިކަން ވަރުގެ ވެރިކަމެއް ދިވެހި ތާރީޚުގައި ވެސް ނާންނަކަމަށް ދިވެހި ރައްޔިތުން ދަނީ ބުނަމުންނެވެ.

މިއަދު ރައްޔިތުން ބުނާގޮތުންނަމަ ރައީސް މުއިއްޒުހައި އިތުރުފުޅުހައްދަވައި މަކަރުވެރި ވެރިއެއް އަދި މިހާތަނަށް ތަޖުރިބާ ނުކުރެވެއެވެ. މިހާ ވައްކަމާއި ކަރަޕްޝަން ގިނަ ވެރިކަމެއް ދިވެހި ތާރީޚުގައި ވެސް ތަޖުރިބާ ނުކުރެވެއެވެ.

ރައީސް މުއިއްޒުގެ މި ސަރުކާރު އައިތާ އަދި މިވީ އަހަރަކާއި މަދު ދުވަސްކޮޅެކެވެ. ސަރުކާރަށް މިވީ މަދު ދުވަސްކޮޅުގެ ތެރޭގައި ދިވެހި ތާރީޚުގައި ދެކެފައިނުވާވަރުގެ ބޮޑެތި ވައްކަމާއި ހިޔާނާތާއި ކަރަޕްޝަނަންގެ އަމަލުތައް މިވަނީ ހިންގާފައެވެ. އެގޮތުން އެޗްޑީސީގެ ބޮޑު ވައްކަމާއި ހިޔާނާތުގެ މައްސަލައިގެ އިތުރުން އެފްއެސްއެމްގެ ތެލުގެ ބޮޑު ވައްކަމަކީ ފަހގެ ތާރީޙެއްގައި މިގައުމުގައި ހިނގި އެންމެ ބިޔަބޮޑު ވައްކަންކަތަކުގެ ތެރެއިން ހިމެނޭ ވައްކަމެވެ.

ދެން އަސްލު މި ދަންނަވަން އުޅޭ އެއަޗްކަށް އަލި އަޅުވާލާނަމެވެ.

ރައީސް މުއިއްޒުގެ މި ސަރުކާރުގެ ވައްކަމުގެ ވާހަކަ ދެކެވެމުން ދަނިކޮށް މިހާރު ފެންމަތިވެގެން އުޅެނީ އަދި އެއަށްވުރެވެސް މާ ބޮޑުކަމަށް ދިވެހި ރައްޔިތުން ބުނަމުން އަންނަ ބޮޑު ވައްކަމެއްގެ ވާހަކައެވެ. އެއީ ހެއްކާއި ގަރީނާ ހުރި، ކަނަޑައެޅިގެން ދޮގުކުރެވެން ނެތް ބޮޑު ވައްކަމެއްގެ ވާހަކަ އެވެ. ޑީއެންއާރުން ޑޭޓާ ވަގަށް ނަގައިގެން އާންމު ރައްޔިތުންގެ ތެރެއިން އެތައް ބައެއްގެ ޒާތީ މައުލޫމާތު ނަހަމަގޮތުގައި ބޭނުންކޮށްގެން ވެރިކަން ކުރާ ޕާޓީ، ޕީއެންސީއަށް މެމްބަރުން އިތުރުކުރި ވާހަކަ އެވެ.

އިދިކޮޅު ޕާޓީ އެމްޑީޕީން ދުވަހު ބޭއްވި ނޫސްވެރިންގެ ބައްދަލުވުމުގައި ވެސް ފާހަގަކުރި ގޮތުގައި ޕީއެންސީން ވަނީ 3000 އަށް ވުރެ، ގިނަ މެމްބަރުން ވަގަށް ވައްދާފައެވެ.

މި ސަރުކާރުން ކުރި މި ބޮޑު ވައްކަމުގެ ހެކިތައްވެސް ފެންނަން އެހެރީއެވެ. ރައްޔިތުންގެ ޒާތީ މައުލޫމާތުން ވައްކަން ކުރަމުންދިޔަ މަންޒަރުގެ ފޮޓޯތައް ވެސް ވަނީ  އާންމުވެފައެވެ. ސޯޝަލް މީޑިއާގައްޔާއި އެހެނިހެން ގޮތްގޮތުންނެވެ. ފެންނަ ފޮޓޯތަކުން އެނގޭ ގޮތުގައި ވަގު ފޯމުތައް ފުރަމުންދިޔައީ ދައުލަތުގެ އިމާރާތްތަކުގައި ދައުލަތުގެ ވަސީލަތްތައް ބޭނުން ކޮށްގެން ދައުލަތުގެ މުވައްޒަފުންނެވެ.

މިއީ ތޯތޯވާހަކައެއް ނޫނެވެ. ރައްޔިތުންގެ ޒާތީ މައުލޫމާތުން ވައްކަން ކުރި ކަމަށް ސީދާ ވެރިކަން ކުރާ ޕާޓީ، ޕީއެންސީއިން ވެސް ވަނީ އެއްބަސްވެފަ އެވެ. ވަގަށް އެތައް ފޯމުތަކެއް ފުރާ، އީސީއަށް ފޮނުކަމަށެވެ.

މިއީ، މިހާ ފާޅުކަން ބޮޑު ގޮތެއްގައި، ލަދެއް ނެތި، އާންމުންގެ މައުލޫމާތުން ވައްކަން ކުރި ފުރަތަމަ ފަހަރެވެ. އެކަން ކުރީ ސަރުކާރު ހިންގާ މައި ޕާޓީއެވެ. މިހާރުގެ ރައީސް މުއިއްޒާއި، މަޖިލިސް ރައީސް ބަދުއްރަހީމް އަބްދުﷲ ވެސް ހިމެނިވަޑައިގަންނަވާ ޕާޓީއެވެ. އެއީ މި ސަރުކާރުން ކުރި ބޮޑު ވައްކަމެކެވެ.

ވަގު ފޯމު ފުރައިގެން ވަގަށް ޕާޓީއަށް މީހުން ވައްދައިގެން ހާސިލްކުރަން މިއުޅެނީ ކޮންކަމެއްތޯއެވެ؟ ކުރަން މިއުޅެނީ ކީއްތޯއެވެ؟ މި ސުވާލުތަކުގެ ޖަވާބު ވަރަށް ސާފެވެ. މި ސަރުން ވަގު ފޯމު ހުށަހަޅައިގެން ޕާޓީއަށް މެމްބަރުން އިތުރުކުރުމުގެ އޮތީ ހަމައެންމެ މަގްސަދެކެވެ. އެއީ ދައުލަތުގެ ބަޖެޓުން ސިޔާސީ ޕާޓީތަކަށް ދޭ ފައިސާގެ ބޮޑު ބައެއް ހޯދުމެވެ. ވައްކަމުގެ މައްޗަށް ވައްކަމެވެ.

ރޯމާ ދުވާލު، އެންމެންގެ ކުރިމަތީގައި ބޮޑެތި ވައްކަންތައް ހިނގާއިރު ވެސް ދައުލަތުގެ ކަމާ ބެހޭ މުއައްސަސާތަކުން އެކަމާ އަޅާލާކަށް ބޭނުމެއް ނުވެ އެވެ. އެފަދަ ކަމަކާ ސީރިއަސްވާ ތަނެއް ވެސް ނުފެނެ އެވެ. ޕާޓީތަކުގެ ރަޖިސްޓްރީ ބަލަހައްޓަން މަތިކޮށްފައިވާ އިލެކެޝަންސް ކޮމިޝަނުން ވެސް އެޅި ފިޔަވަޅެއް ނެތެވެ. އެފަދަ ކަންތައް ތަހުގީގުކޮށް ވައްކަން ކުރި މީހުން އިންސާފުގެ ކުރިމައްޗަށް ގެންނަން ޖެހޭ ފުލުހުންގެ މުއައްސަސާއަކުން ވެސް އެއިން ކަމަކާ އަޅައެއް ނުލަ އެވެ.

ސިޔާސީ ޕާޓީއަކަށް ވައްދަން ވަގު ފޯމު ފުރަނީ ގާނޫނީ އެތައް ކުށެއް ކުރުމަށްފަހެވެ. އާންމުންގެ ޒާތީ މައުލޫމާތަށް ގާނޫނާ ހިލާފަށް އެކްސެސްވެ އެވެ. ގާނޫނީ ގޮތުން ވަގު ލިޔުމެއް އުފައްދަ އެވެ. ގާނޫނީ އިދާރާތަކަށް އޮޅުވާލަން މަސައްކަތް ކުރެ އެވެ.

އެއީ ބޮޑެތި ކުށްތަކެވެ. ގާނޫނުތަކުގައި ބަޔާންކޮށްފައި ހުރި، އެ ކުށްތަކަކަށް އަދަބު ކަނޑައަޅަންޖެހޭ ކުށްތަކެވެ. ގާނޫނީ ވެރިކަމެއްގައި ތަންފީޒު ކުރަންޖެހޭ އަދަބުތަކެކެވެ.

ދިވެހިރާއްޖޭގެ ގާނޫނުލްއުގޫބާތުގެ 310 ވަނަ މާއްދާގައި ބުނެފައި ވަނީ، ވަކި ލިޔުމަކީ ވަކި މީހަކު ހެދި އެއްޗެއް ކަމަށް ދެއްކުމަށްޓަކައި ނުވަތަ ވަކި އަސްލެއް އޮތް އެއްޗެއް ކަމަށް ސައްހަ ނޫން ގޮތުގައި ދެއްކުމަށްޓަކައި ލިޔުމެއް އުފެއްދުމާއި، ނަކަލު ކުރުމަކީ ކުށެއް ކަމަށެވެ.

އެކުށަކީ ހަތަރު ވަނަ ދަރަޖައިގެ ކުށެއް ކަމަށް އެ މާއްދާގެ ނ. ގައި ބުނެ އެވެ. އެހެންކަމުން އެކުށުގެ އަސާސީ އަދަބަކަށް ވާނީ އެއް އަހަރާއި ހަތް މަހާއި ހަ ދުވަހަށް ޖަލަށްލުމެވެ. ސައްހަ ނޫން ގޮތުގައި ހުށަހެޅި ކޮންމެ ފޯމަކީ ވަކި ކުށެކެވެ.

ސިޔާސީ ޕާޓީތަކުގެ ގާނޫނުގެ 49 ވަނަ މާއްދާގައި ސިޔާސީ ޕާޓީއެއްގެ މެންބަރުކަމަށް، ގަވާއިދާ ހިލާފަށް މީހެއްގެ ނަން ހުށަހަޅައިފި ނަމަ އެކަން ކުރި ފަރާތެއް 5000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރަންޖެހެ އެވެ. ކޮންމެ ވަގު ފޯމަކަށް އަންނާނީ ވަކި ޖޫރިމަނާއެކެވެ.

ޒާތީ މައުލޫމާތުން ވައްކަން ކުރުމަކީ ދޫކޮށްލެވޭނެވަރުގެ ކުށެއް ނޫނެވެ. އިލެކްޝަންސް ކޮމިޝަނަށް ވަގު ފޯމު ހުށަހެޅުމަކީ ވެސް ހަމަ އެ ވަރުގެ ބޮޑު ކުށެކެވެ. އެ ކުށްތަކަށް ޒިންމާވާންޖެހޭ މީހުންނަށް އަދަބު ދޭންޖެހެ އެވެ. ނޫން ނަމަ، މި ގައުމުގައި ގާނޫނެއް ގަވާއިދެއް ނުހިނގަ އެވެ. އެއިރުން އެންމެން އުޅެންވީ ޖަންގަލީގެ އުސޫލަށް ތަބާވެގެންނެވެ. ބާރުގަދަ މީހާ ބޭނުން ގޮތެއް ހަދަންވީ އެވެ. ނިކަމެތި މީހާ އެކަން ދަނެގެން އުޅެންވީ އެވެ.

ހިތައް އަހަރައެވެ. މި ސަރުކާރާއި ދައުލަތުގެ މުއައްސަސާތައް ވެއްޓުމުން ރާއްޖޭގައި އޮންނާނީ ކޮން އަދުލުވެރިކަމަކާ އިންސާފެއް ހެއްޔެވެ. އަދުލުވެރިކަމާއި އިންސާފު ނެތް ތަނެއްގައި އަމާންކަމާ ހަމަޖެހުމެއް ނޯންނާނެ އެވެ. ދިވެހި ގައުމުގެ މުސްތަގުބަލް ސަލާމަތްވާން އޮތީ މި ނުބައި އަމަލު ހުއްޓުވިގެންނެވެ.