ސްޕެނިޝް ލަލީގާގައި އާދިއްތަ ދުވަހުގެ ރޭ ކުޅުނު މެޗުތަށް ބާސާ އާއި ރެއާލްއިން ކާމިޔާބުކޮށްފިއެވެ.

އަމިއްލަ ދަނޑުގައި ރެއާލް ބެޓިސްއާ ވާދަކޮށް ބާސާއިން މެޗު ކާމިޔާބުކޮށްފައި ވަނީ 2-0 ގެ ނަތީޖާއަކުންނެވެ.

ފުރަތަމަ ހާފު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ ބާސާއެވެ. އެ ޓީމަށް ބެޓިސްގެ ގޯލު ފޫއަޅުވާލެފައި ވަނީ މެޗުގެ 36 ވަނަ މިނުޓުގައެވެ. މި ގޯލަކީ ބާސާގެ ޑެއުލޮފޯ ނެގި ހުރަހެއް ޑިފެންޑް ކުރަން އުޅުމުގެ ތެރޭގައި ބެޓިސްގެ ކުޅުންތެރިޔެއް އަތުން ބައިކޮޅަށް ވަން ގޯލެކެވެ.  

މެޗުގެ 39 ވަނަ މިނުޓުގައި ބާސާއަށް މެޗުގެ ލީޑު ފުޅާކޮށްދިނީ އެ ޓީމުގެ މިޑްފީލްޑާ ސާޖީ ރޮބާޓޯއެވެ. މި ލަނޑަކީ ވެސް ޑެއުލޮފޯ ނަގައިދިން ހުރަހަކުން ރޮބާޓޯ ކާމިޔާބުކޮށްދިން ގޯލެކެވެ. ފުރަތަމަ ހާފު ނިމިގެން ދިޔައީ 2-0 ގެ ނަތީޖާއަކުން ބާސާ ކުރީގައި އޮވެގެންނެވެ.

ދެވަނަ ހާފުގައި ވެސް ބާސާއިން ވަނީ ބެޓިސްގެ ގޯލަށް އަމާޒުކޮށް ގިނަ ހަމަލާތަކެއް އުފައްދާފައެވެ. އެގޮތުން ބާސާގެ ފޯވާޑް މެސީ ފޮނުވާލި އެތަކެއް ހަމަލާތަކެއް އަމާޒުވެފައި ވަނީ ބެޓިސްގެ ގޯލު ދަނޑިއާއެވެ. ބާސާއިން މި މެޗާ ކުރިމަތިލާފައި ވަނީ އެ ޓީމުގެ ގިނަ ތަރިންތަކެއް ނުލައެވެ. އެހެން ނަމަވެސް އެ ޓީމުން ވަނީ މުޅި މެޗުގައި ވެސް ރަނގަޅު ކުޅުމެއް ދައްކާފައެވެ.

ރެއާލްއިން ޑެޕޯޓިވޯ އާއި ވާދަކޮށް މެޗު ކާމިޔާބުކޮށްފައި ވަނީ 3-0 އަކުންނެވެ.

މެޗުގެ ފުރަތަމަ ހާފުގައި ރެއާލްއިން ވަނީ ދެ ލަނޑުގެ ލީޑެއް ނަގާފައެވެ. މި ލަނޑުތައް އެ ޓީމަށް ކާމިޔާބުކޮށްދީފައި ވަނީ ކަސެމީރޯ އާއި ގެރެތު ބޭލްއެވެ.  މި ލަނޑުތަކާ އެކު ރެއާލްއިން ވަނީ ފުލުފުލުގައި އެތަކެއް ހަމަލާތަކެއް ޑިޕޯޓިވޯގެ ގޯލާ އަމާޒުކޮށްފައެވެ.

އެގޮތުން މެޗުގެ 63 ވަނަ މިނުޓުގައި ރެއާލްއަށް އެ ޓީމުގެ ތިންވަނަ ގޯލު ކާމިޔާބުކޮށްދީފައި ވަނީ މިޑްފީލްޑަރ ޓޯނީ ކްރޫސްއެވެ. މި މެޗުގެ 90 ވަނަ މިނުޓުގައި ރެއާލްގެ ކެޕްޓަން ސާޖިއޯ ރާމޯސްއަށް ވަނީ ދެވަނަ ރީނދޫ ކާޑާ އެކު ރަތް ކާޑު ދައްކައި ދަނޑުން ފޮނުވާލާފައެވެ.

މި މޮޅާ އެކު ރެއާލް އޮތީ ކުޅުނު އެއް މެޗުން ލިބުނު ތިން ޕޮއިންޓާ އެކު ތާވަލުގެ އެއްވަނައިގައެވެ. ލަނޑުގެ ތަފާތުން ތާވަލުގެ ދެވަނައިގައި އޮތީ ބާސާއެވެ. މިދިޔަ ސީޒަނުގައި ސްޕެނިޝް ލަލީގާ ކާމިޔާބުކޮށްފައި ވަނީ ރެއާލް މެޑްރިޑުންނެވެ.