ޖެނުއަރީ 13 ން 18 އަށް ރާއްޖޭގެ ބޮޑު ބަޔަކަށް މޫސުން ވަރަށް ގޯސް ވާނެ ކަމަށް ލަފާ ކުރެވޭތީ ލިބިދާނެ ގެއްލުންތަކުން ދުރާލާ ރައްކައުތެރިވުމަށް މަސައްކަތް ކުރުމަށް ނޭޝަނަލް ޑިސާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސް ކޮށްފިއެވެ.

މި ގޮތުން ސަމާލުކަން ދޭން ޖެހޭ ކަންކަމުގެ ތެރޭގައި ކާބޯތަކެއްޗާއި ޒަރޫރީތަކެއްޗަށް ދަތިނުވާނޭހެން އިންތިޒާމް ހަމަ ޖެއްސުމަށް ސަމާލުކަން ދިނުމަށް އެންޑީއެމްއޭ އިން ބުނެފައިވެއެވެ.

ޤައުމީ މޫސުމާބެހޭ އިދާރާއިން ލަފާކުރާ ގޮތުގައި، ދިވެހިރާއްޖޭގެ އިރުން ބަންގާޅު ކަނޑުގެ ދެކުނު-ހުޅަނގު ސަރަޙައްދުގައި އުފެދިފައިވާ ކޮޅިގަނޑު ހުޅަނގަށް ޖެހިގެން ދާނެކަމަށް ބެލެވެއެވެ. މިކަމުގެ ސަބަބުން ޖަނަވަރީ 13 އިން 18 އާ ދެމެދު ރާއްޖޭގެ ބޮޑު ބަޔަކަށް، ގުގުރާ އަދި ވިއްސާރަވެދާނެ ކަމަށް މެޓުން ވަނީ ބުނެފައެވެ. އަދި މީގެ ސަބަބުން ވައި ގަދަވެ، ކަނޑު ގަދަވެ، އަދި ބައެއް ރަށްތަކަށް ރާޅު އަރާފާނެ ކަމަށް ބެލެވެއެވެ.

"މޫސުން ގޯސްވެ ލިބިދާނެ ގެއްލުންތަކުން ރައްކައުތެރިވުމަށް ދުރާލާ މަސައްކަތް ކުރުމަށް އިލްތިމާސް ކުރަމެވެ." އެންޑީއެމްއޭ އިން ނެރެފައިވާ ބަޔާނުގައި ވެއެވެ.

މޫސުން ގޯސްވުމުގެ ސަބަބުން ލިބިދާނެ ގެއްލުންތައް ކުޑަކުރުމަށް އަޅަންވީ ފިޔަވަޅުކުގެ ތެރޭގައި އެންޑީއެމްއޭ އިން ފާހަގަ ކޮށްފައިވާ ކަންތައްތަކުގެ ތެރޭގައި ފެންބޮޑުވެދާނެކަމަށް ސަމާލުވެ، ގެއަށް ފެން ނުވަންނާނެހެން ގޭގެ ދޮރުމަތީގައި ވެލިގޯނި ނުވަތަ އެފަދަ ހުރަސްތައް ބެހެއްޓުމާއި، ފެންބޮޑުވާ ސަރަޙައްދުތަކުގައި ސައިކަލާއި އެހެނިހެން އުޅަނދުފަހަރު ޕާކުކުރުމުން ދުރުހެލިވުމާއި، ފިހާރަތަކާއި، ގުދަންތަކާއި، ކެފޭތަކާއި އަދި އެހެނިހެން މުދާ ރައްކާކުރާ ތަންތަނުގައި ހުންނަ ވިޔަފާރި ވަސީލަތްތަކާއި އަގުބޮޑު މުދާތައް ގެއްލުމުން ސަލާމަތްކުރުމަށް ދުރާލާ ފިޔަވަޅު އެޅުމާއި، ކާބޯތަކެއްޗާއި ދޮންނަ މެޝިނާއި ފްރިޖު ފަދަ ސާމާނު ފެންބޮޑުވެދާނެ ސަރަޙައްދުތަކުން ނަގައި އުސް އަދި ރައްކާތެރި ތަންތަނަށް ބަދަލުކުރުން ހިމެނެއެވެ.

އޭގެ އިތުރުން އެންޑީއެމްއޭ އިން ބުނެފައިވަނީ، ވައިގަދަވެދާނެކަމަށް ސަމާލުވެ، އެކަމާ ގުޅޭ ރައްކާތެރިކަމުގެ ފިޔަވަޅުތައް އަޅަންވާނެ ކަމަށާއި ޚާއްޞަކޮށް ގަދަ ވައިގައި އެއްލާލަފާނެ ތަކެތި ރައްކައުތެރި ކުރަންވާނެ ކަމަށެވެ.

ކަނޑުދަތުރުކުރަން ރާވާފައިވާ ފަރާތްތަކުން ދަތުރު ފެށުމުގެ ކުރިން ކަމާބެހޭ ފަރާތްތަކުން އެންމެ ފަހުގެ މޫސުމާބެހޭ މަޢުލޫމާތު ހޯދުމަށް ވެސް އެންޑީއެމްއޭ އިން ވަނީ އިރުޝާދު ދީފައެވެ. އެއާއެކު ދަތުރުމަތީގައި އެކަށީގެންވާ ރައްކާތެރިކަމުގެ ފިޔަވަޅުތަކާއި މުވާސަލާތީ ނިޒާމުތައް ޤާއިމުކޮށްފައިވާކަން ކަށަވަރުކުރަންވާނެ ކަމަށް ވެސް ބުނެފައިވެއެވެ.

ޚާއްޞަކޮށް މާލެ ސިޓީގައި، ފެންބޮޑުވެފައިވާ ޙާލަތުގައި ބަރު އުޅަނދުފަހަރު ދުއްވުމުން ދުރުހެލިވުމަށް ވެސް އެންޑީއެމްއޭ އިން އެދިފައިވެއެވެ.

ގޯތިގެދޮރާއި މުދަލަށް ލިބިދާނެ ގެއްލުންތައް ކުޑަކުރުމަށް "ޚާއްސަ ސަމާލު ކަމެއް ދިނުމަށް" ޖެނުއަރީ 12 ވަނަ ދުވަހު އެންޑީއެމްއޭ އިން ނެރުނު ބަޔާނުގައި ވަނީ އެދިފައެވެ.

މޯލްޑިވްސް މިޓިއޮރޮލޮޖިކަލް ސާވިސް އިން އާދިއްތަ ދުވަހު ނެރުނު ބަޔާނުގައި ބުނެފައިވަނީ ޖެނުއަރީ 13ން 18ށް މޫސުން ގޯސްވާނެ ކަމަށް ލާފާ ކުރެވޭ އިރު އުތުރާއި މެދުރާއްޖެތެރޭގެ ސަރަހައްދުތަކަށް އުދައިގެ އަސަރު ކުރުމުގެ ފުރުސަތު އޮތް ކަމަށެވެ. 

"މޫސުން ގޯސްވާނޭ ކަމަށް ލަފާކޮށް މި ސާރވިސް އިން ނެރޭ، އެންމެ ފަހުގެ މޫސުން ލަފާ ކުރާ ގޮތާއި، މޫސުމީ ސަމާލާއި، އިންޒާރުތައް އަދި ގެއްލުންތައް ކުޑަކުރުމަށް އަޅަންޖެހޭ ފިޔަވަޅުތަކަށް ސަމާލު ވުމަށް" ދަންނަވާ ކަމަށް މެޓުގެ ބަޔާނުގައި ވެއެވެ.