ހުކުރު ދުވަހު ރާއްޖެ އަށް ކުރި ބޯ ވިއްސާރައިގައި ގިނަ ރައްތަކަކަށް ބޮޑެތި ގެއްލުންތަކެއް ވެއްޖެއެވެ.
ހުކުރު ދުވަހު ކުރި ވިއްސާރައިގައި އެންމެ ގިނައިން ވާރޭ ވެހިފައިވަނީ މާލެ އަށާއި ހުޅުލެ އަށް ކަމަށް މެޓް އޮފީހުން ވަނީ ހާމަ ކޮށްފައެވެ.
މާލެ އަށް ކުރި ވިއްސާރައިގައި އާންމުގެ ގެދޮރަށާއި ވިޔަފާރިތަކަށް އެކިވަރުގެ ގެއްލުން ވަނީ ލިބިފައެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ހާމަ ކޮށްފައިވާ ގޮތުގައި މާލެއަށް ކުރި ވިއްސާރަ އާ ގުޅިގެން 774 ތަނަކުން އެހީ އަށް ވަނީ އެދިފައެވެ.
އޭގެ ތެރެއިން 554 ރިކުއެސްޓައަކީ ވެލިބަސްތާ ޖެހުމަށް އެދި އައި ރިކުއެސްޓް ކަމަށްވެސް ބުނެފައިވެއެވެ.
އެންޑީއެމްއޭ އިން ބުނެފައިވަނީ 53 ގެއެއްގެ ރެޕިޑް އެސެސްމެންޓް ހެދިފައިވާ ކަމަށާއި، މީގެތެރެއިން 36 ގޭބިސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދިން ކަމަށެވެ.
އެންޑީއެމްއޭ އިން ހާމަ ކޮށްފައިވާ ގޮތުގައި ބައެއް ރަށްތަކަށް ވަނީ އުދަ އަރާފައެވެ. އުދައަރާފައިވާ ރަށްތަކަކީ ރ. އިނގުރައިދޫ އާއި ށ. މަރޮށްޓެވެ. އެކި ވަރުގެ ގެއްލުން އުދަ އެރުމުގެ ސަބަބުން މި ދެރަށަށް ލިބިފައިވާ ކަމަށް އެ އޮތޯރިޓީން ވަނީ ބުނެފައެވެ.
އެންމެ ބޮޑަށް ފެންބޮޑުވި ރަށްތަކުގެ ތެރޭގައި ހިމެނޭ ފ. ނިލަންދޫ ގެ 80 އިންސައްތަ ގައި ފެން ބޮޑުވި އިރު ކ. ހިންމަފުށީގެ 60 އިންސައްތައިގައި ފެންބޮޑުވި ކަމަށް އެންޑީއެމްއޭ ބުނެފައިވެއެވެ. އޭގެ އިތުރުން ފެން ބޮޑުވުމުގެ ސަބަބުން ދ.ކުޑަހުވަދޫ އާއި ދ. މީދޫގައި ކޮންމެ ރަށެއްގެ 10 ވަރަކަށް ގެއަށް ގެއްލުން ލިބުނު ކަމަށްވެސް ބުނެފައިވެއެވެ.
ފ. މަގޫދޫ 9 ގެއަށް ގެއްލުން ލިބި އެއް ގެއިން މީހުން ހުސްކުރަން ޖެހުނު ކަމަށާއި، އދ.މާމިގިލީގެ 4 ގެއަކަށް ބޮޑެތި ގެއްލުންތަކެއް ލިބުމުގެ އިތުރުން ކ.ގުރައިދޫގެ 60 ގެއަށް އެކިވަރުގެ ގެއްލުން ލިބުނު ކަމަށް ވެސް އެންޑީއެމްއޭ އެން ހާމަ ކޮށްފައިވެއެވެ.
ކ. ގުރައިދޫ، ކ .ހުރާ، އަދި، ށ. ނަރުދޫ ގައިވެސް ހުކުރު ދުވަހުގެ ވިއްސާރައިގައި ފެންބޮޑުވެގެން ފެން ހިންދަން ޖެހުނެވެ.
ބޯކޮށް ވާރޭވެހުމުގެ ސަބަބުން ރާއްޖޭގެ ގިނަ ރަށްތަކެއްގައި ފެން ބޮޑުވިއިރު ބައެއް ރަށްރަށަށް ފެން ހިންދުމުގައި އެމްއެންޑީއެފް ގެ އެހީތެރިކަން ވަނީ ފޯރުކޮށްދީފައެވެ. ހޮނިހިރު ވިލޭރޭ އެމްއެންޑީއެފުން ހާމަ ކުރި ގޮތުގައި އެމްއެންޑީއެފް އިން ފެން ހިންދުމުގެ މަސައްކަތްކުރަމުންދިޔަ ރަށްތަކުގެ ތެރެއިން ގިނަ ރަށްތައް މިހާރު ވަނީ އާންމު ހާލަތަށް ގެނެވިފައެވެ.
