ހުކުރު ދުވަހު މާލެ އަށް ކުރި ބޯ ވިއްސާރައިގައި 774 ތަނަކުން އެހީއަށް އެދުނު ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން (އެންޑީއެމްއޭ) އިން ބުނެފިއެވެ. މީގެތެރެއިން 554 ރިކުއެސްޓަކީ ވެލިބަސްތާ ޖެހުމަށް އެދި އައި ރިކުއެސްޓް ކަމަށްވެސް ބުނެފައިވެއެވެ.

އެންޑީއެމްއޭ އިން ބުނެފައިވަނީ 53 ގެއެއްގެ ރެޕިޑް އެސެސްމެންޓް ހެދިފައިވާ ކަމަށާއި، މީގެތެރެއިން 36 ގޭބިސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދިން ކަމަށެވެ.

މެޓުން ހާމަ ކުރި ގޮތުގައި މާލެއަށް ހުކުރު ދުވަހު ގަޑިއިރެއްގެ ތެރޭގައި 62 މިލިމީޓަރުގެ ވާރޭވެހިފައިވެއެވެ. މޫސުމާ ބެހޭ އިދާރާއިން ފާހަގަ ކުރާ ގޮތުގައި ފަހުގެ ތާރީޚެއްގައި މާލެ އަށް އެންމެ ގިނައިން ވާރޭވެހިފައިވަނީ ހުކުރު ދުވަހުއެވެ.

އެމްއެންޑީއެފް އިން މާލޭގެ 6 ސަރަހައްދެއްގައި 16 ޕަންޕު ބަހައްޓައިގެން ފެން ހިންދުމުގެ މަސައްކަތް ވަނީ ކޮށްފައެވެ.