ށ.ނަރުދޫއަށް އުދައަރައި ރަށުތެރޭގައި ފެންބޮޑުވެއްޖެ އެވެ.
އެމްއެންޑީއެފް އިން ބުނެފައިވަނީ ރަށުގައި ފެން ބޮޑުވެފައިވާތީ އެހީތެރިކަން ފޯރުކޮށްދިނުމުގައި، އެމްއެންޑީއެފް ނޮދަން އޭރިއާ ކޮމާންޑުން ސިފައިން ހަރަކާތްތެރިވަމުން ދާ ކަމަށެވެ.
ބޯކޮށް ވާރޭ ވެހި މާލޭގެ ބައެއް މަގުތަކުގައި ފެންބޮޑުވުމާ ގުޅިގެން، ފެން ހިންދުމުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ވަނީ ބުރާސްފަތި ދުވަހާއި ހުކުރު ވިލޭރޭ ހަރަކާތްތެރިވެފައެވެ. އެމްއެންޑީއެފް އިން ބުނެފައި ވަނީ ހުކުރު ވިލޭރޭ މާލޭގެ ތިން ސަރަހައްދެއްގައި ޕަންޕު ބޭނުންކޮށްގެން ފެން ހިންދުމުގެ މަސައްކަތް ކޮށްފައިވާ ކަމަށެވެ.
އައު އަހަރު ފެށުނު ދުވަހު ވެސް މާލޭގެ ބައެއް މަގުތަކުގައި ފެން ބޮޑުވުމާ ގުޅިގެން އެމްއެންޑީއެފް އިން ފެން ހިންދުމުގެ މަސައްކަތް ކޮށްފައިވެއެވެ.
ރާއްޖޭގެ ބޮޑު ބަޔަކަށް މި ދުވަސްކޮޅު ވަރަށް ބޮޑަށް ވިއްސާރަ ކުރަމުން ދާއިރު ހުކުރު ދުވަހު ވެސް ރާއްޖޭގެ ބައެއް ސަރަހައްދުތަކަށް ހުދު ސަމާލު މެޓް އޮފީހުން ވަނީ ނެރެފައެވެ.
މެޓް އޮފީހުން ހާމަކޮށްފައިވާ ގޮތުގައި ހުކުރު ދުވަހު ބ. އަތޮޅުން ފެށިގެން އައްޑޫ ސިޓީ އާ ހަމަ އަށް ގަޑިއަކު 19 މޭލާއި 22 މޭލާ ދެމެދުގެ ބާރު މިނުމުގައި ވައި ޖެހި ކަނޑުތައް ގަދަވާނެއެވެ.
ކުރިން މެޓް އޮފީހުން ބުނެފައިވަނީ ހުކުރު ދުވަހު ބ. އަތޮޅުން ފެށިގެން ލ. އަތޮޅާ ހަމަ އަށް ވައިގަދަވެ، ބޯކޮށް ވިއްސާރަވެ، ގުގުރުމާއެކު ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާ ކުރާ ކަމަށެވެ.
