ފަލަސްތީން ސަރުކާރުން އަލްޖަޒީރާ ފަލަސްތީންގައި މަސައްކަތް ކުރުން މަނާ ކޮށްފިއެވެ.
ފަލަސްތީނުގެ ރަސްމީ ނޫސް އެޖޭންސީ ވަފާ އިން ބުނެފައިވަނީ ފަލަސްތީނުގެ ޘަޤާފަތާއި، ދާޚިލީ ކަންކަމާއި، މުވާޞަލާތީ ވުޒާރާގެ މަންދޫބުން ހިމެނޭ ފަލަސްތީނުގެ މިނިސްޓަރުންގެ ކޮމިޓީ އަކުން، ޤަޠަރުގައި މައި މަރުކަޒު ޤާއިމުކޮށްފައިވާ އަލްޖަޒީރާ މީޑިއާ ނެޓްވަރކްގެ ބްރޯޑްކާސްޓިންގ މަސައްކަތްތައް ފަލަސްތީނުގައި މަނާ ކޮށްފި ކަމަށް އިޢުލާނުކޮށްފައިވާ ކަމަށެވެ.
މީގެ އިތުރުން، އަލްޖަޒީރާ އާ ގުޅިފައިވާ އެންމެހައި ނޫސްވެރިންނާއި މުވައްޒަފުންނާއި ޗެނަލްތަކުގެ މަސައްކަތްތައްވެސް ވަގުތީގޮތުން ހުއްޓުވައިލުމަށް ކޮމިޓީ އިން ވަނީ އަންގާފައެވެ. އަލްޖަޒީރާ އިން ގާނޫނީ ގޮތުން ފުރިހަމަ ކުރަން ޖެހޭ ކަންކަން ފުރިހަމަ ކުރަންދެން މި ނިންމުން ދެމި އޮންނާނެ ކަމަށް ވެސް ފަލަސްތީން ސަރުކާރުން ބުނެއެވެ. ވަފާ ނިއުސް އޭޖެންސީން ރިޕޯޓު ކޮށްފައިވާ ގޮތުގައި އެ ނެޓްވޯކުން ފަލަސްތީނުގެ ޤާނޫނުތަކާއި ގަވާއިދުތަކާ ޚިލާފުވެފައިވާ ކަމަށް ބެލެވިފައިވެއެވެ.
ފަލަސްތީނުގެ ޤާނޫނުތަކާއި ގަވާއިދުތަކާ އަލްޖަޒީރާއިން ތަކުރާރުކޮށް ޚިލާފުވަމުންދާތީ މި ނިންމުން ނިންމާފައިވާކަމަށް ކޮމިޓީ އިން ބުނެފައިވެއެވެ. ފަލަސްތީނު ސަރުކާރުން ބުނެފައިވަނީ އަލްޖަޒީރާ އިން ހަމަނުޖެހުމަށް ހިތްވަރުދޭ ފަދަ މަޢުލޫމާތު ފަތުރައި، ދޮގު މަޢުލޫމާތު ފަތުރައި، ފަލަސްތީނުގެ އެތެރޭގެ ކަންކަމަށް ނުފޫޒު ފޯރުވަމުންދާކަމަށް ތުހުމަތު ކުރެވޭ ކަމަށެވެ. އަދި މިކަންކަމުގެ ސަބަބުން ބައިބައިވުމާއި ހަމަނުޖެހުން އުފެދޭކަމަށް އެފަރާތްތަކުން ބުނެފައިވެއެވެ.
