އައު އަހަރާ ދިމާކޮށް ރާއްޖޭގެ މޫސުން ގޯސްވާނެ ކަމަށް ލަފާ ކުރެވޭ ކަމަށް މޫސުމާބެހޭ ގައުމީ އިދާރާއިން ބުނެފިއެވެ.
މޫސުމާބެހޭ ގައުމީ އިދާރާއިން ބުނީ އަންގާރަ ދުވަހުން ފެށިގެން ކުރިއަށް އޮތް ތިން ދުވަހު މެދު ރާއްޖެ ތެރެއަށާއި އުތުރުގެ އަތޮޅުތަކަށް މޫސުން ގޯސްވާނެ ކަމަށް ލަފާ ކުރެވޭ ކަަމަށެވެ. ރާއްޖޭގެ ދެކުނަށް ކޮންމެ ވެސް ވަރަކަށް ކެރި އުޅޭނެ ކަމަށް އެއިދާރާއިން ބުނެއެވެ. އަދި އެންމެ ދެކުނަށް ޖެނުއަރީ މަހު ދެ ވަނަ ދުވަހުން ފެށިގެން މޫސުން ގޯސްވާނެ ކަމަށް ލަފާ ކުރެވޭ ކަމަށް މޫސުމާބެހޭ ގައުމީ އިދާރާއިން ބުނެއެވެ.
މީގެ އިތުރުން މޫސުމާބެހޭ ގައުމީ އިދާރާއިން ބުނީ ކުރިއަށް އޮތް 24ގަޑީއިރު، ހޯމަ ދުވަހުގެ މޫސުން އާންމު ގޮތެއްގައި ރަނގަޅުވި ނަމަވެސް ހޯމަ ދުވަހުގެ ރޭ ބައެއް ރަށްތަކަށް ކެރީގެ އަސަރު ފޯރާނެ ކަމަށެވެ. އަދި ގުގުރުން އެކަށީގެންވާ ކަމަށް އެއިދާރާއިިން ބުނެއެވެ.
އެއިދާރާއިން ބުނީ އުތުރާއި އިރުއުތުރުން ގަޑިއަކު 05 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، އާދައިގެ ވަރަކަށް ކަނޑުތައް މަޑުވާނެ ކަމަށެވެ.
އައު އަހަރާ ދިމާކޮށް، އަދި ސްކޫލު ބަންދު ދުވަސްވަރަކަށްވާތީ ގިނަ ބަޔަކު ދަނީ އެއްރަށުން އަނެއް ރަށަށް ދަތުރުތައް ކުރަމުންނެވެ. ދަތުރުތައް ކުރިނަމަވެސް ކޮޅިގަނޑުގައި ވައިގަދަވެ، ކަނޑުތައް ގަދަވާނެތީ ސަމާލުވުމަށް މޫސުމާބެހޭ ގައުމީ އިދާރާއިން ވަނީ އިލްތިސްކޮށްފައެވެ.
މިދިޔަ ހަފްތާ ބަންދުގައި މުޅި ރާއްޖެއަށް ކުރި ވިއްސާރައިގައި މާލެ ވަރަށް ބޮޑަށް ފެންބޮޑުވިއެވެ. ބައެއް ގެތަކާއި، ފިހާރަތަކަށް ފެން ވަދެ މުދަލަށް ގެއްލުންވެފައިވެއެވެ. މީގެ އިތުރުން އަތޮޅުތެރޭގެ ބައެއް ރަށްތަކަށް ވެސް ވަނީ ގެއްލުން ލިބިފައެވެ.
