އަޑެއް ކިއްޔާ ރެނދެއް ލާނެއެވެ. ހެލޭ ހެލުމެއްގެ ފަހަތުން އިތުރު ކަންތައްތަކެއްވެސް ހިނގާނެއެވެ. އެއީ އިހުތިބީންވެސް ބުނެއުޅޭ އިލާހީ ގާނޫނެވެ.
މިފަހުން ކީ އެންމެ ބޮޑު އަޑަކީ މަޝްހޫރު ގޯތި ވައްކަމުގެ އަޑެވެ. އެވާހަކަތައް ފުރަތަމަ ދެކެވުނީ ސިއްރު ސިއްރުންނެވެ. ދޭދޭ މީހުންގެ މެދުގައެވެ. ހީވާ ހީވުމަކަށެވެ. ފެންނަ ފެނުމަށް ލަފާކޮށްފައެވެ. އެކަމަކު ފަޅައިގެން ދިޔައީ ކުއްލިއަކަށެވެ. އެކްސް އެކައުންޓަކުން ލީކުކޮށްލި ލިޔެކިޔުންތަކަކާއެކު ބޮޑުކޮށެވެ. އިސާހިތަކު ސަރުކާރުގެ ހިންމިތަކުގައި މަދަން އަޅައިގެންވެސް ދިޔަ ނުހިފޭވަރަށެވެ. ބަނޑުފިލާގައި އުފެދުނު ބާގަނޑުގައި ގަނޑުލައިގެންވެސް ދިޔަގަނޑު ކޮންޓްރޯލް ނުކުރެވޭހާ ބޮޑަށެވެ.
ކުއްލިއަކަށް އެނެގި ރާޅު ހަފޮޅުން އެތެރެނުވަނީސް ސަލާމަތްވެވޭތޯ ސަރުކާރުން ލައްކަ މަސައްކަތް ފަށައިގަތެވެ. ލައްކަ ގޮތްގޮތައް އަނބުރާލެވޭތޯ އުޅެގަތެވެ. ވީކަމެއް ހަތްހަރާމުން ހަރާމެވެ. ހެލުނު ހެލުންގަނޑާއެކު ކުދި ހެލުންތައް އަދިވެސް އެދަނީ ކުރިއަށެވެ. އިންތިހާއަށްވީ ބޮޑެވެ.
މުޅިރާގު ބަދަލު ކޮށްލަން ކުރީ ސަރުކާރު ބޮލަށް ޖެހިޖެހުން ރައްޔިތުން ބަލައި ނުގަތީމާ ދެން ފެނުނީ އިދިކޮޅަށް ކުރުދޮށިންދޭން ބޭއްވި މަޝްހޫރު ހަރުގެ ޖަލްސާއެވެ. ކުއްލިގޮތަކަށް ކޮޅު ބަދަލުކޮށްލުމާއެކު ސްޓޭޓް މިނިސްޓަރުކަން ލިބުނު ކުރީގެ މަޖިލިސް މެމްބަރަކު ލައްވައި އިދިކޮޅަށް ވަށިވަށިން ދިނުމަށް ހަވާލުކުރެވުނު ޓާސްކް ގޮވީ ބޮޑުތަނުން އަތަށެވެ. ދެއްކޭ ނުދެއްކޭ ވާހަކައެއް ނޭނގި އެކަލޭގެ ފަޅާލި ބޮޑު ވާހަކައާއެކު ސަރުކާރުގެ ރިހޭ ފައިމައްޗަށް ވެއްޓުނީ ފޮއެވެ. އެތެރެއިން ކުރި ބަޣާވާތެއް ކަމަށްބުނެ ޖަލްސާގެ ޕޯޑިއަމްގައި ހުރި މައިކުތަކުން އަޑު ކަނޑާލައި ބައިމީހުންނާ ދިމާލަށް ހެއްދެވި ނުހެއްދެވިއަށް ގޮވައި ޖަލްސާ ހުއްޓާލިއެވެ. އިތުރަށް ފަޟީޙަތްވާން ފުރުސަތު ނުދިނުމަށެވެ. އެވަރުންވެސް އެކަން ހަންމަތަ ކުރެވޭވަރެއް ނުވިއެވެ. މާ ގައްޑާވެލާފައި ފޮނުވާލި ބޯޅައިން ބައިކޮޅަށް ވަން ގޯލުން ސަލާމަތްވާން އަމިއްލަ ޕާޓީން ބަޔާނެއްވެސް ނެރެން މަޖްބޫރުވީއެވެ. ސްޓޭޓް މިނިސްޓަރު ސަސްޕެންޑްވެސް ކުރީއެވެ. އަނހަ!. އެކަމުންވެސް އެގޮވީ އަތަށެވެ.
ދެން އޮތީ ވަކި ބަޔަކަށް ދައުވަތު ދީގެން އޮފީހުން ނުކުމެވަޑައިގަންނަވާ ތަނަށް އިއްކީލި ނޫސްވެރިން ގެންގޮސްގެންވެސް ކުޅެން އުޅުނު ޑްރާމާއެވެ. ޓްރެއިލަރ ނުނިކުންނަނީސް އެކަންވެސްވީ ފްލޮޕެވެ. އަނގަގަޅި ޖެހިވަޑައި ނުގަތުމަށް ވިދާޅުވެވުނު އެއްޗަކުން ފެނުނީ އަލީގެ މައްޗަށް އައްޔެވެ. ވަގުގޯތީގެ އިތުރުން ނޭނގިއޮތްކަމަށް ވިދާޅުވި އެންސްޕާ ކޮރަޕްޝަން ރައީސްގެ ސަމާލުކަމަށް ނޫސްވެރިން ގެނައީއެވެ. ތަރުޖަމާން މެދުވެރިކޮށް އެންސްޕާ ލާރިގަނޑުން ހެދި އެމްއެމްޓީވީގެ ވާހަކަ ރަސްމީކޮށް ރައީސަށް ހުށަހެޅުނީއެވެ. އިތުރު ވައްކަމެއްގެ ވާހަކަ ފެންމަތިވެ ތަރުޖަމާންގެ އިސްތިއުފާއަށް ގޮވާއަޑު ގަދަވީއެވެ. ކެނޑިނޭޅި އެކަމުގެ މަގުމަތީ މުޒާހަރާތައްވެސް ފެށުނީއެވެ.
ދަނޑިވަޅު ބަލާފައި ފެނަކަ އެމްޑީވެސް ސަރުކާރުބޮލަށް ލައްކަ ވާހަކަ ޖަހާފައި އެއްކައިރިވެލައިފިއެވެ. ސަރުކާރަށް ޖެހުނީ ހުރިހާކަމެއް ހުއްޓާލާފައި އިސްތިއުފާދިން ފެނަކަ އެމްޑީއަށް ކުރުދޮށިން ދޭށެވެ. އޭނާވެސް ވަކި ސަހަލެއް ނުވިއެވެ. ކިޔަންހުރި އެއްޗެހި ލައްކަ ގިނަކަމަށްބުނެ ވަރުގަދަ އިންޒާރެއް އޭނާވެސް ދިނީއެވެ.
މަންޒަރުގައި އިތުރަށް ފޯރިގަދަވެގެން އެދިޔައީ އެޗްޑީސީގެ ލެޕްޓޮޕްތައް ވަގަށް ނެގުމުންނެވެ. އާއްމުން ސިފަކުރާންފެށީ ފްލެޓް ލިސްޓްތައްހުރި ހައުސިން މިނިސްޓްރީގައި ހުޅުހިފުން ފަދައިން ވަގުގޯތިތަކުގެ ލިޔުންތަކުގައިވެސް އަލިފާން ރޯވުމަށެވެ.
އިއްތިފާގަކުން ނަމަވެސް ދިމާވި އަނެއް ކަމަކީވެސް ވަކި ސަހަލު ކަމެއް ނޫނެވެ. ގައުމުތަކަށް ފޮނުވި ސިޓީތައް ސިއްރުކުރި ކުރުމާއި ޚަރަދުކުޑަކުރަން ކަނޑާލިކަމަށްބުނި ސިޔާސީ މީހުންތަކުގެ ވަނަވަރު ހާމަކުރަން އިންފޮމޭޝަން ކޮމިޝަނަރު ދެއްވި ފަސްދުވަހުގެ މުޚުލަތެވެ. އެކަންވެސް އެއޮތީ އަނެއްކާ އަނެއް ބޮލުގެ ރިހުމަށް ވެފައެވެ. ހެދޭނެ މަންތަރެއް ފެނޭތޯ އެކޮޅުމިކޮޅު ބަލާލިވަގުތު ލޮލުގައި އަޅައިގަތީ ފައިނަލް މެޗަށް ފައްކާވެފައި އޮތް ފުޓްބޯޅަ މުބާރާތެކެވެ. ރަށުފޯރީގައި އައްޑޫ ރައްޔިތުންނާއި އޭދަފުށީ ރައްޔިތުން ވެގެން ދަނޑު ފުރާލި ފުރާލުމަކީ ރައީސް މުއިއްޒުގެ ސިޔާސަތެއް ކާމިޔާބުވީކަމަށް ނިންމާ އޭގެ މެޑެލް ޖަހާލަން މުޅި ސަރުކާރު އެނބުރުނީއެވެ. ވައްކަމުގެ އަޑު ކަނޑުވާލެވޭނެ ހަތިޔާރަކަށް ހަދާފައެވެ. އެކުޅިގަނޑު ފެނިފައި ރައްޔިތުންގެ ގާތަށް އައީ ނުބައިޒާތެއްގެ ހިންޏެކެވެ. އެއީ ސަރުކާރާ ވާވެސް ކަމެއް ނޫނެވެ. އެހީތެރިކަމެއް ނުވެއެކޭއެއް ނޫނެވެ. އެ މުބާރާތަކީ އަމިއްލަ މީހަކު އިންތިޒާމްކޮށްގެން ބޭއްވި މުބާރާތެއްކަން ރައްޔިތުންނަށް ނޯޅޭތީއެވެ.
ކޮންމެއަކަސް ހިލުންގަނޑުގެ ފަހަތުން އަންނަ އިތުރު ހިލުން ގަނޑުތައް އެދަނީ ބާރަށް ކުރިއަށެވެ. ކެބިނެޓަށްވެސް އެގެނައީ ބޮޑު ބަދަލެކެވެ. އެއްކަލަ ފްލެޓްތަކާ ގޯތިތަކާ ބެހޭ ވަޒީރު ގެންގޮސް މުޅި އެހެންތަނަކަށް ބަދަލުކޮށްލެއްވީއެވެ. ސަރުކާރުން ހެދުނިއްޔާ ހެދުނުހާއެއްޗެއް ހަދަނީއެވެ. ފެންނަ ފެނުމަށް ސަރުކާރު އެވަނީ ހެލިހެލިއިން ދަތަކަށް ވެފައެވެ.
