ރައީސް އޮފީހުގެ ތަރުޖަމާން ހީނާ ވަލީދުގެ މައްޗަށް ކުރެވޭ ކޮރަޕްޝަނާއި ގުޅޭގޮތުން ނޫސްވެރިން ސުވާލު ކުރުމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަމާލުކަމަށް މިކަން އައިސްފައިވާއިރު، މިހާރު ފިޔަވަޅުނާޅުއްވާ މަޑުކުރައްވާ ސަބަބާއި ގުޅޭގޮތުން ކުރީގެ ރައީސް އަބްދުﷲ ޔާމީން ސުވާލު އުފައްދަވައިފިއެވެ.
އާދިއްތަ ދުވަހުގެ ރޭ ކުރިއަށް ގެންދިއަ ޕީއެންއެފްގެ ޖަލްސާގެ އޯޑިއަންސްގައި އިންނަވައިގެން ޔާމީން ވިދާޅުވީ، އާދިއްތަ ދުވަހު މީޑީއާ ގެންގޮސްގެން ރައީސް އޮފީސް ކުރިމަތީގައި ރައީސް މުއިއްޒު ރާވައިގެން ޗަރުކޭސް ކުޅުއްވުމުން އެކަމާ އުފާ ކުރައްވާ ކަމަށެވެ.
އެންސްޕާ ހިޔާނާތަށް އިޝާރާތް ކުރައްވައި ޔާމީން ވިދާޅުވީ އެއްވެސް ވަޒީރަކަށް ވިޔަފާރީގެ އުސޫލަކުން ރައީސްގެ ހުއްދަ ނުނަގައި އެއްވެސް ކަމެއް ނުކުރެވޭނެ ކަމަށާއި، އެންސްޕާއާ ގުޅުން އޮތް ކަމަށް ބުނާ ޓީވީ ރަޖިސްޓްރީ ކޮށްފައިވަނީ ރައީސް އޮފީހުގެ ތެރެއިން، ރައީސް އޮފީހުގެ މިނިސްޓަރެއް ކަމަށެވެ. އެހެންކަމުން މިކަން އެމަނިކުފާނަށް އެނގިވަޑައިނުގަންނަވާ ކަމަށް ވިދާޅުވި ނަމަވެސް ސުވާލު އުފެދޭ ކަމަށް ޔާމީން ވިދާޅުވިއެވެ.
އަނެއްކާ ވެސް އިންޓެލިޖެންޓްލީ ލޮޖިކްލީ ދައްކާ ވާހަކައެއް. އެއްވެސް ވަޒީރަކަށް ވިޔަފާރީގެ އުސޫލަކުން އެއްވެސް ކަމެއް ނުކުރެވޭނެ ރައީސުލްޖުމްހޫރިއްޔާގެ ހުއްދަ ނަގައިގެން ނޫނިއްޔާ. މުހައްމަދު މުސައިލަމާގެ ޓީވީ. މުހައްމަދު މުސައިލަމާގެ ޓީވީ އެއޮތީ ރަޖިސްޓްރީ ކޮށްފައި ރައީސް އޮފީހުގެ ވަރަށް ކައިރިން. ރައީސް އޮފީހުގެ މިނިސްޓަރަކު އޭނާގެ ނަމުގައި އެނގޭތޯ. ފުރަތަމަ ކަމަކީ އޭނާއަށް އެކަމެއް ނުކުރެވޭނެ މުއިއްޒަށް އެނގިގެން މުއިއްޒަށް ހުއްދަދީގެން ނޫނިއްޔާ އެނގޭތޯ. އެވަރު އޭނާ ބަލަންވާނެ. އޭނަ ހުއްދަ ނުނަގާ މިކަން ކޮށްފިއްޔާ މިހާރު ހަލީލު ހުންނަންޖެހޭނީ ގޭގައި. ނޭނގޭތާ އެބުނީ ތެދެއްތޯ. މިއީ ފުރަތަމަ ކަންތައް.ކުރީގެ ރައީސް އަބްދުﷲ ޔާމީން
އާދިއްތަ ދުވަހު ރައީސް އޮފީސް ކުރިމައްޗަށް ބައެއް މީޑީއާތަކަށް ދައުވަތުދީގެން މިހާރު ހިނގައިގެން އުޅޭ އެޗްޑީސީ ގޯތީގެ ވައްކަމާއި ގުޅޭގޮތުން ރައީސް މުއިއްޒު ވަނީ ވާހަކަދައްކަވާފައެވެ. ކޮރަޕްޝަންގެ ތުހުމަތު ކުރެވިފައިވާ ރައީސް އޮފީހުގެ ތަރުޖަމާން ހީނާ ވަލީދުގެ މައްސަލައާ ގުޅޭގޮތުން ސުވާލުކުރުމުން ރައީސް މުއިއްޒު ވިދާޅުވީ އެކަމުގެ އެއްވެސް މައުލޫމާތެއް ނުލިބޭ ކަމަށާއި، އެމައުލޫމާތު ލިބިފައިވާނަމަ ކަމާބެހޭ ފަރާތްތަކަށް ހުށަހަޅައިގެން އެމައްސަލަ ބަލާނެ ކަމަށެވެ.
މިމައްސަލައަށް އިޝާރާތް ކުރައްވައި ޔާމީން ވިދާޅުވީ ނޫސްވެރިން އާދިއްތަ ދުވަހު މިސުވާލު ކުރުމުން މިހާރު ރައީސް މުއިއްޒުގެ ސަމާލުކަމަށް މިކަން އައިސްފައިވާނެ ކަމަށެވެ. އަދި މިހާރު ހީނާ މަގާމުގައި ހުންނެވީ ކީއްވެގެންތޯ އާއި، ފިޔަވަޅު ނާޅުއްވަނީ ކީއްވެގެންތޯ ޔާމީން ސުވާލު އުފެއްދެވިއެވެ.
ޔާމީން ވިދާޅުވީ ހީނާ ވައްކަން ކޮށްދީފައިވަނީ ރައީސް މުއިއްޒަށް ކަމަށެވެ. އެގޮތުން ޓީވީ ސްޓޭޝަން ހުޅުވުމަށް އަގުބޮޑެތި ސާމާނު ހޯދައި، ބިން ކުއްޔަށް ހިފައި އެމަސައްކަތް ކޮށްފައިވާ ކަމަށް ޔާމީން ވިދާޅުވިއެވެ.
ދެން ދެވަނަ ކަމަކީ މިއީ ސްޕޯކްސް ޕާސަން. މީނަ މިވަރުގެ ކަމެއް ކުރިއިރު އަދިވެސް ރައީސް މުއިއްޒު މީނައަކާ ސުވާލެއް ނުކުރޭ. އެބުނީ ނޭނގޭ. ނޭނގޭ ކަމަށްވަންޏާ މިހާރު އެނގެންވާނެ ތެދެއްތޯ. ކީއްވެގެންތޯ މީނަ ވަަޒީފާގައި މިހުރީީ. ކިހިނެތްތޯ މިދައްކާ ވާހަކަ އޭނާ ދެކޮޅު ޖައްސަނީ. އެންސްޕާގެ މައްސަލަ އަޅުގަނޑާ ހިސާބަށް ކިހިނެތްތޯ މައްސަލަ ގެންދަން ހަދަނީ. މައްސަލަ ދުވެފައިދަނީތޯ އެބޭފުޅާ ހަމައަށް. މިދެންނެވީ އެންމެ ކައިރިންނޭ މިއީ. ކޮން ޖަވާބެއްހޭ ދެވޭނީ.ކުރީގެ ރައީސް އަބްދުﷲ ޔާމީން
ރައީސް އޮފީހުގެ ތަރުޖަމާން ހީނާގެ މައްޗަށް ކުރެވޭ ކޮރަޕްޝަންގެ އެއްވެސް މައުލޫމާތެއް ލިބިފައިނުވާ ކަމަށް ރައީސް މުއިއްޒު ވިދާޅުވެފައިވާއިރު، ހީނާ އިސްވެ ހުންނަވައި އެންސްޕާއިން ބޮޑު ކޮރަޕްޝަންގެ އަމަލެއް ހިންގާފައިވާ ކަމަށް ބުނާ ލިޔެކިއުންތަކެއް ސޯޝަލް މީޑިއާގައި ވަނީ އާއްމުކޮށްލާފައެވެ.
މި އެއްބަސްވުމާ ބެހޭ ލިޔެކިޔުންތަކުން އެނގޭގޮތުގައި ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން އެ ގެއިން ދެ ފަންގިފިލާ ހިފާފައިވަނީ މަހަކު 580،000ރ އެންސްޕާ އިން ޚަރަދު ކުރާ ގޮތަށެވެ. އެންސްޕާއިން ހިންގާފައިވާ ކަމަށް ތުހުމަތު ކުރެވޭ 34.8 މިލިއަން ރުފިޔާގެ ކަރަޕްޝަން ހިމެނޭ މި ޑީލުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ކުއްޔަށް ހިފާފައިވާ ކަމަށް ވެސް ބައެއް މަސްދަރުތަކުން ހާމާކޮށްފައިވެއެވެ. ގިނަ ބައެއްގެ ފާޑުކިޔުން އަމާޒުވުމާއެކު އެންސްޕާއިން ވަނީ އެއްބަސްވުން އުވާލާފައިވާ ކަމަށް ވެސް މައުލޫމާތު ލިބެއެވެ.
މޯލްޑިވްސް މީޑިއާ ހައުސް އާއި އެންސްޕާ އާ ދެމެދު އިމާރާތް ކުއްޔަށް ހިފުމުގެ އެއްބަސްވުން ހެދި ކަމުގެ ވާހަކަތައް އާންމުވުމާ ގުޅިގެން 29 ނޮވެމްބަރު 2024 ގައި އެންސްޕާ އިން ނެރުނު ބަޔާނުގައި އެންސްޕާ އާ ބެހޭ ގޮތުން ނޫސްތަކުން ފަތުރަމުންދާ ވާހަކަތަކަކީ ހަގީގަތާއި ޚިލާފު ދޮގު ވާހަކަތަކެއް ކަމަށް ބުނެފައިވެއެވެ. އެ އޭޖެންސީ ހިންގުމަށް އިމާރާތެއް ހޯދުމުގެ މުއާމަލާތް ހިންގީ ފިނޭންސް މިނިސްޓްރީ އާ ގުޅިގެން ގަވައިދާ އެއްގޮތައް ކަމަށް ބުނެފައިވެއެވެ. އަދި 29 ނޮވެމްބަރ ގައި އެންސްޕާ އިން ވަނީ މި މައްސަލަ ތަހުގީގު ކުރުމަށް އެންޓި ކަރަޕްޝަން ކޮމިޝަން (އޭސީސީ) އަށް ހުށަހަޅާފައެވެ.
