ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، ފަޒީލް ރަޝީދަށް އުސޫލުން ބޭރުން، ހުޅުމާލެއިން ގޯއްޗެއް ދިނުމަށް ޓަކައި، ތައްޔާރުކޮށްފައިވާ ފޭކް އެގްރީމަންޓްގެ ފޮރެންސިކް ތަހުލީލެއް ހަދައި، އޭގެ ނަތީޖާ އާންމުކުރާކަށް ފުލުހުންނަކަށް ނުކެރޭނެ ކަމަށް އެމްޑީޕީގެ ޤާނޫނީ ކޮމިޓީގެ މެންބަރު އަލްއުސްތާޛް އަޙްމަދު މައުރޫފް ވިދާޅުވެއްޖެއެވެ.

ހޮނިހިރު ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި، މައުރޫފް ވިދާޅުވީ ޑޮކިއުމެންޓެއްގެ ސައްހަކަމާމެދު ސުވާލު އުފެދޭ މައްސަލައެއްގައި، އެ ޑޮކިޔުމެންޓުގެ ސައްހަކަން ކަށަވަރު ކުރުމަށް ފޮރެންސިކް ތަހުލީލެއް ނުހަދައި އޭގެ ވާހަކަ ދެއްކުމުން ކަންބޮޑުވާ ކަމަށާއި، އެއީ މީގެ ކުރިން ފުލުހުން އަމަލުކުރި ގޮތެއް ނޫންކަމަށެވެ.

ފޮރެންސިކް ތަހުލީލެއް ހަދައިފިނަމަ އެ އެގްރީމަންޓުގެ ކަރުދާހުގެ އުމުރު އަދި އޭގައި ބޭނުންކޮށްފައިވާ ދެލީގެ އުމުރު ފަދަ ވަރަށް އާދައިގެ މައުލޫމާތު ކަށަވަރު ކުރެވިގެންދާނެ ކަމަށާއި، އެއީ މި ޒަމާނުގައި މާ އުނދަގޫކަމެއް ނޫން ކަމަށެވެ.

އަދި މޯލްޑިވްސް ޕޮލިސް ސަރވިސް ގެ ފޮރެންސިކް ލެބަކީ އޭޝިޔާ ސަރަހައްދުގައިވެސް ހުރި އެންމެ ފެންވަރު ރަނގަޅު އެއް ލެބް ކަމަށް ފުލުހުން ބުނާ ކަމަށާއި، ޑޮކިޔުމަންޓެއްގެ ފޮރެންސިކް ތަހުލީހެއް ހަދައިލަން ނަގާނީ މަދު ވަގުތުކޮޅެއް ކަމަށެވެ.

އެހެން ނަމަވެސް ފުލުހުން އެ މައްސަލައިގައި އަމަލުކުރިގޮތުން، ތަހުގީގު އިންސާފުވެރި ވެދާނެކަމަށް ގަބޫލު ނުކުރެވޭ ކަމަށާއި، އެ ބުނާ އެގްރީމަންޓެއްގެ ފޮރެންސިކް ތަހުލީލެއް ހަދައި، އޭގެ ރިޕޯޓް ހާމަކުރާކަށް ފުލުހުންނަކަށް ނުކެރޭނެކަމަށެވެ.

އޭނާ އިތުރަށް ވިދާޅުވީ، އެ ރިޕޯޓް ހާމަކޮށްފިއްޔާ ފުލުހުން ދެއްކި ވާހަކައާއި، އަދި ސަރުކާރުގެ މުޅި ޕްރޮޕަގެންޑާ ބޭޒާރުވެގެންދާނެކަމަށެވެ.

އޭގެ ރަނގަޅު ފޮރެންސިކް ތަހުލީލެއް ހަދައިފިނަމަ، އެއީ މި ސަރުކާރުގެ ވެރިން ހުޅުމާލެއިން ގޯތިތަކެއް ވަގަށް ހޯދުމަށް ހެދި ޑޮކިޔުމަންޓުތަކެއް ކަމަށާއި، އޭގެ ކަރުދާހަކީވެސް މި ދިޔަ ސަރުކާރު ނިމުނު ފަހުން އުފައްދައިފައި ވާ ކުރާހެއްކަން އެނގޭ ހިސާބަށްވެސް ކަންކަން ގޮސްދާނެ ކަމަށެވެ.

އޭނާ ވިދާޅުވީ މިސަރުކާރުގެ ސިޔާސީ މަގާމުތަކުގައި ތިއްބެވި ބޭފުޅުން ދޮގު ހައްދަވާތީ ސަރުކާރުގެ ވެރިން ދައްކާ ވާހަކަ ރައްޔިތުން މިހާރު ގަބޫލުނުކުރާ ކަމަށެވެ. އެހެންވެ މި ސަރުކާރުން ވަގަށް ވިއްކާލި ގޯތި ތަކުގެ މައްސަލައިގައި، ސަރުކާރުގެ ޕްޕޮޕަގެންޑާ ފެތުރުރުމަށާއި، ކުރީގެ ސަރުކާރުގެ ވެރިންގެ ބޮލުގައި ކަންތައްތަކެއް އެޅުވުމަށް ފުލުހުން ބޭނުންކުރަންފެށީ ކަމަށެވެ.

ބުރާސްފަތި ދުވަހުގެ ރޭ ފުލުހުން ބެއްވި ނޫސްވެރިންގެ ބައްދަލުވުމާ ގުޅިގެން އާންމުންގެ ތެރެއިން ގިނަބަޔަކު ދަނީ ފުލުހުންނަށް ފާޑުކިޔަމުންނެވެ.