އެޗްޑީސީ ގެ އެމްޑީ ފަޒުލް ރަޝީދުގެ ބޭބެ އަށް ހުޅުމާލެ އިން ބިމެއް ދިން މައްސަލައިގައި ފަޒުލް އިސްތިއުފާ ދެއްވަން ޖެހޭނެ ކަމަށް ކުރީގެ ބަންޑާރަ ނައިބު އާޒިމާ ޝުކޫރު ވިދާޅުވެއްޖެއެވެ.
ގާނޫނާއި ގަވައިދާ ޚިލާފަށް ވަގަށް ހުޅުމާލެއިން ބަޔަކަށް ގޯތި ދިން މައްސަލަ ފެންމަތިވުމާ ގުޅިގެން ސޯޝަލް މީޑިއާ ގައި އާޒިމާ ކުރެއްވި ޕޯސްޓެއްގައި އެއީ އިއްތިފާގަކުން ނުވަތަ އެކްސިޑެންޓަކުން ހިނގި ކަމެއް ކަމުގައި ވިޔަސް ފަޒުލް އިސްތިއުފާ ދެއްވަން ޖެހޭނެ ކަމަށް އޭނާ ވިދާޅުވިއެވެ.
"ދައުލަތުގެ އެންމެ އަގު ބޮޑު އެއް ކުންފުނި ހިންގަވަން ހުންނެވި ބޭފުޅެއްގެ އެއްބަނޑު އެއްބަފާ މީހަކަށް، އެތަނެއް މެދުވެރިވެ، އެތައް މިލިއަން ރުފިޔާ އެއްގެ ބިމެއް ލިބިދީފައިވާނަމަ، އެބޭފުޅަކު ބައިވެރިވުން އޮތަސް އަދި ނެތަސް، އަދި އެއީ އިއްތިފާގަކަށް ވީ ނަމަވެސް ނުވަތަ އެކްސިޑެންޓަކަށް ވީ ނަމަވެސް، އަޅުގަނޑު ދެކޭ ގޮތުގައި އެބޭފުޅަކު އިސްތިއުފާ ދެއްވަން ޖެހޭނެއެވެ." އާޒިމާ ލިޔުއްވާފައިވެއެވެ.
އާޒިމާ ވިދާޅުވީ މިއީ އޭނާގެ "ރައުޔު" ކަމުގައެވެ.
ބުދަ ދުވަހު މައްސަލަ ފަޅާ އަރާ އާންމުން ނުކުމެ އެޗްޑީސީ އޮފީހުގެ ދޮރުމަތީގައި ހިނގައިގެން އުޅޭ ކަންތައްތަކާ މެދު ހިތްހަމަ ނުޖެހުން ފާޅު ކޮށްފައިވަނިކޮށް ބުރާސްފަތި ދުވަހު ފަޒުލް ވަނީ މަސްއޫލިއްތުތަކުން އެކަހެރިކޮށް ސަސްޕެންޑް ކޮށްފައެވެ.
ފަޒުލް އާ މެދު ވަގުތީ ފިޔަވަޅެއް އެޅި އިރު، އޭނާ ވަނީ ބުދަ ދުވަހުގެ ރޭ އެޗްޑީސީ ގައި ކުއްލި ނޫސް ކޮންފަރެންސް އެއް ބާއްވާ އޭނާގެ ބޭބެ އަށް ވަގަށް ގޯތި ދިން މައްސަލަ ދިފާއު ކުރައްވަން މަސައްކަތް ކުރައްވާފައެވެ.
މައްސަލަ ފަޅާ އެރުމާ ގުޅިގެން ނޫސްވެރިން ސުވާލު ކުރުމުން ގަވައިދާ ޚިލާފަށް ގޯތި ދިން މީހުންގެ ތެރޭގައި އޭނާގެ ބޭބެ ހިމެނުނީ "އިއްތިފާގަކުން ކަމަށް" ފަޒުލް ވިދާޅުވިއެވެ.
އަދި އެކަމުގައި އޭނާގެ އެއްވެސް ރޯލެއް ނޯންނާނެ ކަމަށް ވެސް ވިދާޅުވިއެވެ.
ކުރީ ސަރުކާރުން ކުރިއަށް ގެންދިޔަ "ބިންވެރިޔާ" ސްކީމުން މި ސަރުކާރުން ގަވައިދާ ޚިލާފަށް ގޯތިތަކެއް ދިން މައްސަލަ ފެންމަތިވުމާ ގުޅިގެން އެޗްޑީސީ އިން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ، ގަވައިދާ ޚިލާފަށް ކަމެއް ހިނގައިގެން އުޅޭކަން އެޗްޑީސީ އަށް އެނގުނީ އެއް ގޯއްޗެއްގެ އިންފާރު ރާނަން ދެ ފަރާތަކުން ހުއްދަ އަށް އެދި ހުށަހެޅުމުން ކަމަށެވެ.
އެހިސާބުން އެޗްޑީސީ އިން ފިޔަވަޅު އެޅި ކަމަށް ފަޒުލް ވިދާޅުވި އިރު، އޭނާގެ ވާހަކައިގައި ހަމަ ނުޖެހޭ އެތައް ކަމެއް ސާފު ކުރުމަށް ނޫސްވެރިން ގެންދިޔައީ ފުލުފުލުގައި ސުވާލު ކުރަމުންނެވެ.
މައްސަލަ ފެންމަތިވުމުން އެކަން "ވެރިފައި" ކުރަން ހައުސިންގ މިނިސްޓްރީ އަށް ފޮނުވީ އެޗްޑީސީ އިން ކަމަށް ވިދާޅުވެ އޭނާ އަމަލު ކުރެއްވީ ރަނގަޅަށްކަން ދައްކަން ނޫސްވެރިންގެ ބައްދަލުވުމުގައި މަސައްކަތް ކުރެއްވި އިރު، ހައުސިންގ މިނިސްޓްރީން އެކަން ސާފު ކޮށްދިނުގެ ކުރިން ފަޒުލް ގެ ބޭބެއަށް ގޯތީގެ ވަށާފާރު ރާނަން އެޗްޑީސީ އިން ހުއްދަ ދިން ކަމަށް ވެސް ފަޒުލް އަށް އެއްބަސްވެވުނު ކަން ފާހަގަ ކުރެވެއެވެ.
ނޫސް ކޮންފަރެންސް ގައި ވަގަށް ދިން ގޯތީގައި އިންފާރު ހުރީ ރާނާފައިތޯ ނޫސްވެރިން ސުވާލު ކުރުމުން ފަޒުލް ވިދާޅުވީ "ނުރާނާ" ކަމަށެވެ. އެހެން ނަމަވެސް އެ ކަމުގައިވެސް ފަޒުލް ދޮގު ހެއްދެވިކަން އިސާހިތަކު ވަނީ ފަޅާ އަރާފައެވެ. ނުރާނާ ކަމަށް ފަޒުލް ވިދާޅުވި ގޯތީގައި ހުރީ ހަތަރު ފޫޓަށް ވަށާފާރު ރާނާފައެވެ.
އެޗްޑީސީ ގެ ތެރެއިން ހިންގި މި ބޮޑު ވައްކަމާ ގުޅިގެން އާންމުންގެ ގިނަ ބަޔަކު ވެސް އަންނަނީ ފަޒުލް ގެ އިސްތިއުފާ އަށް ގޮވަމުންނެވެ.
