މިހާރު ނޭޕާލްގައި ކުރިޔަށްދާ ފަނަރަ އަހަރުން ދަށުގެ ސާފް ޗެމްޕިއަންޝިޕުގައި ރާއްޖޭގެ ޓީމު ކުޅުނު ފުރަތަމަ މެޗުން އިންޑިއާ އަތުން ތަފާތު ބޮޑުކޮށް ބަލިވެއްޖެއެވެ.

ގްރޫޕް ސްޓޭޖްގެ ފުރަތަމަ މެޗުގައި ހޮނިހިރު ދުވަހު އިންޑިއާއާއި ދެކޮޅަށް ކުޅުނު މެޗުން ރާއްޖޭގެ ޓީމު ބަލިވެފައި ވަނީ 9-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ވެސް އިންޑިއާއިން ވަނީ ރާއްޖޭގެ މައްޗަށް ހަތަރު ލަނޑުގެ ލީޑެއް ނަގާފައެވެ.

މި މެޗުގައި އިންޑިއާގެ ރަވީ ބަހާދުރް ވަނީ އެ ޓީމަށް ހެޓްރިކެއް ކާމިޔާބު ކޮށްދީފައެވެ. މި ކުޅުންތެރިންގެ އިތުރުން އެ ޓީމަށް ލަނޑުތައް ކާމިޔާބު ކޮށްދިނީ ތޮއިބާ ސިންގް،ރިކީ ޖޯން، އަދި ކެޕްޓަން ވިކްރަމް ސިންގްއެވެ. ރާއްޖޭގެ ކުޅުންތެރިން އަތުން ވަނީ ބައިކޮޅަށް ދެ ގޯލު ވެސް ވަދެފައެވެ.

މި މުބާރާތައް ތައްޔާރުވުމުގެ ގޮތުން ރާއްޖޭގެ ޓީމުން ވަނީ ސްރީލަންކާގައި އެކުވެރިކަމުގެ ދެ މެޗު ކުޅެފައެވެ. އެ ދެ މެޗު ވެސް ކާމިޔާބު ކޮށްފައިވަނީ ރާއްޖޭގެ ޓީމެވެ. މި މުބާރާތާއި ރާއްޖޭގެ ޓީމުން ކުރިމަތިލާފައި ވަނީ ބީޖީ އަދި ވިކްޓްރީގެ ކުރީގެ ކޯޗު މުހައްމަދު ޝާޒްލީގެ އިރުޝާދުގެ ދަށުންނެވެ.

މި މަހު 18 އިން 27 ގެ ނިޔަލަށް ނޭޕާލްގައި ބާއްވާ ސާފް ޗެމްޕިއަންޝިޕުގައި ރާއްޖެ ހިމެނެނީ ނޭޕާލް އަދި އިންޑިއާއާ އެކު ގްރޫޕް ބީގައެވެ. މި މުބާރާތުގައި ރާއްޖެއިން ދެން ނުކުންނާނީ މި މުބާރާތް ބާއްވާ ގައުމު ކަމަށްވާ ނޭޕާލް އާއި ދެކޮޅަށެވެ. މި މެޗު ކުޅެން ހަމަޖެހިފައިވަނީ އޮގަސްޓު މަހުގެ 21 ވަނަ ދުވަހުއެވެ.