އިސްރާއީލުގެ މެދުތެރެއަށް ސްޕަރސޮނިކް މިސައިލް ހަމަލާއެއް ދީފައިވާ ކަމަށް ޔަމަނުގެ ހޫތީން ބުނެފިއެވެ.

ހޫތީން މި ހަމަލާ ދިނުމަށްފަހު ވެސް ބުނެފައިވަނީ އިސްރާއީލުގެ ސިފައިން  ޣައްޒާ ގައި ކުރަމުންދާ ހަނގުރާމަ ނިމުމަކަށް ދާންދެން އިސްރާއީލާ ދެކޮޅަށް އަސްކަރީ ހަރަކާތްތައް ކުރިއަށް ގެންދާނެ ކަމަށެވެ.

ހޫތީ އަސްކަރީ ތަރުޖަމާނު، ޔަހްޔާ ސާރީ، ޓީވީ މެދުވެރިކޮށް ދިން ބަޔާނެއްގައި ބުނެފައިވަނީ ހޯމަ ދުވަހު ކުރިއަށް ގެންދިޔަ މި އޮޕަރޭޝަންގައި ބޭނުން ކުރީ "ފަލަސްތީން 2" ނަމަކަށް ކިޔާ ހައިޕަރސޮނިކް ބެލިސްޓިކް މިސައިލެއް ކަމަށެވެ.

ހޫތީން ބުނެފައިވަނީ މި ހަމަލާ ދިނީ އިސްރާއީލުން ޣައްޒާގައި ހިންގަމުން ގެންދާ "މަރުގެ އަނިޔާވެރި ޢަމަލުތަކަށް" ރައްދު ދިނުމުގެ ގޮތުން ކަމަށެވެ.

އިސްރާއީލުން ވަނީ އަހަރަކަށް ވުރެ ދިގުލީ އަނިޔާވެރި ހަމަލާ ތަކުގައި ޣައްޒާގައި، 45،000 އަށްވުރެ ގިނަ މީހުން ޝަހީދު ކޮށްލައިފައެވެ.

އިސްރާއީލުގެ ސިފައިން ބުނެފައިވަނީ ޔަމަނުގެ ސަރަޙައްދުން އައި މިސައިލެއް އިސްރާއީލުގެ ސަރަޙައްދަށް ވަނުމުގެ ކުރިން މަތަކުރެވުނު ކަމަށެވެ.

ވީޑިއޯ ފުޓޭޖުތަކުން ފެންނަ ގޮތުގައި މިސައިލްގެ ސަބަބުން އިސްރާއީލުގައި ވަނީ ސައިރަން އަޅާފައެވެ. އަދި އެތައް ހާސް ބަޔަކު ރައްކައުތެރިކަން ހޯދުމަށް އިމާރާތްތަކުގެ ތެރެއަށް ވަދެ ބޮނދާ މަންޒަރު ފެނިފައިވެއެވެ.

އިސްރާއީލުން ބުނީ ސައިރަން އަޅާފައިވަނީ މިސައިލް މަތަ ކުރުމުގެ ސަބަބުން އޭގެން ވެއްޓިދާނެ ބައިތަކުގެ ނުރައްކަލުގެ ސަބަބުން ކަމުގައެވެ. 

މި މިސައިލުގެ ސަބަބުން އިސްރާއީލުގެ އެންމެ ބޮޑު ސިޓީ ކަމަށްވާ ތެލް އަވީވްގައި ސައިރަން އަޅާފައިވާ ކަމަށް އިސްރާއީލުގެ މީޑިއާތަކުންވެސް ރިޕޯޓު ކޮށްފައިވެއެވެ.

ނަމަވެސް، ހޫތީން ބުނެފައިވަނީ މި އޮޕަރޭޝަނުން "ކާމިޔާބުކަމާއެކު އޭގެ މަޤްޞަދުތައް ހާސިލުކުރެވުނު" ކަމަށެވެ. އިތުރު ތަފްސީލެއް ދީފައެއް ނުވެއެވެ.

ފާއިތުވި ހަފްތާގައި، ޔަމަނުގެ ޑްރޯނެއް ވަނީ ތެލް އަވީވް ކައިރީގައިވާ ޔަވްނޭ ސިޓީގައި ހުރި އިމާރާތަކަށް އަރާފައެވެ.

އިސްރާއީލަށް މިސައިލްތަކާއި ޑްރޯންތައް ބޭނުން ކޮށްގެން ދޭ ހަމަލާތަކުގެ އިތުރުން، ހޫތީން ވަނީ ރަތް ކަނޑާއި އޭގެ ވަށައިގެންވާ ސަރަހައްދުގައި ދަތުރުކުރާ އުޅަނދުފަހަރަށް ހަމަލާދެމުން ގެންގޮސްފައެވެ. މިއީ ޣައްޒާގެ ފަލަސްތީނުގެ ރައްޔިތުންނާ އެއްބައިވަންތަކަން ދެއްކުމުގެ ގޮތުން ކަމަށް އެމީހުން ބުނެއެވެ.

ފާއިތުވި އަހަރު، ހޫތީން ވަނީ ގިނަ އަދަދެއްގެ އުޅަނދުފަހަރަށް މިސައިލްތަކާއި ޑްރޯންތަކުން ހަމަލާދީ، 4 ކުރޫ އިން މަރާލައި، 2 އުޅަނދު ފައްތާލާފައެވެ.

އެމެރިކާއިން ހޫތީންގެ މުހިންމު ތަންތަނަށް ހަމަލާ ދިނުމަށް އަސްކަރީ އިއްތިހާދެއް އުފައްދާ އެ އިއްތިހާދުން ހަމަލާ ދެމުން ގެންދިޔަ ނަމަވެސް މިކަމުން ހޫތީންގެ ހަމަލާތައް ހުއްޓިފައެއް ނުވެއެވެ. އިސްރާއީލުންވެސް ވަނީ މި ހޫތީންގެ ބާރުގެ ދަށުގައިވާ ޔަމަނުގެ ސަރަހައްދުތަކަށް ވައިގެ ހަމަލާތައް އެތައް ފަހަރަކު ދީފައެވެ.