2025 އަހަރުގެ ޖަނަވަރީ މަހުން ފެށިގެން ރާއްޖޭގައި ނަގާ ގްރީން ޓެކްސް ދެ ގުނައަށް ބޮޑުވާނެއެވެ.

މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ވަނީ ގްރީން ޓެކްސްގެ ރޭޓްތަކަށް ބޮޑެތި ބަދަލުތަކެއް ގެނެސް، އެ ބަދަލުތައް 2025 ވަނަ އަހަރުގެ ޖަނަވަރީ 1 ވަނަ ދުވަހުން ފެށިގެން ޢަމަލުކުރަން ފަށާނެކަމަށް އިޢުލާނުކޮށްފައެވެ.

ދިވެހިރާއްޖޭގެ ޓޫރިޒަމާބެހޭ ޤާނޫނަށް ގެނެވުނު 14 ވަނަ އިޞްލާޙާ އެއްގޮތްވާ ގޮތުގެ މަތިން، މި އައު ރޭޓްތައް ރިސޯޓުތަކާއި، ގެސްޓްހައުސްތަކާއި އަދި ފަތުރުވެރިކަމުގައި ބޭނުން ކުރާ އުޅަނދުތަކަށް ވެސް ނެގޭނެއެވެ.

ގާނޫނަށް ގެނައި ބަދަލާ އެކު ގިނަ ތަންތަނުގައި ގްރީން ޓެކްސް ދެގުނައަށް އިތުރުވާނެއެވެ.

ރިސޯޓުތަކާއި، އިންޓެގްރޭޓެޑް ޓޫރިސްޓް ރިސޯޓުތަކާއި، ރިސޯޓް ހޮޓާތަކާއި، 50ށް ވުރެ ގިނަ ކޮޓަރި ހުންނަ ޓޫރިސްޓް ގެސްޓްހައުސްތަކާއި އަދި އުޅަނދުތަކުން މިހާރު ކޮންމެ މެހުމާނަކަށް ރެއަކަށް 12 އެމެރިކާ ޑޮލަރު ނެގުމަށް ވަނީ ހަމަޖެހިފައެވެ. އަދި މީހުން ދިރިއުޅޭ ރަށްރަށުގައި 50 ނުވަތަ އެއަށްވުރެ މަދު ކޮޓަރި ހުންނަ ގެސްޓްހައުސްތަކުން ކޮންމެ މެހުމާނަކަށް ރެއަކަށް 6 އެމެރިކާ ޑޮލަރު ނަގާނެއެވެ.